Zogam akicih theihna dingin ~ Pau Do Lian

Zogam akicih theihna dingin ~ Pau Do Lian

Thumasa: Theologian khatin politic, gamvai gending cihbel asimten thangah huailo leh gam makaite theihzahzong theihetlo khading hi. Ahizongin midangte nasepsa critic piakkhawng asemlo tepeuh kivazaw thei leh ihseploh khatpeuh ahoih leh ahoihloh na kimutel theizawsop hi. Tua ahihmanin, ‘gamvai’ ah mi gamdangte bangci kivaipuaka bangci bangin gamkhat ngahthei hiamcizong etkul kasa hi. Tua ahihman in Zogam ihcih hangin Zomi te ten’na ahih man hi a, Kawlgam gamlim (map) sungah a omte ihihi. Kalungsim ah hongsuak leh keimuh natantan tawmno khat hongkum nuam ing.

Zomi bulpi

Ih minam mintaktak tuciangdong atelthei lo ki-om lai a tuate adingin themno khat genkul kasa hi. 1825 hunlai in British in Rakhine gamla (invade)in southern Chin state lam ate amau leh amau, ‘Khyang’ kici-uh cihi. Burmese ten’ Chindwin valley a om, Tibet lampan hongpaisuk ‘Seng’ apuamitetawh kihothei lo uh a, ‘Seng’ –(Basket) puate acihna un kawlpau in “Chin” te naci uh a, tuapen Rakhinete’n amau awkaih tawh, ‘Kyang’naci uh hi cih, Bertram S. Carey leh H. N. Tuck te in 1850s nacimateh uhhi. (Cary & Tuck, The Chin Hills, 1896:3).

Chin Hills sung ah sawtvei pitak Zomi te khuasakzia hongkan’ prof. F. K. Lehman, (prof. of Anthropology, Univeristy of Illinois) in agenna ah hih minamte namkee tampi om a, avekpi in nampi khat akicih na uh, Zo, Yo, Yshou awkaih tawh amau kisam uh hi (Lehman, The Structure of Chin Society: 1963:244). T.H. Lewin, British Deputy Commissioner, Chittagong ah om-a tangthu laibu in agelhna-ah, “Khozing” –(Khuazing) abia uhi ci in ciamteh a biakna leh ngeina kibangkhat pan apiang cihna hi. (T.H.Lewin, Wild Races of South-eastern India, 1870:239-240). “Chin’ cihkammal hangin telkhialhna tampi om hi. A original kammal pen Chin hilo hi.

Tibet lampan a hongpaisuk, Sengam (China) ah tawlpikhatsung akhuasa te, Sen (Chinese) ten’ “Jin” or “Yen” “mi” ci in nasam uhhi. Bang minam hiamcih tello uh a, ‘mi’ “Jin or “Yen” in naciamteh in tuapan in Kawlte’n a awsuah kibangdektak khatin, Chinin navawh uh hi aci zong om hi. (Carey & Tuck: 3). Ei leh ei ihkisap naleh Mikangpil te in hongciapteh na uh, ‘Zo’ ‘Yo’ pan in kipialkhia theilo hi cihpenkibul muh lua mahmah hi. Lian Hmung Sakhong in, “In Search for Chin Identity” a Ph.D. dissertation in gelha tua ah, ‘Chinlung” ‘cave” suanghawm pan akipan te hi hangci in thukhup na nei hi. Tua ahih man in, “Chin” terminology pen Seng (basket), lawm (Tangechin-friend), Senpau ‘Jin’ ‘Yen’ –mi leh kuahawm cih tengpan akingah kammal ahih manin ihpian khiatna ‘min’ hilo limlim hi.

Zogam omna mun leh mual

Gamthum, “Myanmar, Bangladesh, India a om Zosuante gamkhat adinzawh nadingpen apiangthei dingthu ahihhangin haksa mahmah ding hi. Thakhat thu-in tua gamthum pan a Zosuan te kikaikhawm vat a gamkhat adindingpen kumpi thum tawh kizom ahihman in ollo ding hi. Tua ahihman in Kawlgam a om Zosuan te kagen nuam deuh hi.

