Zomi COVID-19 Response: Makaipipa Report

Zomi COVID-19 Response: ZCRC Makaipipa President Report

Thuneite tawh mapanna

Kumpi thuneite tawh kikop in Kalaymyo khua sunga, Isolate te le duty lut siavuan siamahte, Quarantine te le duty lut siavuan siamahte nek le dawn ding nikhat in thumvei ta kipuak puak den a, ni 7 kipuak khin ta hi. Eite tangin ong kipiakhia a gamtangte siamsin le mimal khempeuh zahtakna i pia hi.

Khai Kam gate buaina

Tu ni zingsang lamin Sagaing le Chin state gamgi, Khai Kam gate ah buaina lianpi khat piang hi. Kalaymyo lam gate thuneite in kuamah lut sak lo in a pusuak bek phal uh hi. Tua bang a pusuak bek phal in a lut a phal loh ciangin Khai Kam lam thuneite in zong kuamah sungtum pusuak sak loin a nih un khak cip tuak uhi. Hih bang hangin mipi sat suah in a buai semsem ciangin ZCRC pan Lawm Zam Thuam le Lawm Andrew Thatuang in mipi kho in thuneite tawh va kiho uh a, si san nai san suak loin vai khempeuh lem in gate hoih takin ki kan kik thei hi.

Antang hawmna

Kawlpi le khai Kam khua sung Lockdown te lak inn 49 tung antang ip lang ta kipuak hi. Antang pen U Thomas khanno tung pan hi hi.

Volunteers camp

Hun dang bang nawn loin volunteer nasep pen lauhuai lua mahmah ta hi. Amaute le a innkuanpihte bitna a om theihna dingin camp lut in innkuanpih tawh kizom nawnlo dingin kigel ta hi. Camp A pen ZSYO zumah kihong hi. Akisap leh a hun zui in Camp B zong Bishop phalna tawh Thuka Meedaw clinic ( Royal City mai )ah kihong ding hi.

Mipi adingin galmai samai ah hangsan takin a gamtang volunteers ading tuisiang, vanzat a kipan, nek le dawn ding a pia nuam te in ZYA zum le lawm Kim Tuang tungah kipia thei hi. Liantuang (President, Zomi COVID-19 Response Committee, April 21, 2020 (7:52PM)