Malaysia gamsung ah Refugee leh Asylum Seeker akigawm in mi 150,204 pha

Malaysia gamsung ah Refugee leh Asylum Seeker akigawm in mi 150,204 pha

Malaysia gamsung ah tukum May 31 ni ciangciang sazian akibawlna ah Refugee leh Asylum Seeker akigawm in mi 150,204 pha cih kiza hi. Tua mi 150,204 tepen gamtuamtuam gam 59 panin Malaysia gamsung aom UNHCR (United Nations High Commissioner for Refugees) zumpi ah Register akibawlsa ahi uhhi.

Prime Minister’s Department Datuk Seri Shahidan Kassim in agenkhiatna ah tua mi 150,204 lakah Refugee in aki ciamtehsa pen mi 94,361 hi uh a, adang mi 55,843 tepen Asylum Seekers hipan uh cihi.

Malaysia Refugee leh Asylum Seeker lakah atamzaw pen Myanmar gammi vive hi uh a, akigawm in Myanmar gammi 133,725 bang phalai uhhi. Tuazom ah Pakistan 3,548; Sri Lanka 2,328; Yemen 2,095; Somalia 2,062; Syria 1,980; Iraq 1,461; Afghanistan 1,082; Palestine 698; Iran 440 cihbang ahihi.

Malaysia kumpi in hih UNHCR Card atawite sungpan in Rohingya Ethnic Group te naseptheih nadingin tukum March kha akipan avaihawmsak uh ahihi. Adiakdiak in Manufacturing Sector leh Plantation Sector te ah Rohingya te’n kum 3 sung Official takin aseptheih nadingin Malaysia kumpi in avaihawmsak uh ahihi.

Ahi zongin UNHCR Refugee Card piakvai tawh kisai in Malaysia kumpi in bangmah thuneihna neitheilo uh a, “Convention on Refugee Status 1951 or Protocol 1967” thukhun tawh kizui in UNHCR zumpi bekmah in Refugee Card piathei uhhi.

Tuaban ah Malaysia gamsung aom Refugee leh Asylum Seeker naupang tepen Private School leh Non-governmental Educational Center te ah lai sintheihna nei uhhi ci’n Datuk Seri Shahidan Kassim in genkhia hi. (Kumpi sanginn Government School ah sinkhuan omnai tuanlo cihna hikhading hi)

Related: Malaysia kumpi in agamsung ah Refugee Card atawi mimal bangzah phalai cih theiciannuam

Hihvai teng agenkhiatna pen Lim Lip Eng (DAP-Segambut) in dotna nei ahih manin, dotna tungtawn in Malaysia gamsung aom Refugee leh Asylum Seeker te koigampan, mibangzah cih adawnkikna in agenkhiat ahihi. (Lamkhat ah Malaysia kumpi inzong Refugee te thu “Data” teng aneng atawng in ngahta uh ahidiam cihkhat lunghimawh huai simtham hi) Nungdiak May khasung khawnginzong Malaysia kumpi in agamsung ah Refugee Card atawi mimal bangzah phalai cih theiciannuam in kipeipei uh a, ahi zongin UNHCR te’n Data bangmah piakhia nuamlo uh cih kiza hi. Tu’n bangciang ahimawk diam? Sawltak #zomidaily