Joomla! ah Video, Photo, Submenu koihdanding

Joomla! ah Video, Photo, Submenu koihdanding

Dotna & Dawnna
Hihpen Zomi Daily ah ongkidongngei dotna khat hi a, ih mipih Zomi te phattuam nadingin website ah kongsuaksak uhhi. Ahihhang hihdanin “Dotna & Dawnna” te ah adongnu/pa minpen mipi theihdingin kisuaksak ngeilo dinghi. Dotnop, kuppihnop aomleh ihtheih bangbang kikum toto ni.

Dear Zomi Daily, Na website ah nisim na lutden ing. Tha ngah mahmah ing. Theihnop tampi kitheituam hi. Huhna kong ngetnop ah Joomla Website ah Video ki koici koih, Photo ki koici guan cihte theinuam ing. Tuabanah Submenu ki koici bawl gtn: ZomiDaily ii News ah Zomi News, Asia Pacific (Zolai) etc… cihdan khennuamleng  ki koicibawl cihte nong suahsaklai nadingin ongthum ing. Nong lam en ding hi-ing.
Lungdam na lianpi taktawh,
Tg. _ _ _ _ _

Dear Tg. _ _ _ _ _, Zomi Daily ah nisim nonghawhsak manin lungdam mahmah hi. Zomi Daily pen Joomla! CMS tawh akibawl ahih mahbangin, katheihngei naciangciang kongdawngkik dinghi. Mailam ahzong IT lamtawh kisai ihtheih bangbang ih mipihte theihdingin ihki hopsawn zelzelding lunggulhhuai mahmah hi.

Zomi Daily ah Video guannading in hwdVideoShare cih Component kizang hi. Tuapen hih http://hwdmediashare.co.uk panin amawkna in ki download thei hi. Na Joomla ah hih Component na Install khitciangin Setting pen ei deihdandan in kikoih theihi. Tuateng naman khitteh na Video Page ah Upload acih napanin Youtube leh Google Video te a Link bek guan ziauziautheih hipah hi. Video Files pen ihtheihsa mahbangin gikmahmah a, ahihhang Youtube pan Link tawmziau leng ih website Space phatuam mahmah hi.

Photo koihnading ahoih mahmah Component khatpen JoomGallery kici a, hih Joomgallery for Joomla pan in amawkna mahin ki download theihi. Ei Zomi sungahzong azang tampi ki omkhin a, a Demo pen hih http://www.en.joomgallery.net pan ki enthei hi. Setting pen nadeih dandanin kibawltawm theihi.

http://zomidaily.com/news ii Submenu danlian nadeihleh Menu nabawlngei Step mahbangin napai-inla, “Select Menu Item Type” acih nuai ah “External Link” acihpen natel in. Tuakhitciang “Menu Item Details” ii nuai ah Title pen “News” hipah dinga, ahihhang “Link” acihna ah bangmah gelhlo in koihin. Tua hileh Zomi Daily adanin “News” Menu tungah namek hangin bangmah suaklo dinghi. Tua “News” ii Submenu dingpen atung adan Step mahin napaikik inla, “Select Menu Item Type” > “Articles” > “Category List Layout” cihteng natel in. Hihmun natun ciangin Title pen “Zomi News” ci-inla, anuai ah “Parent Item” acihna ah News natel in. Tua hileh “Zomi News” ci-in nagelh Menu pen Submenu onghipah dinghi.

Aki telcianlo aomleh hehpihna tawh ong theisakkik inmaw. Zomi Daily website pen summet bawlna hilo in, mipi phattuam nading sumbei-in akibawl hizaw hi. Zomi te phattuam pihding lunggulhna tawh akibawl ahih mahbangin ih theihsunsun zong kihopsawnding iksik hetlo hihang. ZD Sawltak #zomidaily