Zomi – Pheisam ~ Pau Khat Suan

Zomi – Pheisam ~ Pau Khat Suan

Pheisam in ong muhkhit teh ong nungngat san kici citciat hi. Tunai a kawlgam bup thu vaihawmna leh Zomite’ mailam ding a lung himawh mahmah pawlkhat, tu-mawh ommawh liang a kinilsuk kiniltoh laitak in Zomi mipil misiam thu ngaihsun thei, mipi’ muan le suan tampite in a zakna tung ah amau’ theihna tawh limtak ngaihsun in, a telkhit uh ciang, ong hilhcian,ong kuppih ongnial nawn sese lo in pheisam bang in ong nungngatsan phiuphiau lel mawk uh hi.

Bangmah i sepkhiatpah theihloh hang muhna leh ngaihsutna kikup kigen pen asem abawl a gamtangte ading in ngaihsutkak theih ding lamlak khuavak bang hi gige hi. Tulaitak Zomite’ dinmun pen mipi tawh kisai thu le la vaihawmna cihbek hilo in, mailam ah ong khang ding generation thak, khangtampi ading ahihman in khatbek ngaihsutna leh muhna, geelsiamna leh sepsiamna kicing hetlo thei ding ahihman in ngaihsut piakna tampi kisam ding ahi hi.

Ahi zong in tuciangciang i omdan, i sep i bawldan leh i thuzaksate i etkik ciang, a thuthei zaw ding leh thu ngaihsun thei dingte in mipi pheisam bang in nungngatsan hithiat in, asem abawl, a diangkhiate in lah mipi thu kuppih lo, thu kuppihna zong thusim lo, mipi’ vai nasem hi napi mipi’ ngaihsutna thusim lo cihbang in om zelzul hihang.

I angsung leh mimal deihna pen i minam, i gam leh khangkikte i khual na sang lian leetlaat zaw sak mawk ihihman a ei’ cihloh peuh pheisam bang a lehngatsan lel ihi hiam?

Zomite thumanna leh cihtakna masuan in gam leh nam ading, khangkik kik dong khualna tawh i hihtheina, i pil i siam i theihnate sungkhia genkhia kikum in tonkhawm ve ni ee… mimal in suplawh khaphial mah le’ng khangthakte ading in metna suak ding in lam-en ing. Khangkikte pheisam bang in nungngat san kei ni. Pau Khat Suan