Zomi te tungah laikhak ~ P. Lianbawi

Zomi te tungah laikhak ~ P. Lianbawi

Thumasa :: Leitung ah khantohna tawh kizui in Zomi te mun tuam gam tuam tuam ah i tung ngeingai a, mi’ pilna siamna te zong a thei a siam i tam mahmah ta hi. Zomi te dinmun kei muhna, Zomi te leh Internet, Zomi te leh kipawlna tuamtuam te ka muhna kong gen nuam hi.

Zomi te dinmun kei muhna

Zomi te pen Pasian hehpinna tawh i haksat man (or) mite i batna tawh mi gam mi lei ah i tung tek a, pawlkhat te i pil i siam man in i tung a, pawlkhat te i hai man in a tung zong i om hi. Ka cihnopna ah mi pawlkhat te pilna siamna, sumzon paai zon siamna a thei te nasep hoih ngah in sum ngahna ding lampi mu uh ahih man in gampua pusuak nuamlo uh hi. Tua ahih man in maban limci i neih pak lohna hangin i maban ding pen gamdang pai mah ahi hi.

Tua ahih man in i hai man a ci ka hizaw hi. Banghang hiam cih leh mi’ theih, pil, sim zah in pil lo, siamlo, theilo i hih man hi zaw hi. Bang bang ahi zongin Zomi te pen Pasian hehpihna tawh gamsung gampua ah $ leh gamdang sum vive i ne ta hi. Ki pumkhatna, ki thutuakna leh ki itna mah kisam pen pen lai hi. Pilna siamna zong mi te mah tawh a kikim in tampi i om ta a, mailam ah i maban pen limci mahmah hi. Zomi te zong minam pi hong suak taktak ta ding hi.

Zomi te pen kei muhna ah tulaitak pen a laklawh tam lua lai i hih man-in kilemna, ki-itna taktak apiang thei nailo in ngaihsun ing. Banghang in a laklawh ci ka hiam cih leh… Pilna lam ah en leng sangkah ngeilo tam mello, a tawp dong a sinsuak kitam lo hi. Lai Singtho kah ngei ci-in min kila leng tam mahmah ta ding hi. Thu leh la lah tel taktak lo in mi gen khat kuppih thei lianlo in tawng thei gawp sam cih dan in pilna nei i tam zawk man in kilemna taktak apiang zo nai taktak theilo in ngaihsun ing. I gen theih pak in Khalkha te bang enleng keimuhna ciangciang ah a makai te’ cih bangbang zui thei uh ahih man-in a omna na vuah munluah baih mahmah uh hi.

Banghang hiam cih leh amau a makai sang a nungzui tam zawlai uh ahih man ahi hi. Eimi te pen makai ut tam pian pahpah i hih man-in pawl kitapkhatna leh ki lemlohna piang pahpah zel hi. I theih sunsun pilna siamna te lah minam ading in zang nuamlo in eima angsung ding bek in zang nuampah pah i hih man in mitawh kilem lohna hong piangsak baih mahmah hi. Minam minpua in na asem sunsun om leng kuitung nailo pipi kisial nuam pahpah, ki mai-et leh ut pahpah i hih man-in ma tun zolo den i hi hi. Mi te hong muhna kan masa lo-in ei leh ei ki liansak masa zaw i hih man in khangtho theilo i hih hi.

A pil a siam khat om leng a omsa kipawlna, i kipat khiatna pawlpi/kipawlna puah ding zuun ding ngaihsun masa lo in kipawlna dang phuan ding kei a makai hi ding ngaihsun masa pahpah kha i hih man-in a omsa i pawlpi/ki pawlna te hong picing taktak zolo den ahi hi. Tua ahih man-in i pilna, i siamna te tawh munkhat pan ma pangkhawm leng a tuam tek in i pang kawi kawi sangin i ma vang zaw kha ding hi.

Zomi te leh Internet

Leitung khantohna tawh kizui in Zomi te zong manglai i thei kei zongin leh Zolai thei peuh leng Internet ah sawt pipi tu in pawlkhat te ading in sum tampi lutna, pilna tampi ngah behna ahih hangin pawlkhat te adingin hun tampi mawk beisak in internet pan a kitawng tawng thei te i hi ta hi. Tua bek tham lohin Zonet, Tongsan, laizom, Zomicenter cih dan mail groups tuamtuam website te Zomi te’n i nei ta a, leitungbup Zomi te i thu kizakna hong tangzai mahmah ta hi. Khantohna khat a om ciangin siatna in zong hong zui pahpah hi.

