Talphut pawl leh lehngatsan pawl pangkhawm le’ng
(Opinion) – Mi tampi in CDM nakpi hanciam ahih hang khutkuak dim khat lehtat lehpan nuapnuap niloh ahihman in mipi kengsiah tawh kibang a, khang kilumlet ding nasep hanciamna nawngkai sak mahmah hi.
Hausa leh Inn 10, inn 100 uk khempeuh in Misokte nungngat san hileh amau ukna za nei a kisak mahmah uh hang mipi tawh kizopna bei in, mipi tung a thuneihna bei ding a…., Kumpi zum nasem khempeuh zum kah nawnlo lian hileh bangmah semthei nawnlo ding uh hi. ( i theihsa ciat ahi hi).
Tuhun khuahun zui a mipi in CDM ah pan a lakna ding leh a thahatna ding a a septheih a lianpen leh a muibun pen in thau tawi a avui atang tawh langdo pah sang “Social punishment” in bunzaw thei ding in ka um hi.
Banghang hiam cih leh tulian laitak mipi khenpi 2 in kikhen a, CDM pawl leh misok pawlpih khutkuak dimkhat pawl ahi hi. A tawmzawte’n zum le hiam nei uh ahih man in, a tamzaw (supermajority) in thuak teetaa a nakpi tak nan’ tentan a kul ong suak hi. A hunhun in, a munmun ah guallel zaw thei zel tawh kibang hi.
Tua ahihman in, CDM pawl peuhmah in CDM lo, misok tawliak peuhmah leh uihai no honvak peuhmah mun khempeuh, vai khempeuh ah uipi sangsia vak bang in pelh pah, tuam koih pah, nungngatsan pah, nawlkhin pah, lehngat san leuleu pah lelnawk hi lehang sawtpi thuak zo tuanlo ding uh hi. Amau koi ah buu a, koi ah kisel tuan ding uh ahi hiam? A mipih sapih, a sanggam u le nau lo tawh koi ah nuamsa tuan ding uh ahi hiam? A sawtlo in mipi mah ong pawlpih uh kul lel ding hi.
Kiciam keei a, kipawlna khawng bawl keei a kul leh a kisam zong hi tuanlo a, mipi in lokhawh singpuak nasep maban khawlpah keei a kisam zong hi masa tuanlo lel hi. Kal kibang a suankhawm ngelhngelh ding kisam hilel hi.
CDM a utlo leh misok tawliak peuhmah mipi lak ah a ut zah paupau sak in, a hihhang ama’ thugen peuhmah kuaman ngaihsak lo, kuppih lo, thusim lo in om hi lehang tua sang a nuntak nuamlo zaw leitung ah om nawn tuanlo lel ding hi. Nuamlo mahmah ding hi. Ni khat ni nih bel thuak zo kha ding uh hi. Kal khat kal nih ciang thuak baih nawnlo ding a, kha khat kha nih sawtlo in ak-ek kawi suak mang lel ding uh hi.
Tun bel ahih leh Zum le Hiam tawi a talphut ding hanciamna pawlkhat om ta ven, mipi in amau tawh i pankhopna in social punishment movement lam na hanciam lehang hoih leh muibun ding in ka um hi. I lunggulh i lam-et i sunmang ong tungbaih deuh tuam kha ding hi. Pau Khat Suan
Comment piaknop aomleh...