Kawlgampen Galkap ukna sung akhangkhia hi-a, pilnazong amau khutnuai panmah sinto ihih manin Zomi tampi takinzong Kawllung sim kinei veve hi. Galkap thuneih natawh kum 70 bang aki-uk hi a, tua galkapte ukna (Thein Sein & Suu Kyite khutnuai zong galkap mah in thunei zaw) ahih man in Zogam gamkhat adinding cihtha dah, ‘Zogam State’ ngahzawh nading zong, ‘Sakhi manlo Ngaltang’tup’ cih dan hong hidiam cihnop huai mahmah hi.

Amasa in Zogam/Zomi in kuanteng huam a kuatengin dinpih cih ihtheih ding leh tuahuamsunga omtengin ih ‘vision’ ihkalsuan sawmna hongtheihpih photphot ding kisamhi. Zomi/Zogam sung nangawn ah Zomi sangin Tedim hileh lemzaw inteh acitawh, Chin hileh mailam mavang zaw-inteh aci akipan ihmakaite mahmah pan kitel cianna omphotphot ding hi. Atunga Mikang mipilte in literature (Lai) ihneihma peka anagelhte-uh enleng Zosuante ten’na zaimahmahhi.

Gamthum sungah kikhente kigawm kikding cihtha dah gamkhat (Kawlgam) sunga omteng bek lawngkhat in luankhawm leh deihhuai mahmah hi. St. Hau Go in 1950s a ZBC/A hongngah khiatpih napen Zomi cihkammal a revive (hingkiksak) hi a, tuama pekin (-1800s) anthropologists, Lehman, Banks Pendleton, leh British galkap mang Carey, Tuck, Lewin te in laibu volume tawh nagelh khin uhhi. Pu Vumson in, “Zo History” sungah kicingtak in research abawlna ahzong atunga Mikangte muhna mahtawh (spelling pawlkhat akibatloh hang) kibang hi. Hihte sangin akicingzaw khangthakte in research abawlzo omnailo hiphot hi.

Namdang te’n bangci!

Kawlgam sunga om namdangte’ lakah ‘Behte’ ‘Kachin’ te ahih leh ‘state’ khatbek a dinsawm hilo in ‘gam’ ‘country’ khata adinsawm leh adingzo dekdekta uh hi. Amau nasepziate pawlkhat, kasangkahpih Myitgyina a om, KBC ah nasemkhat leh KIA lam ahzong kizopna aneikhat tawh nainih sung ka kiho nate pan tomlak na hidan ahi hi. Amahpen politic ukmi ahih man in, sia aw no Kachin te’n bang ngimna tawh KIA/KIO in hizahin Kawlte do nahi uhiam? Kacih leh, ‘No Chinte’ hongci in ‘awih khol oh’ Chin leh Zomi kibanglo hi ci in definition kapiak khitciang, CNF/A te ci in honglaih a, CNF/Ate ko’ Kachinte’n khialkasa mahmah uhhi. Amau NCA (Nationwide Ceasefire Agreement) ah letmah thuh in thautawi nawnlo dingin thukim mawk uh a’ thautawi lo in bangcibang kivengzo mawk ding? Gamkhat bangci a suakzo peuhmah ding?

Tuamun lian ah Chinte khial lian hi’ ci-a tua ahih leh no Kachin KIA/O ten’ gamkhat adin dingsawm maw? Kacih leh, ‘Kobel gamkhat adin dingin a ready ta hi ung’ ko KIA pen picing mahmah ta in no Zomi te hiam amintel kei ing in Chin State lampan mihing 200 bang ko KIA ten’ training apiaklai tak hi a, Naga, Kuki akipan India lamte bang abeisa in kokiang pan in tentan a ong(pass) vive hi uh hi. India bangpai le ung amau hongna dawn in security honglaksak uh hi’ ci hi. Kopen gamkhata dinsawm kahihman un structure or system ciding ihiam akicingta hi ung, Thaubawlna set zong kogam in neita, a’ ARSA tebang ko kiangpan tukim teng hongnak leipeuh mah uh ci hi. Adang sumbawl (currency) thohdan ding zong idea omkhin ta hi’ ci hi.

Dotna: Tua ahihleh hicibanga nalawhcin na uh bangci bangin panmun nala uh hiam? Kacih leh: Alah tuapen key point hilian ei lawm, abeisa kumtampi sung KIA/O makai ten’ biakna lam makaite thupisim lo in amau ukna nuai ah koih’ utut sawl, hih giapgiap uh hi. Ahizongin nungkum sawnlam (2011 khit) Kawlgam kapte’n hongnak do lua uh a, mipi inzong thuak lua kahih man un biakna makai pastor te in thu hong ngeksak, tha hongpia in hongpan pih uh a, adiak in Kachin Baptist Convention pan in damdam in KIA tawh khuthongkilet takciang minamsung makaite himawk ahihcianga amau teng khut hongkilettak teh’ Kawlgalkap te’nzong hongzo nawnlo hi.