Gentehna in i Zogam(Khamtung) bangah nidang in TV, Video te a om ma in naupang te sial kisi peuh kineih, bawng vanpua peuh kineih cih dan in om uh hi. Ahi zongin tun in ahih leh TV, Video te, Cell Phone te om ta hi. Tua mah bangin naupang te amuhna uh tawh kizui in gam ta uh a, a kilai kineih, a kitawp, a kinam leh a ki L…peuh kineih in melmuhloh tongsan(Phone) tawh kiho peuh kineih thei ta uh hi. A ciing’ te uh a hoih a om hangin a hoihlo zong na om veve hi. Zomi te zong khantohna a zang khial i om zeuhzeuh ta mawk hi.

Tuamah bangin i Zomi groups leh website te zong a phuankhia, a pan masa leh tulaitak in a bawl thakthak ten zong mi’ kisel kitotna ding a, ngimna tawh a bawl uh na hisam lo ding hi. Tua ahih man-in amau hun tampi sum tampi bei in veina tak tawh a na bawl te uh kitotna mi gensiatna in i neihsak gawpgawp ciang na sa mahmah ding uh hi. Zomi sungah Manglai/mangpau, kawllai/kawlpau mite zah in a thei zong i tam mahmah a, tuamah bangin a theilo zong i om veve hi. Tua ahih man-in Zomi groups tuamtuam te ah Zolai vive mah tawh lai khah leng uthuai sa mahmah ing. Manglai/kawllai a theilo ten sim thei tuanlo hi.

Vokpi mai ah suang manpha koih tawh kibang lel hi. Adiakdiak in kei bang Zolai bekmah sim thei ka hih man-in Zolai tawh a kigelhna Zomi te groups mah lawptak in ka en den hi. Ahih hangin manglai/kawllai tawh a kigelh te ka sim thei tuankei a, na kasa mahmah hi. Tua ahih manin kei mah bangin Zolai mah lunggulh in Zomi mail a sim te nong hehpihna uh tawh manglai te manglai groups/website ah khah in, kawllai te kawllai groups/website mah ah khah leng uthuai sa mahmah ing. Tua ahih man in lai i khah ciangin Zomi te khantohna bekbek ahih theina dingin ngaihsut huai mahmah hi.

Internet sungah lai i khah ciangin zong mimal kikhak ding te mimal mail mah ah kikhak thei leng hoih zaw ding hi. Banghang hiam cih leh mite thu leh la teng a pholaak i suak mawk hi. I min te i gelh ciangin zong a kilawm kituak in ahi dan lianlian in zang thei leng hoih mahmah ding hi. Gentehna in Sia Do Kham minte a gelh kamuhna a tamzaw ah Dr. Chin Do Kham cih ahih man in amah i gen khak ciang ama zat dan amin mah tawh gelh leng hoihzaw ding hi.

Tua ciangin Sia Khen zong Dr. Khen Za Sian a cihna lah om Sia Khen acihna lah om. Dr ahih leh amin mai ah suang den leh hoih ding hi. Tua ciangin thu leh la tuamtuam i khah khiat ding ciangin zong ngaihsut masa leng hoih ding hi. Banghang ciam cih leh na thu khah khiat in mi tampi nawngkai sak maw…phattuamna pia maw cih ngaihsut huai mahmah hi. I khah khiatna a baih mahmah hangin a tunna mun ah gu zong na suak thei kha ding hi. Tua ahih man-in ngaihsut huai mahmah hi.

Zomi te leh kipawlna tuamtuam

Khanglui lai in i pu i pa te in khuakhat a sat ding uh ciangin 1. Siampu 2. Hausa 3. Siksek thei 4. Gamsung a thei cih dan in panmun tampi na nei to deudau in kikum khawm liai liai in khua na sat uh hi. Tua mah bangin tuhun Zomi te sungah zong kipawlna tuamtuam kiphuan ziahziah hi. Zomi min mah pua in nasem zong tampi i om hi. Asem takpi zong tampi mah i om hi. Internet sung bek ah a hangsan mahmah a semsem zong i om hi. Alauhuai pipi mah thei in angsung sangin itna, veina tak tawh gilkial dangtak in a sem zong gamsung gampua ah tampi mah a om veve hi.

