ZYA Lungdam Pihna ~ Job Thawngno
Zomi Youth Association (ZYA) kumsawm cin ciaptehna Magazine sungah lungdampihna lai ka gelh theih manin ka lungdam mahmah hi. Hih Magazine sunga kihel thute ka et saisai ciangin kicing ka sa mahmah hi. Biakna thu, cidamna thu, kimawlna thu, Zo ngeina, kipattahna, lai thu, pilna thu … cihte-a kipan theihhuai, ciinhuai thu tampi om hi. A lei a sim mite sumh het lo ding uh hi. Kumsawm cin phawk nadingin thu nam sawm kong lui hi.
1. ZYA min pen Alphabet ABC lakah a tawpna Z pan kipanin a patna A tawh tawp se hi. A kilehbulh a lamdang, a huam kim mahmah kipawlna hi.
2. ZYA in sisan hopna a bulphuh kipawlna ahih manin, nuntakna taktak ahi sisan kipawlna, kihopna taktak ahi, ki-it kikhualna kipawlna ahi hi.
3. ZYA in sisan hopna tawh a na ding tampi damsakin, a si ding tampi hingsak ahih manin, kha le taksa a damsak Pastor le Siavuan tawh kibang hi.
4. ZYA in minam min bulphuh kipawlna khat ahih manin, minam min a kem, a khual, a hu gige i Ciimnuai khuk khat ahi hi.
5. ZYA in khangno bulphuh kipawlna ahih bangin, khangnote sisan, a tha a ngal, lungsim pumpi a gawmkhawm kipawlna ahi hi.
6. ZYA in lamkiim lampama dongtuak cimawhte, haksatna a thuakte donin kem ahih manin, Samaria mihoih kipawlna hi.
7. ZYA in gamsung gampua hong gawmin, biakna namkim hong gawmkhawm ahih manin, biakinnpi le nekkhawm hai tawh kibang hi.
8. ZYA min tawh Nipikal Thukizakna (Thuthang) kihawm den ahih manin, biakna namkim a huam lai tawh nasepna phualpi khat ahi hi.
9. ZYA in a mangsa vante mukiksakin, gamdang gamsung thu hong zasak a, kidop ding le theih ding thute hong hilh den ahih manin, i kamtai le i tangko ahi hi.
10. ZYA a kiphuat zawh kumsawm sungah, ZYA kipawlna nono, a munmun a phualphual ah kiphuan zihziah ta ahih manin, khaici bang hileh a ci hoih mahmah, mihing ganhing bang hileh a nam hoih mahmah, a phungpha, suanlekhak tuleta a hau, Pasian thupha piak kipawlna khat hi, ci-in lungdamkohna tawh thupha paihin ka lungdampihna lai ka hialbawl hi. Rev. Job Nang Khaw Thawng
Comment piaknop aomleh...