Zogam leh Zomi Pharaoh le David

Zogam leh Zomi Pharaoh le David

Zomite occupation zui in eiteng mah ki classify tawm hang a, tua class tuamtuamte’ kikal ah pankhop sepkhop theihna cooperation thanem mahmah hihang.

Amun amual leh a thu ala zui a, nasep panmun i classify theih a, a mite in cooperation i siam ciang tuni a i nuntakzia tawh tampi ong kilamdang ding hi.

Tuma kum 3500 lai in Egypt ah Pharaoh in Joseph thong innpi sung ah khumkik lo ahihman in Egypt gambup kialpi pan suakta hi. Kum 3500 khit 21st century ah Zomite Pharaohte in a kisap ciang Joseph deih napi, a zatkhit uh ciang thongsung mah denna kik zel uh hi.

Zogam kialpi pan suakta lo ding a, a nim dildial etlawm mualkuam teng gam gawtak sehnel gam suak hak nawnlo ding hi.

Kialpi kipat ciang Joseph i khahkhiat hang kum 7 sung kigin hun ngahlo ding ahihman in Joseph in zong bangmah semthei nawn tuanlo ding hi.

Kumpi David in a gammi a simsak pen Pasian’ deihna hilo a, tua a khialhna hang in ni 3 sung pul natna tung in, a gammi tul 70 in sihlawh uh hi. Makaipa’ khialhna a mipi in thuak mikmek hi. Kumpi David kisik mahmah a, Pasian’ kiang ah “hih mite in bang semkhial uh ahi hiam?, akhial kei mah hilo kahi hiam?, hih mite’ tung ah thu khen nawnlo in, akhial keima’ tung ah thu ong khen in..” ci in Pasian kiang ah thuum thei hi. Zomi Davidte in khialhna nangawn ah amah le amah ki diktang sak, ki justify in a mipi mah mawhpaih niloh lai uh hi.

Makai i cihte in mipi’ tung a aneih a tawan/mawhpuak bangzah a lian hiam.. cih limtak ngaihsut huai mahmah hi.

Telkheh masak huai

Lim leh maan bek enlo in, lai tawmtawm sim leteh a, na laisim pen Zolai bek hi zawzen lo in, Kawllai leh Manglai tawmtawm hileh thu khatpeuh na tel dan, na ngaihsutna, na thu ngaihsut zia leh na lungsim puak zia kilamdang ding hiven..

Mi’ gensawn zaksawn bek tawh thumong bek kiza. Thu theihna ding leh telna ding in, mit a muhban ah a pamdeuh etbeh kisam a, bil a zak ban ah sinbeh, simbeh, kanbeh kisam hi.

Mi’ gensawn zakkhakna bek tawh kawkek pah huailo a, tel masa lopi tangko huailo hi. Thu khatpeuh i gen ma, i tangko ma in kanhuai, sim huai, sin huai, telkheh masak phot huai mahmah hi.Tello pi a upmawh ahih leh ei’ ngaihsutna, ei’ upmawhna, ei’ theihdan ahih lam gen hamtang hoih hi.

Pasian’ nasepna leh Minam vai ah

Zeisu it mahmah a, a sawlbang mang in Kha mangthang a vei Sia leh Siampite in upa mipilte tawh khut kilen a Pasian’ na ong sep khop a, gam le nam makaite leh kipawlna tuamtuam makaite in ong domsiam ciang Pasian in i lak a om nuam ongsa in, minambup Pasian’ nasepna lawhcing mahmah ding a ..

Zogam Zomi a vei taktakte leh mipilte khat le khat kizahtak siam leh khut kilen thei a, Biakna sia siampite in a domsiam ciang Zogam paallun ding hi.

Hih tegel ama’ mun ciat ah i gualh theih a, i koihsiam ciang Pasian’ thuneihna nuai ah Zogam hong paallun ding hi. Pau Khat Suan