A vui a tang mai ah, guahzu mei kai nuai ah gilkial dangtak thuak in gam leh minam a dingin lungkham a, asem zong tampi mah om hi. Lai lam ah a kiva te zong lai lam mah ah i sep theih zah in i pang hi. Pasian nasem ten zong Zomi sung mah hong vei in Zomi sung mah ah na hong sem hi. Pilna nei ten zong i pilna tawh kituak in i hih theih zahzah in i sem kawikawi hi. Tua mah bangin i omna ciat ah kipawlna pen Zomi min pua mah in hong khan dandan hi.

Ahizongin tua kipawlna te in Zomi te ki-itna, ki pumkhatna hong hi masa lo zaw ding a, i tupna i geelna hong thupi masa zaw kha ding hi. Zomi min mah pua in i kipawl ngeingai hangin i tupna i geelna te a tawpna ah i kung hong kibat kei leh a meetna om tuanlo ding hi. Panmun deihna leh min deihna bek tawh kipawlna te a phuan i hih khak ding zong lauhuai mahmah hi. Zomi min mah pua in kipawlna tuamtuam te khempeuh kizopna nei in vaihawm khawm diamdiam leng i tupna i geelna te hong tangtung baih zaw ding a, i khangto baih zaw ding hi.

Kizopna neilo kipawlna a tangtat te pen Zomi adingin itna veina anei taktak kici theilo mawk ding hi. Banghang hiam cih leh “Sialvom leh sialvom, Sial kang leh sial kang” khanglui ten na ci uh hi. Zomi leh zomi i kingaih i ki-it theih kei leh a khat zawzaw a phengphi, mi tawh kipawl theilo cihna hipah ding hi. Minam dang te in kipawlna aphuat uh ciang munkhat, phung khat pan in thu vaihawmna haksa ahih man in mundang tuam tuam ah min kibang mah phuankhia zel uh hi. Mundang ah a om uh hangin a kizopna uh pen a omkhawm mah bangin kipumkhat veve uh hi.

Zomi te kipawlna i phuat ciangin mintuam hipah cih pen i phuah tawm min mahmah deih i hiam? Makai mahmah ut i hiam? Zomi te ading in a vei takpi i hiam? cih ngaihsut huai mahmah hi. Kei ngaihsutna ah Zomi sungah kipawlna khempeuh pen kigawm khawm kik in gentehna in Zomi innkuan sung thu ahih leh Zomi innkuan, Gam thu ahih leh ZNC (0r) WZC, Zum leh hiam lam tawh ahih leh ZRA, ZRO, lai nasepna ahih leh ZCLS, Tumging leh la ahih leh ZOMUS cih dan in nam 3,4 khawng tawh vaihawm khawm ziau in hi-leng i nasepna te hong tangzai zaw ding hi.

Kipawlna tuamtuam tawh i kikhen zelzul ciangin nidang ciang i kigawm kik ding hamsa lua kha ding hi. A tung a dan in kigawm khawm thei leng i kivakna ciatciat ah kihel kim thei ciat leng Zomi i cih cih Zogam i cih cih hong pal-luun baih zaw dingin upa nei ing. Tua ahih man in “Zomi” ah ciah kik ni… Zo phualva te zong a lim a mel te uh na laih kei Zomi te sanggam melma kha zel maw? Zo phualva te zong a itna uh na laih kei Zomi te itna kiam maw? Zo phualva te zong a ngeina uh na laih kei Zomi te ngeina mangngilh kha zel maw?

Thukhupna

A tung a kong gelh thu te pen na lungsim tawh a kituak lo zong omkha mah ding hi. Ahizongin asia in na ngaihsut khak leh a sia ding a, ahizongin a hoih lam in na ngaihsut sak zaw in. Zomi te ki pumkhatna ding ka veina tawh ka hih theih sunsun in ka lungsim sung a om tawmkha hong pholhkhia ka hi zaw hi. A kilawm lo a maanlo te hehpihna tawh hong tai in la itna tawh hong hilh kik in. Kitot ka ut kei hi. Zomi te kitotna in i hun beisak ding pammaih kasa mahmah hi. P. Lianbawi