Kum 2015… ABC tawh Lungngaihna – Bulphuh LSTho: Piacilna 12:8
Thupatna: A, B, C:
- A in Ai khua, a khiatna=ninbung, van kisia, ninkholna Innpi=Satan; a tawntung mun ding Hell khuk ahi hi.
- B in Bethel, a khiatna=Pasian’ Innpi=Pasian; a tawntung mun ding Vantunggam ahi hi.
- C in Choice, a khiatna=Teelna man, teelsiamna [The Right Choice] ahi hi. Thum mah hong pha leng zel mawk uh ei!
A: Ai khua pen kum 2015 ah i nusiat, i nungngat ding; ninbung, ninkholna innpi hi mawk hi. Hih khua tawh a kibeelpawlte in: vansia, Kha Siangtho a dahsak thei, gamtat kampauna, geelna tupna sawmnate ahi ih. Zongsatna hoih lote, bangmah-a kimang het lo khempeuh internet leh Facebook Youtube-te ah hun tam zat luatnate dongin “Ai” khua tawh kibeelpawl i ci nuam hi.
Na zat na hun piak dan zui-in paisan ding maw, khiam ding maw! na kithei ding hi. Tuate nungngatin paisan takpi ding hi hang. Gilvah dang vahna ahi peuh mah lo; nekna dawnnate zong, paisanin kum thak pen mi thak, kha thak tawh a dawn a zang toto suak thei dingin ei Zomite Pasian in hong tuambawl, hong angvan ta peuh hen, Amen.
B: Bethel khua pen Pasian’ Innpi [House of God] hi a; Jerusalem ii saklam nitumnalam tai 10-na pawlah omin Ai khua tawh tai 2 bang kigam la-a, Ai khua tawh kigalsai sise uh hi. Piancilna 28:19-na ah Bethel khua lui a min “Luz” kici a, [Almond kung] cih khiatna nei pen tuhunin “Ettell” kici citciat a, i dinmunte, i ki-Ettel takpi ding hong kawk veve mawk hi. Ki-entel ni ci leng: Pasian’ Innpi mah a manawh zaw i hi uh hiam? A hih ke’h, Satan’ Innpi ninbung lamah a nawh pai pha mahmah i hi mawk zen kha hiam? Ki-entel takpi-in i khuasak zia kibawl pha ding hi hang. Piancilna 28:17-na ah “Hih pen Pasian’ inn lo adang hi loa, hih pen vantung lutna kongpi ahi hi,” Jacob in a na cihna mun ahi hi. Bethel lam manawh ciat ni. Amen.
C:1 Choice-Teelsiamna: I lei nunkhua ah teelna vive setkan sial, minit sial, nai sim leh nisimin kidim ngitnget hi. Teelna Man [Right Choice] i neih theih i khentat theih ding poimawh tak ahi hi. Teelna Man a nei thei dingin Zomite Pasian in hong aituambawl ta peuh hen. Piancilna 13:1~4-na ah, Abram in puanbuk a lamnasa, Pasian a biak piaknasa mun ahi, Bethel khua omna Kanaan kuam a na teel zawkna kimu thei hi. Tua hangin tuni dongin Abraham a min mangmawh ngilh loh zuapa suakin, leitung pilsinna sangte ah naupangte in “Father Abraham…” ci-in zai deih awi-awi lai ta zen uh hi.
A tano Lot leuleu in Sodom leh Gomorrah khua kihhuaite a omna, Jordan kuam na teel khial kha thong ahihna Piancilna 13: 10~11ah na kigelh hi.Teel khial lua kisa-in a zi nangawn hingtangin cikhuam suak tazen hi. Amah “Lot” mahmah zong Pasian in Sodom leh Gomorrah a haltum lai-in sih leh hin kikalah na suakta liailiai bek hi. Zulesa, nek theih dawn theih tawh kidimna, night club mei san zaizai phia ziahziah meel kilaih diamdiamna tawh kidimna, leitungvai tawh a nopciit mahmahna mun, “Jordan kuam” teel khial kha thong hi.
C2: Kum 2015 sungah teelna tamtak i nei toto lai ding hi. Topa Pasian in hong angvan henla: Teel khial…khentat khial kha lo dingin hong siam ta hen. Bang hang hiam cih leh:
Khatvei khentat khialh, kaal khat kikhom; kaal khat khentat khialh, kha khat kikhom; kha khat khentat khialh, kha kua kikhom; kha kua khentat khialh, kum khat kikhom; kum khat khentat khialh, kum kua kikhom; kum kua khentat khialh, khan kum khua kikhom! Khentat khial kha keekkeek kil kel kon! Ka Lung Dam! Pau Gin Mang
Comment piaknop aomleh...