Mutpuak san pen ki mu nawnlo ~ Peter Suumpi
Hih tangthu pen adang tangthu te mah tawh kibang in siangtho in ithuaina tawh kidim hi. Laimai khempeuh ithuai lua hi. Tua khitciang hi tangthu pen zusa khat tawh kipan hi. Tua zusa ii minpen “Apuk” ki ci hi.
Apuk pen zusa vom khat ahi hi. Ahihang aman mutpuak lengthei asan khat nei hi. Tua mutpuak zawl piupiau pen Apuk in it mahmah hi. A ang ah kawi hi. Apuk in apai na peuhpeuh ah tua mutpuak pua hi. Hipen na mitkha ah bawl lecin muthei ding in kong lam en hi. Hipen Katawn tangthu ahiman in na ngaisut loh hangin amu thei ding in kong lam-en hi.
Nitak khat in tua mutpuak san pen hong mang hi. Tua ni zan pen khuazing lak ah Apuk amah guak khat tang sawl bang hei hi. Amutpuak om nawnlo ahiman in Apuk khasia hi. Khasia lua ahiman in akhitui zong luang zaizai hi.
“Apuk kap nawn kei aw … maw … na mutpuak hong zonpih ning maw. Mutpuak khat aman leh mutpuak sawm ih zongkik keh … maw …”
Agei ah awging khat in amah ahopih lam Apuk in hong phawk hi.
Aw ginna lam a etleh mutpuaksan nih amu hi. Mutpuak omna lam ah amah zong hong taipah hi. Atun ciang a etleh tua asan pen mutpuak nahi lo in simbu ii mittang na hizaw hi. Simbu pen singkung tung ah tuang ngiungeu hi.
Simbu in Apuk sam in anih un mutpuak zong dingin hong paikhia uh hi. Amau tawh akigamla mun khat ah mutpuak tawh akibang asan khat hong mu uh hi. Mutpuak san nang tua lai ah maw?
Agei ava neh uh leh tua asan pen mutpuak na hilo leuleu hi. Paaksan akiciinna paakhuan khat na hizaw hi. Tua paakhuan sung ah a etlawm mahmah vakhu lawm kingai nih na om hi. Tua vakhu te in akinoh kawmkawm un zingciang koi lam leng lengh ahoih tam ci in na ki kumkum uh hi.
Tua vakhu te Apuk gei ah hongpai in Apuk tha hong pia uh hi. “Kap nawn kei aw Apuk aw … na mutpuak san ko zong hong zonpih nung e. Mutpuak khat aman le mutpuak sawm ih zong pah kei deh”
Mutpuak zong dingin amau teng hong paikhia khawm uh hi. Apaina uh lampi gei khat ah Strawberry huanpi khat amu uh hi. Tua strawberry huanpi sung ah nitak an anelaitak toktol thum amu uh hi.
Tua toktol thum te in zong Apuk hong hehnem uh hi. “Mutpuak khat aman leh mutpuak sawm zon beh ni ei”
Tua khitciang asan agah zihziah apple kungkhat hong mu uh ih. Tua apple kung tung ah lunggam li tawh hong kimu leuleu uh hi. Lunggam li te in Apuk kiangah “lau kei in mutpuak sawm zong beh ni ei” ci in gen uh hi.
Tua bang teng tawh alampai uh hong zom uh hi. Khawlpak dih … ih na te ih sim kik deh … Simbu khat, vakhu nih, toktol thum, lunggam li = lawm hoih sawm
Tangthu sungah na khat asup lawh hang sawm ngah kik hi. Hipen a etlawm penpen le akicing penpen thukhupna khat ahi hi.
Ih nuntakna sung ah zong mutpuak san te ih nei hi. Mutpuak san cihpen in na khempeuh ih cihnopna zong hithei hi.
Naupang khat ii deih kimawlna cihpen ama ii mutpuak san ahi hi. U ngen khat ii mutpuak san cih pen ama deih nasep khat ahi hi. A etlawm ki itna cihpen mutpuak san khat ahi hi. Nang ii neih le lam na hauhna te zong pen mutpuak san khat ahi hi. Ulian khat ii thuneihna pen amutpuak san ahi hi. Khangno khat ii hatna, ngaih banna, sepzawhna zong pen mutpuak san ahi hi. Zaknop ka sak mahmah la dawng khat pen ka mutpuak san ahi hi. Ahihang hi mutpuak san te bang hun in ei kiang pan paikhia in mang ding cih pen ih thei kei hi.
Ih mutpuak san ih mansuah ciang in ih khasai hi. Lam-et bei ih kisa hi. Ih puk hi. Ih lungneu hi. Ei te sauvei pi khasiat ding kisam ahihaim? Sauvei pi lam-et bei in sauvei pi thokik zolo in ih om ding kisam ahihiam …
Singkung tung aa simbu in hite hoihtak in muthei ahileh en zong muthei buang ding hihang. Akhangno naupang te in hoihtak siangtak amuhthei nading lam ih lak ding kisam hi.
Mutpuak khat aman le adang mutpuak te ih zong zo ding hi. Simbu ii cihmah bangin … “ khat aman le sawm zonbeh ni”. Vakhu, toktol le lunggam te in zong genlai hi … “khat aman le sawm zon beh ni”
Hipen a-uphuai ngaihsutna (phylosophy) khat ahi hi. Ahi takpi ngaihsutna khat ahi hi.
Andasen agawk kitam ahiman in a awsuak lo in lasiam minthang khat suaklo hi. Ahihang thuciin tangthu gelh laigelh sia khat in leitung ah minthang hi. Peter Suumpi (Source: The Chic Magazine pan Mei zi han’ gelh)
Comment piaknop aomleh...