Zomite Ki-it Hunta

Dear Kongit Ngaungau Zomi u le naute,

Tuni tuhun in Kawlgam gamvai (Politics) hun hong kilaih teh mi pawlkhat in muhkholhna omlopi in, deihbawl lametna tawh thu tampi nangaihsun khol pong mawk uha, gel loh ding gel kha in, sep loh ding hong sepsawm uh ciangin apiang dinga kilawmlo thu pawlkhat hongpiang a, zongh, hong pianglai ding hi.

Gen nop pi pen ahih leh, “Zosuan tate, kipumkhat mah lehangh, mi zah kipha nailo, iphak zawh nading inzong kum tampi kisam kimlai, bang hangin mi khat le nih’ hamphat na ding, thuneih nadinga ahanciam nate-uh telleh telloh helh a, buaipih sawm ihi hiam?” cih dotna ka neinuam hi.

Kawlgam kumpi luite le tulaitak asemlai (Dictatorship) te’ dan, i deih hetloh pen tuni-in ei mau’ sungah nungtasak ding ihi hiam? ZRO/ZRA te pen i mite hong khenthang ding hilo a, hong kaplum ding zong hilo-in, hong kipumkhat sak ding, hong lungmuangsak ding, hong bitsak dinga ineih ahihi. Daw Aung San Suu Kyi (NLD) in, agenngei thu khat zangei tek dingin hong lamen ing. Ama’ cihna ah, “Kapa ‘Aung San’ in, Kawlgam galkap (Myanmar Independence Army) a formed lai-in, mipi (Public) bit nading hi-in, mipite thatding le kapdinga anaphuh (Formed) hikei” acih kammalte tuni ZRA te’n a telsiam dinguh kalung gulhpha mahmah hi.

Kuki le Paite ki buaihun lai (1995-1998) kim in, upmawh thu tawh mawhna neilo-a kithat, Zo-Zou kampau sinsen sawmnga (50 peoples) bang om uha, tuni ciangdongin mawhmaina ngenlo banah akisap leh bawlsiat ding, mat le hen nangawn a sawmlai uh ahihi. Minam khat ihihna, koici lah sawm a hi dinguh hiam?

Zo min abulphuh minamte ihih manin, Lai le Chin in iki lonuamkei a, Zo suan tate ihihlam zong itheih mah bangin, manpha zong i satek hi. Bang hangin ZO zang nuamlo in Zo mi or Zomi tawh thau tawi-a ibulpi min ahi, Zo pen mansak sawm, thahlup sawm ihi hiam?

Tung Pasian’ bawl, ateltuam Isarael mite zong, Hitla in million tampi that mah leh, a ci manthan ding phallo banah, abawlsiate tuni-in, leitung tangthu (History) ah bang mahin ki thei nawn tuanlo uhi. Tel thei dingin, ka deih hi.

Tutung, India lamte UZO (United Zo Organization) Election tawh kisai in, ZAR te va Involved uh cih thu khawng peuh i zak ciangin, lungnop lohna thu tampi, i mite’ lungsim sungah honglut-a, mangngilh vat ding thu zong hilo hi.

Bang hang hiam cih leh, CNA/CNF te’n, Kawlgam lama i mi (Zomi) te, hong thah sak uh pen mi tamlualo himah taleh, tuni dong ilung kimlo in Chin acihnak uhleh kiza nuamlo in, kimulo zah dongin, vaphualihehna lian mahmah hi. Manipur State sunga ZRA te’ thah, Zou/Zo te pen mawhna nei lah hilo in, numei naupang peuh a hih uh banah, tuni ciangdong, mawh mah ungh, khut khial mah ungh, cinuamlo uha, min khawng peuh kisuhsawm lai cih pen, tunga Sian Mang in hong-awi kikeuh loding ahih manin a ci man nuam ihih kei buahleh kisik hun mahmah ta hi, cih zong deihsakna tawh hong theisak nuam kahihi.

A tunga lai-atte pen, kidangbawlna, kituambawlna hilo zaw in, minamkhat, unaukhat, behkhat, phungkhat ihihlam iphawk dingleh, hongpai laiding hunte ah kipumkhat semsem ding deihna tawh kahong gelhkhiat ahih lam, Pasian min tawh ka kiciam hi.

* Aki khen cinglopi kikhensawm dah ni.
* Aki muhdah cinglopi kimudahsawm se kei ni.
* Aki huattal cinglopi kihuat bawlse dah ni. i kisuh ding omlopi kisut sutse kei ni.

Kipumkhat ding lunggulhna tawh,
David Thang Pau (Milun)
Greensboro, NC 27410
The United States of America.
Email: [email protected]