Pawlpi phut nuamte’ theihding ~ Pu Thangboi

Pawlpi phut nuamte’ theihding ~ Pu Thangboi

Pawlpi ih cih pen Pasian’ minthanna ding, “Vantung ah Pasian’ deihna akicin mah bang in mihingte’ nuntakna sungah akicin theihna ding”, Pasian’ khuavak tanna ding, cimawh liangvai meigong tagahte etna ding, amangthang khate hotkhiatna nasep akisepna mun, Pasian’ thunungta akihawmna mun, van thupha lei thuphate ngah theihna ding lampi kihilhna mun, itna khahkhiatna mun, cinate – lungsim tamkhamte leh cimawh beidongte’ suahtakna mun, lam-etna akipatna mun, van hauhnate koici ngah ding; koici zek ding cihte akihilhna mun leh aphattak mahmah Pasian’ Min Siangtho lungsim khempeuh sungkhia a akiphatna mun ahi hi.

Tua ahih man in mikhat’ tung a thangpaih man, khat peuh in khasum asan ding deihsak man, mitawh kilem loh man leh lung kimlohna tuamtuam hang khawng tawh phuat ziauziau ding hi peuhmah lo hi.

Pawlpi ih cih pen atung a ih gensa bang ahih man in ih phuatma in Pasian hoihtak dot phot ding ahi hi. Mi’n phuan tah, sponsor om tah ci a company phuat a phuat ziauziau ding hi peuhmah lo hi. Pasian’ deihna leh sawlna omlopi in mawk phuat ding hi peuhmah lo hi.

Pawlpi ki mawk phuat ziauziaute kum 20 akipna ding hamsa mahmah hi. Kip phial mah taleh zong akihelkhate khalam taksa lam ah hamsia mahmah uh hi. Pawlpi ih mawk phuh ziauziau pen ei bek akibawlsia hilo in mitampi abawlsia ih hi gige hi.

Tuni in khatvei Pasian’ lam zuan kik in dongpha lai peuhmah dih ni guai. Pasian’ deihna omlopi ahih leh zong khawl bingbeng lel leng hoihzaw tham lai ding hi.

Pasian dong masalo in pawlpi mawk phuatphuat lam khawlta leng hoih mahmah ding a, aphuan ziauziaute zong panpih sedah leng hoihzaw ngel ding hi. Genkhialh aom leh ngaidam, Mung Laan Thang, Tonzang, Zogam