Kum zalom 21 Panglong khawmpi ah Ban Ki Mon

Kum zalom 21 panglong khawmpi honpawi ah Ban Ki Mon pai ding cih kilimgen a, kawlgam mipi lawp mahmah
2016 August 31 – 4 September sung kibawl ding Kum Zalom 21 Panglong khawmpi Honpawi ah UNO – General Secretary Ban Ki Mon pawisim paiin thugenna nei ding hi ciin President zum Dy.DIrector – General U Zaw Htay in AFP news ah August 22 ni gen a, Panglong khawmpi ah kisam a, athucing bel kician nailo hi ci hi cih thu kiza a, Kawlgam mipi lawp mahmah hi cih thu kiza hi. UNO – Secretary General Ban Ki Mon paina hangin UNO in NLD kumpi amuanna leh UNO in kilemna athupitsakna leh leitungbup in Kawlgam alunglutna dingin asepna hi cih kilang hi ciih kigen hi.

KNU makai Pado Saw Kwai Htoo Win in zong ama thugen ding ni akician lian ahih nailoh hangin hong pai ding cih kician ta hi ciin gen hi. Hih khawmpi ah NCA laibawl hi taleh, laibawl hi takei leh, kihel thei dinga, TNLA, AA, MNDAA pawl 3te zong kihel thei ding a, bang munte kamkum thei ding hiam cih khensatna kician om nailo hi. August 31 ni kipan ding Panglong khawmpi pen ni 5 sawt ding hi ciin kitangko hi cih thu RFA in gen hi.

Galkap lam tawh kinaite genna ah Kalgambup Galkap manglianpen Sr, Gen. Min Aung Hlaing in Panglong khawmpi thubulletpi galdo tawpna kilemna NCA lai ah minam thautawite kihel kim dingin kilam-en hi. U Thein Sein kumpi hun sungin 2015 kumin minam thautawi 21 lak ah 8 bek kihel hi. Galkap manglianpen in AA, MNDAA, TNLA minam thautawite NCA ah kihel ding khaktan a, kumpi ah thau apsiang ding kal masa ahih manin minam thautawi 8te simloh in NCA kihel ding nial uh a, minam thautawi khempeuh kihel ding ngen uhi. NCA ah vekpi kihel ding kilunggulh a, NCA lo tawh Political Dialogue kinei theilo ding hi ciin galkap lamte khat in gen hi.

UNO – Secretary General Ban Ki Mon mai ah minam thautawi khempeuh in NCA lai bawl ciat hileh 21 Panglong Khawmpi kipan thei ding hi. Tu laitakin lam-etna lianpi tawh khantoh lam kimanawh hi kic thei hi. DPN makai KIO galkapmang Brig.Gen. Gum Maw in, ” KIO in NCA laibawl ding atamzaw thukimna hi, ahi zongin bang hun hiding cih kician nailo a, NCA lai bawlphat leptuah ding omlai hi ciin gen hi. UNFC member 7te in NCA lai bawl ding lam ah kipuk zaw hi ciin PNLO makai Col. Khon Okka in gen hi. UWSA (Wa) leh NDAA (Mongla) minam thautawite in 1989 kum kilemna lai akibawlsa hiin bawl kikkik kullo ding hi ciin gen a, hih pawl 2te China (Sente) thapiakna tawh NCA ah kihel thei ding hi.

State Counselor Daw Aung San Suh Kyi in Panglon gkhawmpi honpawi ah minute 10 thugenna nei dinga, kikupna leh dotna kineisaklo ding hi. Akipuak thusunnate Joint committee leh Working committee ah kikup dingin puakzaw ding hi. Union Peace Conference pen kha 6 sial khatvei kibawl ding a, State vai, Tualsuak minamte vai, sangpilna, Khuahun gamlei vai kikum ding a, politics, Security (Gamhutna), Social, economics leh leitang vai phuahphatna working committee 5 tawh kisem ding hi.

Hih committee ah kumpi ,galkap, minam thautawite leh political party kihel ding hi. NCA laibawl nailote hih committee ah kihel thei nailo ding hi ciin Kamayut media ah kisuah hi. Pawlkhatte genna ah Bamar state – mandalay, Magwe leh Pagu hiding a, minamte state – Sagaing, Yangon, Irrawaddy leh Tanintazi – state 4 leh minam state – Kachin, Chin, Shan, Kaya, Kayin leh Yakhine – state 6 kigawm Kawlgambup state 11 tawh khen dingin kigeel hi aci om hi. Ahi zongin Wa, Kokang, Palaung, Naga leh Pao, Lahu cihte leh adang angen omlai leh koici bangin hong piang ding hiam cih kigen thei nailo a, state 20 val aphak mel zong kitel nailo hi aci zong om hi.

Zomi Times