Zomi Numeite laamsang ni ~ Cing Van Kim

Zomi Numeite laamsang ni ~ Cing Van Kim

1. Numeite thupi hi
Gam khat i khantohna kitehna piciang tampi lak ah numeite le naupangte cidamna zong kihel hi. Mipi tawh kizomin nasepnate ah numeite bulphuhin sem le’ng kilawhcing zaw, kici hi.

Pasal khat guak in inn suang zo lo napi, numei khat guak in inn suang zo lel hi. Innkuan sung nopna le noplohna pen numeite tungah kinga mahmah hi. Pasal guak bek a omna, numei om lohna bangkua ah kuamah kileengla nuam lo hi.

Numeite in pasal’ nasep khempeuh phial sem thei lel uh a, ahi zongin pasalte in numei’ nasep khempeuh sem thei kim lo uh hi. Tua hi a, innkuan sungah numeite’ dinmun thupi hi.

Numeite in pasalte sangin Pasian thu sang thei baihzaw, tuhun pau-in cile’ng piangthak baihzaw uh hi. Biakna sungah zong numeite mah hong khanglo uh henla, hong thahat le-uh pawlpi bup hong lawh zo pan uh hi.

2. Numei minthang pawlkhat

Leitung ah Nurse a phuankhia pen Florence Nightingale a kici Italy numei khat ahi hi. Hih nu in, “Nang tungah hong kibawl ding na deih bangin midangte tungah na bawl in,” (Mate 7:12) cih Topa Jesu’ kammal bulphuhin a phuatkhiat ahi hi.

Christian Hymn la dawng 8000 bang a phuak zong Fanny J. Crosby a kici mittaw numei khat mah hi. Zomite in i deih le i sak mun la pawlkhat pen hih nu’ phuah vive ahi hi.

Leitung ah lamdang a kisa, a mit taw-in, a beng zong ngong napi Manglai, Piantit lai, Latin lai, German lai le Greek lai cihte siam ban ah, Radcliffe College pan B.A degree ngahin mark sangpi tawh gualzawhna a ngah lai zong Helen Keller a kici numei khat mah ahi hi.

India gam ah “Association of Charitable Missionaries” phuanin, tagah kepna 127, sum bei lo zato 213, phak zato 54 le sum bei lo laisinna sang 60 a phuan, Kolkatta khuapi sunga miphak 10,000 bang a kem zong Mother Teresa kici Albanian minam RC sister khat ahi hi.

Leitung ah “Ni tum ngei lo British Empire” a kici gam zai pen a uk ngei le England gam kum 63 sung vilvel a uk zong Queen Victoria kumpinu ahi hi. England-te in Kawlgam hong uk hun pen ama’ kumpi sep hun sung ahih manin Zomite in tuni ciang dong mah kumpi nasemte pen “Kumpinu’ nasem” mah kicici lai hi.

A beisa-in India Prime Minister Indra Gandhi, USA State Secretary Condoleezza Rice leh Hillary Clinton, England Prime Minister Margaret Thatcher (Iron Lady) cihte zong numei vive ahi uh hi.

Tu laitak lianin zong numei gam makaite sungah Germany Prime Minister Angela Macle, S. Korea President Park Grun-hye le Kawlgam pan NLD makainu Daw Aung San Suu Kyi cihte leitung ah minthang deuh uh hi.

Tu laitak leitung ah a kipakta mahmah numei khat in Malala Yousafzai ahi hi. Amah pen Pakistan gam mi hi a, kum 15 pha pan hi. Amah in Pakistan gam Taliban migilote’ khut nuai-a om numeite pilna sinna le sangkah nading a hanciamna hangin 2012 October kha sungin Taliban-te in thau tawh kap uh ahih manin nasia liam mahmah hi. Pakistan gam galkap zato ah lum masa phot a, tua khit teh London khua Elizabeth zatopi ah va lum hi. 2013 January kha-in zato tuak hi.

Time magazine in ama’ tangthu gelh nadingin US$ 3 million pia uh hi. The Kids Right Foundation in 2011 kumin International Children’s Peace Prize pia uh a, Pakistan kumpi in zong 2012 kumin National Peace Award pia uh hi. Tua pahtawina min pen Malala Peace Prize ci-in kheel uh hi. Naupang kum 18 nuaisiahte kipia pahtawina ahi hi. 2014 kumin Nobel Peace Prize kipia a, Nobel Prize ngah khempeuh lakah a khangmoipen ahi hi.

Ei Zomi numeite zong amaute mah bangin gam makai le mi minthang a suak thei lua mahmahte ihi hi. Thungen kawmin hanciam ciat ni.