Amasa in bel Pasian ompih na hi in anih na ah kipawlkhopna hi. Bektham lo in KBC leh KIA/O te pumkhat hongsuahtakteh Kachin mikhempeuh pen KIA hipah lian hi. Tua ahihcianga tun’ vaikhat hawmding hileng KIA/O makaite leh KBC te kikum diamdiam in kahih uteh kama uh hongpai mahmah a, kobel asawt lo in gamkat in hongding ding’ hi ung na en in’ hongci hi. KIA te’n Kachin gamsungbek hilo in state dangte ahzong camp behlap ahih lamzong pulaak hi. Kayah state a INGO nasem in kum 5 ka omsungin KNPP te leh adang Insurgent group 5 tetawh zong development nasep na hangin khatveivei kimu thei ing ahizongin, KIA te a etkaakna pen kicingsa ing.

Zogam/Zomi bangci lawhcing ding

Kipawlkhop nalotawh kilawhcing ngeilo dinghi cih lungsim sungah koih photphot ding ahi hi. Sanggam ‘Chin’ lamte zong CNF/A leh CBC/A nasemkhawm uh ahihman in anasep uh picing dekdekta hi. Ahizongin KIO leh KBC kipawlzah in kipawl zonai lo uh ahihman in leh makai lampan zong kibang zolo hiding hiam nasep na KIA tetawh bel kikhai laimahmah hi. Ahizongin ‘Chin’ lamte in nakhat asep uhleh midangte’ sepsangin amau leh amau kipanpih ngam mahmah uh hi.

Zomi te adingin ZRA/O (adang a omdiam thei kiang) tebek mah ih muan ihsuan, ihlam etna ahi uhhi. ZRA/O aizongin adang (Zomi sungah minam vai ading) te leh ZBCM/ aizongin Biakna lam makai te khempeuh hoihtakin khutkilet khawm leng’ lawhcingzo ding hi hang cih’ sanggam ‘Kachin’ tetungpan in kimu thei hi. Kawlgam ukna sunga omtuak leh Christian upna neituak ihih man in ettehding tampi omkha ding hi.

CNF/A te in thautawi napan akhawlna uhpen, ‘Kawlgal kapte nuai ah aki-ap hi a, amaucih bangbang mangding cihna hi. Kachin te’n ahihleh ko gamkhat adin sawm kahih man un galvan, pilna, sumzonna, khuasak nakhempeuh akicingin koleh ko neita hi ung; tua ahihman in kawlte khutnuai ah ki-ap a NCA letmatthuh dingpen kua utding hiam? Acih mahbang vua ei Zomi makaite in ih Zogam State khat ading ding lahci ci napi’n bang strategy sawm uh hiam cihzong atheih nop huai mahmah thu ahihi. Kei mimal kahih leh, ‘by discipline a theologian & missiologist’ politician hilo kahih man in athuklua intello kahih teh atungtham ciangbek mah hongkup pihthei ing. Kachin siapa gen na ah, abeisa in KIA in minau tangte neihsa deihbang a laksak, vok leh ak akipan adeihbang unla uh a, mipi in itzolo himah leh tuabang lungsim pan in hongkikhel uh a, mipitawh ma hongpan uhteh mipi in itbek thamlo in Kachin khua khempeuh pen KIA vive hi acihmah bangin ei Zomi tenzong ngaihsut huai mahmah thu hongtheisak hi.

Thukhupna

Zosuante phungpi research na leh Zomi leh Chin kikal ah a om pawlkhat te’n theih ding deihsakna ahizongin, lawhcin nadingin biakna lam leh gamvai makai te khutkilet kul ahihna keimuhna tantan kong hawpsawn ahihi. Thautawi lo-in gam khat dingzolo ding himah leng tawisiam mahmah kul ahina zong ihphawk ding ka ut hi. Thupi te-in, ‘biakna leh gamvai khutkilen’ Zomi ihihna tawh nasem leng mavang ding hi. Veinabek tawh! Pau D.Lian