Zomi leh keimah ~ Lengtong Pauno

Zomi leh keimah ~ Lengtong Pauno

Kapian’na kapa pen laithei laisiam miminthang ahihloh hangin, amakhomin biakna pawlpisung, veengsung, khuasung, namsungte ah upa makai vaihawm lakah ana kihel kawikawikhat ahi hi.

Ka khuatheih tungpan kipanin kanu le kapa in, thukhat genin kamkhat pau leh ei’ ZOMI te cingiatngiat tawntung uhi. Vok 2 kakhawi uhzong khat Zovok hi a,khatpen saivok ahi hi. Aktampi kakhawi lakvuah alui gol mahmahkhat mangak ci in, akdangte khempeuh Zo ak ahi uhi.Zo akpi te’ tui zong, Zo aktui hipah hi.

Vogo, akgo le ung zong, asateng beelpi khatin ka Zo sahuan uha, aminciangin Zokuang sungah thukin, Zokeu zangin Zo sahuan pen Zo saneekin Zo inn sungah ka ne uh hi.

ZOMI hihna tawh piangin, ZOMI hihna mah tawh ka khanglian toto a, Pasian thupha hangin, ka Upasal tenih Rangoon University ah sang hongkah ciangin, ka U neuzawpen, la na uuk bilbel in, Zohun icihcih(BBS)pan la hongsa zelin, ka makpi’pa uh’n Radio golpi khatnei bilbel e maw. Zohun, Tedimte’ lathak paini, Friday nitak nai 6:30pm liana behlephung ulenau sanggam deihsak neekngaihteng, khuazang dektak phiala, ka UThawngkim lasak ngailuadinga, nak ngamlo lianga tu dimdiam 😁

A radio sungah amah a omdingsa hilai kai’vevua maw.Ka nu zong omlai aive tua in.

Tuapan keizong ciingtosuak pahin, kum 16. kaphak laitak, 1978 kuma, Tonzang pan, kakhua Tuithang ka lawhna “Mualdawn’ vangkhua” cih thulu tawh, ZOMI in kei kapiang, ZOMI bang ka nungta, ZOMI bang tu in la kasa, ZOMI in keika siding hi, cihla ka phuak hi.

Video: Lengtong Pauno ~ Zomi ka hihi @ Zomi Nam Ni 2017 Malaysia

https://www.youtube.com/watch?v=wvow0ihWT8Q

1983 kum leuleu ciangin Zangkong ah, ZOMI KAHI HI cihla kaphuak leuleu hi.

Tuahi a, ZOMI pen kei adingin kapian’pih ka nuntakna kasisan, ka khan’liatpih hi a, kalaih kakheek ziauziau theidingin vankhat peuhpeuh hilo hi. Puansilh niikteen’ hilo hi. Khedap lukhu hilo hi. လူမႈေရး၊ စီးပြားေရး၊ ႏိုင္ငံေရး min khatpeuh zong hilo hi. ZOMI LEH KEIMAH akici kahi hi. Midang kuamah mawhsak cihbang anei hilo hi ing. Leitungbupa Zomi khempeuhin anial zongin, …. ZOMI kahihna ka nialtheikei hi.

ZOMI IN KEI KA PIANG, ZOMI IN KA SIDING HI.

Ka lungdam.
Munkhai’pa (Siansikpu)