ZCRC nasepna le mipi mailam ding ahuampi thusunna ~ Lian Tuang

ZCRC nasepna le mipi mailam ding ahuampi thusunna ~ Lian Tuang

Tedim Tonzang Cikha ah khangham kum 80 tungsiah pilepu 300 val om a, Tedim gam huam bek ah naupang kum 10 nuai 19000 val om hi. COVID-19 hun sung le COVID-19 khit ah amaute lungsim pumpi a cidamna dingin pen mipi mahmah in nakpi takin tha I san mahmah ding kisam ding hi.

I theih sa tek mah bangin COVID-19 ong kipat ciangin akua maciat kilung hi mawh in, ei hih theihna tek pan mipi ading ma kipang ciat hi. Zogam le a diakdiak in kawlpi mahmah ah positive ong kibeh lap tohtoh ciangin mimal tha tawh thasanna sangin kipawl khawm in thakhuah takin kalsuan ding lunggualhna tawh ZYA inntek in ZCRC ( Zomi COVID-19 Response Committee) kidingkhia hi.

ZCRC in sepding le lungulhna nam 5 kigel a,

• a) mipi sung nekledawn dongtuakte panpih ding
• b)mipite lungsim thakhauhna ding thapiakna le hopihna bawl ding
• c)A kisapna munmun ah thatang kipiakkhiatna nei ding.

4)Thuleng le thutak khentel in mipi tung pulakna le mipi sunga thu om bangbang thuneite tung pulakna nei ding.

5) Tedim zatopi a khantohna ding a kisam bangin mapang ding cih ahi hi.

A tunga lunggulhnate picing takin sep theihna dingin committee nam 5 tawh kikal suan hi.

• 1)Social psycho support team
• 2)Vulonteer team
• 3)Food & delivery
• 4) Finance
• 5)Trust information cih ahi hi.

Committee 5 tawh kalsuanna pen mimal kim hanciamna le akua maciat panpihna tawh hun tomno sung mah in lawhcing takin na tampi kisem khin hi. Mipi le tangpi ading a kisam le a kul bangin nasep nam 25 bangah nakpi takin ma kipang thei hi. Ahuampi in gen leng kumpi thuneite tawh kizom in mapanna le mipi sung gilkial dangtakna thute ah thagui thatang le vanlenate thuk takin ma kipang thei hi.

Sum le van ngahna, zatna

ZCRC tungtawn in mipi ading panpihna mimal le kipawlna kigawm 20 val tung panin antang ip 500 le sumtang tein 250 val deuh kingah a, tu ni ciangciang antang ip 400 kim kihawmkhia khin in sumtang pen tein 125 kim mah kizang khin hi.

Antang pen a kisam khempeuh a hamsa khempeuh ading kicing zo lo ding ahih manin nek ding a om nawnlo takpite bek mah I panpih zo bek hi.

Hih bangin neihsa lamsa apia mimal kim le nasem thakuan akua maciat tungah lungdamna thu nakpi takin kiko nuam hang.

Innlam thu omzia

Tu laitak inn lam thu om zia pen I theihsa tek mah bangin nasepna khempeuh phial kitawl nga hi. Gam dang pan sum kikhak zong nibang hun sangin tawm zaw hamtang ding hi. India gam lam ah sum zon pai zonna khempeuh kikhak tan phot hi.

Lo kho in khawhsa kham innkuan pen a mal in I gen theih loh hangin kitawm mahmah hi.

Tedim Tonzang Cikha ah innkuan 20200 kipha a, mimal 131000 val om in khangham kum 80 tungsiah pileup 300 val om hi. Tedim gam huam bek ah naupang kum 10 nuai 19000 val om hi. Kumpi nasem mi 3668 hi a, sumbuk nei 691 kipha hi.

Mailam kiginkholhzia ding

1. COVID-19 hun sung le COVID-19 khit ah biakna lam le leitung lamah naupangte pantahzia ding nakpi takin gel kholh loh phamawh ding hi.

2. Nopna dahna le innkuan sung nuntakziate nidang bang hi thei nawn lo ding ahih manin a lem thei pen dingin paizia thakte I gelkholh ding a kisam kha ding hi.

3. Sum zon pai zon zia ding kikhel in nuntak khuasakziate kikhel ding ahih manin ei adingin a lem thei pen ding lampite manlang takin I zon loh phamawh ding tawh kibang hi.

4. Tu tung thupiangte I et ciangin antang tuibuk pen I khua I tui I leitang mahmah panin I khamkhop ding I ngah theih ding thupi mahmah ahih manin hih thute zong a manlan theithei in sep pah huai kha ding hi.

Vai khempeuh pen kumpi thuneite mah in ong maikaih in ong vaihawm ding ahih hangin mipi mahmah in zong nakpi takin tha I san keileh bangmah kilawh cing zolo kha ding ahih manin akua maciat in I hih theihna tek pan mapang in hanciam khawm ni. ( May 19, 7:00-9:00 pm Zoom meeting a thusunna a tomin genkikna hi.) Lian Tuang, President, Zomi COVID-19 Response Committee May 23, 2020