3. Zomi numeite khantoh nading a dal thu pawlkhat

a) Pianken lungsim

Zomi numeite in neu tung mah panin, “Kei pen numei san khat, a thanem khat, a picing lo khat hi lel ing. Bangmah sem zo kei ning,” cih pianken lungsim neuna khat nei pah uh hi. Tua in meidawisak a, bangmah semsak ngam lo hi. Tua in khantoh nading tampi dal hi.

b) Innkuan sung kipattahna pan

Zomi nu le pate in tate sung pan ta numeite sangin ta pasalte kithupibawl zaw hi. Ta pasalte sang kikahsak a, ta numeite pen “Laipai thei peuh leh pha zo, nidang teh mi’ bangkua sung a tung ding uh hi lel” kici kha hi. Tua hang mahin khuak hoih pipi, lai zo pipite in pilna laitan nei lo uh hi. Hih in zong a khantoh nading uh tampi mah dal hi.

c) Zawn luatna hang

Innkuan sung nuntakna haksat luatna hang le zawn luatna hangin Zomi numei tampite in nikhoih, puanhoih silh zo lo uh hi. Lim takin zong kipuah, kizem zo lo uh hi. Tua in a lungsim uh thanemsak a, mi lakah kihel ding nangawn utsak zo lo hi.

d) Zo ngeina hang

Leitung ah numei a nenniam minamte sungah Zomite zong kihelkha hi. Zo ngeina ah numeite kiniam koih a, kithusim lo hi. Naungek suak khat a om teh pasal a hih leh “Pasalpi khat hi ee” kici a, numei ahih leh “Numei san khat hi” kici se hi.

Zo paunak ah zong “Numei thu le sialpi kii-in kilaam lo” “Numei khat le zabeel khat” “Numei hangsan in akpi kihta” “Numei khua le sakhi khua” cih bangin numeite nenniamna vive om hi. Tuate in numei hihna (Identity) niamsak mahmah hi.

Numei loin khang kizom thei lo napi, Zomite in khangsimna ah pasal’ khang bek mah kisim a, numei khang kisim ngei lo hi. Hih in zong numeite’ man (value) kiamsak mahmah hi.

Kikhopna, nopna dahna munte ah pasal peuhpeuh tutphah tungah kitusak hi. Numei peuhpeuh pen mipilpi khat ahi phial zongin sual tung (or) pheek tungah kitu se hi. Hih in numeite’ lungsim thanemsak a, a khantoh nading uh tampi mah dal hi.

Zomite in numeite pen makai a sem thei ding, milian a suak thei dingin kingaihsun lo a, inn sung na a sem ding, lo kho ding, sing pua ding, nau cing ding, buk teep ding, siamgan ding, cih ciang bekin kingaihsun kha hi. Hih in numeite meidawisak a, kalsuansak ngam lo hi.

e) Kiimlepam hang

Zomi numeite in pasal’ zawhthawhna (Male dominent) bekbek thuakkha (Experience) uh ahih manin amau le amau-in kimuanna (confidence) nei lo uh hi. Numeite in kiimlepam khuasakzia hangin pianken lungsim tawh gawmkhawm (Nature & Nurture Interaction) ahih manin amau le amau kineumuh den uh hi.

Kumpi lamte in zong numeite sangin pasalte hamphatna piazaw uh hi. Gentehna-in tan 10 laivuanna ah mark kikim ciatciat pen pasalte line hoih, major kipia tuan se a, numeite kipia lo hi. Pasal le numeite kideidan a, numeite mark a sangzawin kila tuan se hi. Hih in zong numeite’ lungsim thanemsak, guallelsak tuam mahmah hi.

Biakna sungah ahi zongin, kipawlna khat peuhpeuh ah ahi zongin numeite in khensatna pia ngam lo, makai ngam lo, pi ding ngam lo uh hi. Tua hang mahin numeite mun kipia phial taleh amau le amau in kimuanna (confidence) nei lo uh ahih manin hong sang ngam lo uh ahi hi.

4. Zomi numeite’ dinmun koici lapsang ding

a) Pilna le siamna sinsak ni

Paunak ah “Pilna nei numei in a inn dingin khuam sagih phut” cih om hi. Tua ahih manin numeite in pilna neih ding kitangsam mahmah hi. Khuam sagihpi i phut zo kei phial zongin khuam khat beek peuhmah i phut zawh ding kisam hi. Numeite in pilna nei peuh leh tua in lungsim le nuntakna hong laamto ziau lel hi.

Nu le pate in ta pasalte bek pilna sinsak loin, ta numeite zong pilna sinsak ding kisam hi. Tuhun ciangin tapate sangin tanute in nu le pa vakzaw, donzaw, kemzaw uh hi.

A thupi khat ah i tanute mo i khak ciangin moken dingin van manpha pipite i kengsak zo kei phial zongin pilna na kengsak le’ng amau a khantawn uh na khomzaw ding uh hi. Pilna tawh na kivak zo ding uh hi. A teekte’ mai-ah zong maipha ngah ding uh a, na simmawh ngam lo tuam ding uh hi.

