Khalistan Movement makaipipa kiman kikta

Khalistan Movement makaipipa kiman kikta

Nov. 29, 2016: Zanhal zingsangin India leilu lam Punjab state sunga om Patiala khua-a Nabha thonginn (jail) sunga kikhum Khalistan Liberation Force kicite makaipipa (chief) Harminder Singh Mintoo leh Khalistan gamnuaimi nga police kineih ten thong panin na hun khia uh hi. A hunkhiate nih police puan silh in, court warrant tawi uh a, thong sungah khum ding khat hong tonpih ung ci-in mi khat khut kolbulh sa-in thong sungah va lut uh a, a pua-ah SUV car sungah a lawmte uh mi 6-7 kiim in na ngak uh hi.

Tua police kineihte thong sungah a lut khit nungun thongcingte nih luangkhamna (hostage) dingin man uh a, policete kamah heipi guan’sak in, thong tawh (key) pistol tawh kapsia in tua Khalistan gamnuami 6te va hun khia in, tai uh hi.

A kihunkhiate lak-a kihel Khalistan Liberation Force chief Harminder Singh Mintoo zan in Delhi khuapi-a Nizamuddin train station panin kiman ta hi ci-in special commissioner of police (special cell) Arvind Deep in pulak hi. Mintoo Singh’ tung panin pistol leh a tang guk leh Rs. 2000 lai thum kimu hi kici hi. Punjab police ten Delhi manawh in Mintoo hong tai hi ci-in thu hong zaksakna bangun na kigamtang a, nai 3:00 am in kiman hi ci-in Arvind Depp in gen beh hi.

Hih Nabha thonginn panin Khalistante hutkhiatna dinga kihel thau tawi (gunmen) a 10na pa Palwinder Singh (Pinda zong a kici) thudotna kinei lai hi. Pinda in Mintoo thonginn panin a kihut khiat lai-in Mintoo’ car tuanna sungah a tuang a, Nipini in Uttar Pradesh state sunga om Shamli ah kiman hi. Pinda in Matoo tawh Haryana state sunga om Panipat dong ka ton khawm uh a, tua khitin Mintoo in Delhi lam manawh hi ci hi.

More: Dahna Taangko: Syama Thian Kyin Hung @ Daw Cherry (kum 65)

#Behlapna: Nipi zingin Nabha thonginn ah hih Khalistan gamnuaimite hun khia dingin thautawi mi 10 kuan uh hi. Khalistan movement kici pen India gam-a Punjab leh a kiim (Pakistan gam pawlkhat-a lutuamte/Sikhte teenna) sung teng suahtakna dinga kiphinna neite kipawlna hi a, 1983 in India Prime Minister Indira Gandhi thahna ah zong kigolh uh hi. -The Hindu/ Thang Khan Lian