Indonesia gamsung ah mi 189 atuanna vanlengkhat kia, anungta kimu nailo

Indonesia gamsung ah mi 189 atuanna vanlengkhat kia, anungta kimu nailo

Indonesia gamsung panin Lion Air kici mi 189 atuanna vanlengkhat alenkhiat khitzawh asawtlo in tuipi sungah kiasuk cih Reuters pan kiza hi. Tua Lion Air pen tuni Monday ni in Indonesia gam ii khuapi ahi Jakarta City panin alengkhia hi a, Java Island nawllam aom tuipi sungah alenzawh asawtlo in akiasuk ahihi.

Tua vanleng number pen JT610 kici a, vanleng akiatlam akitheihphet in Indonesia’s Search & Rescue Agency te’n anungtalai khatpeuh aomkhadiam ci’n azongding in kipanpah uhhi. Tua vanleng pen Airport panin alenzawh Minute 13 khitciang in Control Center tawh ki thuzakna kitat ahih manin, tuaciangin atuahsia ahihlam kitheipah hi.

News Conference ah makaite genkhiatna ah tua vanleng sungah mi 189 atuangkhawm uh hi a, tuciangciang anungta khatzong ki mukhia nailo hi ci’n genkhia uhhi. Vanleng sungah atuangte lakah khualzinmi Passenger pen akigawm in 181 pha uh a, vanleng sungah nasem Pilot leh Crew pen mi 8 hi in, akigawm in mi 189 atuangkhawm uh ahihi. Passenger te lakah naungek “Infant” 2 leh naupang “Child” khatzong kihel uhhi.

Indonesian Finance Ministry te pulakna ah tua vanleng sungah azuikha pen amau Department panin atawmpen mi 20 bang phading hi ci’n genkhia uhhi.

Tua Lion Air vanlengpen zingsanglam 6:20am hunpawl in alengkhia hi a, Bangka Island aom Pangkal Pinang ah naikhat khitciangin atuding in alengkhia ahihi. Ahi zongin apainading amun tungmanlo in, alenkhiatzawh Minute 13 khitciangin akiasukpah ahihi.

Video: A Lion Air plane carrying nearly 190 people has crashed in the sea off Indonesia, shortly after taking off from Jakarta. Search and rescue workers have found debris believed to have come from the plane.

Tua vanleng sungah zatding in akipua Life Vests pawlkhat leh Passenger te ii Handphones pawlkhat pen vanleng akisiacip ii ageinai ah ki mukhia cihzong kiza hi. Tuisunglutsiam te’n tuisungah lutsuk in azon kawikawi laitak uh kici hi.

Airline Company te’nzong agenkhiatna ah hih atuahsia vanleng pen August kha in aki zangcil hi in, aki zatzawh kha 2 khawngbek aphapan hi ci’n genkhia uhhi. Chief executive of Lion Air Group Edward Sirait in agenna ah tua vanleng pen abeisa in aset asiatna Technical Problem omngei himahleh hoihtak aki puahkhinsa hi ci’n genkhia hi.

More: Update: Mi 113 atuanna Cuba vanleng kiatna pan mikhat bekbek nungtalai

Abeisa in Denpasar (Bali) leh Cengkareng (Jakarta) kikal alengzelzel hi a, Technical Issue aom hangin Procedure zui in hoihtak ki puahkik in ahoihkik ci uhi. Tua ahih manin hih vanleng atuahsiatna pen banghanghiam cihpen kagenkhiathei naikei uhhi ci’n thunei te’n pulakkhia uhhi.