Nu le pate in i tanute puankhui, khauphan cih khutsiam khatpeuh sinsak ding hoih hi. Tua hi leh pilna tawh a kivak zo kei phial uh zongin, amau le amau na nungta zo tuam ding uh hi. Tua hi leh deihloh penin a pasal in nusia vat leh zong amah le amah nungta zo veve ding hi.

Zomite in numeite kiniamkoih mahmah a, “Numei’ thu le sialpi kii-in kilaam kei,” kici liang hi. Ahi zongin numeite in pilna sangpi hong nei peuh le-uh thupi kisa mahmah lel a, numei’ thu-in kilaam lua ta hi. Gentehna-in Tedim bang ah Dr. Khin Win Shwe (General Khin Nyunt’ zi) hong pai lai-in Kam Hau tualpi ah nasia takin kidawn a, numei pasal kilam ziahziah hi. Daw Aung San Suu Kyi hong pai lai-in zong Zolam tawh nasia takin kimuak a, a kipasalsak gemgam pawlkhat bang lim lam mahmah lel uh hi. Amaute pen mipil ahih man uh ahi hi.

Zomi sungah teekte in mote thu kidong ngei lo a, papite in zong zite thu kikuppih ngei lo hi. Nu le pate in zong tanute thu kikuppih ngei lo hi. Tua hangin “Zomite in numei pongpong simmawh” kici ngei hi. A taktak pen Zomi numei a tamzawte in pilna na kinei lo a, lokho thei, singpua thei, an su thei, cih ciang bek kihi ahih manin thu dot taak le thu kikuppih taak hong kisa lo na hizaw gige hi.

Tuhun ciangin numeite in pilna sangpipi kinei ta hi. Pilna nei numeite na kizahtak veve a, na kithusim veve hi. Mote in pilna na nei peuh leh teekte in thu kidong pah lel hi. Zite in pilna na nei peuhleh pasalte in thu kikuppih pah lel hi. Tanute in pilna na nei peuhleh nu le pate in thu kikuppih pah lel hi.

Papil sangin Nupil in tate makaih zo zaw a, zong khuasuah zaw, ci-in kigen hi. Bang hang hiam cihleh pate pen nuntak zongin zinsuk zinto uh a, tate pen inn-ah nu tawh tam omkhop zaw uh hi. Nute in pilna na nei phot limlim peuh leh tate in zong pilna hong deihtuam pah lel uh a, sawlsawl zong kul se loin, amau le amau-in lai hong hanciam tawm pah lel uh hi. Pilna nei nute in a tate laisim dingin pum sawl gawp pong lo uh a, a gei-ah tutpih ngiatin, simpih uh hi.

Tua ahih manin a tate mipil, misiam suah zo uh hi. Pilna nei lo nute in a tate lai sim dingin pum sawl gawp pong uh hi. A tate in zong a nu khembawl pian thei uh a, lai sim lopi lai sim kineih khem pongin, sang lai ahi lo laibu dang peuh na sim hithiat thei mawk uh hi.

b) Numeite mun pia ni

Numeite pen amau’ pilna le kivakna (talent) tawh kizui-in mun piak theih ding kisam hi. Kipawlna tuamtuamte ah panmun piak ding kisam hi.

Thukhensatna (Decition making) le vote piaknate ah numeite kihelsak ding kisam hi. Pasalte’ khensatna bek mang den lo ding hi.

Pasal le numei liangko kikimsak ding (Gender equality) kisam hi. Nasepna mun ah pasal le numeite thaman kikimsak ding kisam hi.

Kawlgam ah a beisa ciangciang gam ki-ukna lam ah numeite mun kipia khol lo hi. Numeite pen zum nasem ciang bekin kizang hi. Tuhun ciangin nidang tawh tehna-in numeite kithupi ngaihsut zaw ta a, mun kipia zaw hi. Tu laitak lian bang MP (Member of Perliament) sungah numei tampi mah kihel hi. Tua bek tham loin Vuanzi (Minister) sung le Vuanzi huh (Deputy minister) sungah numei pawlkhat hong kikoih ta hi. Hih zong a thangahhuai thu khat ahi hi. Gam lutang taktak dingin numeite hong koih mawk tam, cih pen kigen thei nai lo hi.

5. Numeite thapiakna

Ka sangkah lai-in kipawlna khat ah panmun kiteelna om hi. Makai khat in, “Pawl lutang dingin numei hileh a thukim teng in khut lam,” hong cih ciangin numei tampi om napi, khat bekbek in a khut hong lam hi. Hih pen numeite sungah a muan taak om lo zong hi thei kha ding hi.

More: Genloh a phamawh ta thu ~ Cing Van Kim

Zomi numeite in i lungsim i niamsak loh ding kisam hi. Mun hong kipiak theih nading le hong kilapsang theih nadingin eimah mah zong mun a piak taak, a lapsang taak ihih ding kisam hi. Midangte in hong hehpih, hong neubawl ding sangin thu hong kuppih ding lunggulhhuai zaw hi. Cing Van Kim