Sia David Lah tawh kisai mipawlkhatte’ lungsim le kadeih thu

Sia David Lah tawh kisai mipawlkhatte’ lungsim le kadeih thu

Hih thu pen biakna thu ahih bang mahin thulianpi khat hi ci-in ka ngaihsun a, bang mah gen loin om zaw leng hoih zaw ding hi ci-in ka ngaihsun ngei hi. Ahi zongin media tuamtuamte ah hih thu tawh kisai hong suak ziahziah ahih manin mite muhna ah hih thu bangci om a, ei Tapidaw biakna le a pualma pam a mute muhna a koici bangin om hiam cih theih nopna tawh hih Sia David Lah tawh kisai thute ka na sim kha zel hi.

A kipat cil lam-in bang mah ka awlmawh se kei a, { Awlmawh lo ka cih ciangin hih bangin lai gelh ding tawh kisai a gen nuam ka hi a, a thu awlmawh lo cih ahi kei hi. } hih bangin thulian hong suak ding zah dongin ka lamen kei hi. Siapa David Lah pen thugen siam kasak mahmah mi khat hi a, ama thugenna zong hun sawtpi lai peka kipan a ngai den mi khat ka hi hi.

Ahi zongin kei pen mi tuampi khat ka hi-a, thupi kasak leh ka zahtak mi khat in siatna ahi a, khialhna khat ahi zongin a neih khak leh tua ama khialhna hangin midangte buaisak lunggimsak, supna piangsak, cih bangin midangte tawh a kisai thute ah amah ka zahtak man le thupi kasak manin a khialhna liahsak selsak ding cih ka ngaihsun zo kei hi.

Ama khialhna hangin amah bek sukha ahi a, kei le amah kei in thuak ding cih ahih leh awlmawh loin zong ka om thei lel kha ding hi. Ahi zongin mipi a nei, makai khat ahih leh kei bek hi lo a, mipite tawh kisai thu ahih manin mawhna pen mawhna mah bangin mu thei a, khialhna pen khialhna hi ci-in liah sawm selcip sawm sel loin ahi bangin saan zawh ding kisin huai hi ci-in ka ngaihsun hi.

Pasain nasem khat in a genna ah….. Pasian nasem mi khat ahih hangin a gamtat khialhna le a siatna theitel ka hih leh amah Pasain nasem ahih manin a mawhna midangte theih dingin pholak loin panpih zaw hi leng Pasian in kei thupha hong pia dinga, ahi zongin midangte in thuman a muh theih nadingin a gamtat khialhna le a siatna khatpeuh ka gen khiat manin Pasain in kei hong mawhsak ding ahih leh zong Pasain hong mawhsakna dan ka thuak zaw ding hi.

Bang hang hiam cih leh kei hong kipia ding hamphatna thupha ka ngah nop manin midangte tungah a thuman lo, midangte a siasak thei ding mi khat gumin ka panpih ngei kei dinga, tua bang mi khat mawhsakin a mawhna ka gen khiat manin kei tungah dan hong kipia ding ahih leh zong ka thuak zaw lel ding hi. Ahang in mi tampi suahtak nadingin ken daan a thuak ka hi a, ka hamphat nop manin mite sinkham lungkham ding a awlmawh lo bangin a om mi khat ka hih ding sangin ka ut zaw hi,” ci hi.

Mi pawlkhatte deihsakna tawh thu hilhsim theih loh uh a, midangte theih loh dingin deihsakna tawh thu kihilhsim kha leh tua ama thu a theisimte a nuntakna lauhuai cih zah dongin kidah zawsop thei uh ahih manin, mi pawlkhatte in tua bang mite tawh a kituak khak ding uh lau uh ahih manin tangpi theih dingin gensia ziauziau ta uh hi.

Hih bang thute ka gen ciangin Siapa David Lah pen mawh hi khial hi ci-in ama tungah thu a khen nuam ka hi kei a, hih ama thu hangin amah a panpih mi pawlkhatte lungsim omzia a gen nuam ka hi hi.

Bang bang ahi zongin Christ sungah ka sanggampih ulenaute aw, hih thu pen eite pat masak ahihna thu kinial thei lo hi.

“TOPA deih banga gamtatna in galte nangawn lawma kaih zawhna hi,” ci-in Pasian kammal in eite thu hong hilh a, ahih hangin eite in galte lawm dingin bangci kaih ding cih ngaihsun lo bek tham loin, en amau gensia masa, langpan masa, simmawh masa, kosia masa, to masa cih thu hong hi mawk ahih manin amaute lawm bangin ih kai kik zo pah kei zongin mailam saupi ngaihsutna tawh ei mah a khial kitangsak zaw-in, bangci cih leng lawmin kai thei ding cih lam ngaihsun zaw leng bang a ci zaw tam ci-in ka ngaihsun hi.

Hih thute tawh kisai thusuahna tuamtuamte le lai kigelh pawlkhatte ka sim ciangin midangte muhna ahi lo, ei a sungmite muhna pawlkhat ka muh ciangin ka lung a nuam kei hi.

Hih thusia a pian zawh ciangin kawlte lungkim lo uh ahih manin mihon kikaikhopna piang a, tua a kikaikhawm mihonte maan {Photo} peuh siksanin, ….

“Amau zong ahi cih va vua leh, amau bang hi tuan uh ahia, kumpi thukhun na cih uh hih bang maw? Ei tapidawte hong bawlsia nuam ngiat mah ahih lam thei lo maw no, ci-in pawlkhatte in siapa gamtatzia a hoihna thu gentehna tuamtuamte zangin phatna thu gen uh a, Pasian nasem dangte pen Siapa David Lah bangin a hangsan lo, upna a nei lo le Pasian nasem taktak hi lo cih zah dongin a gan pawlkhat zong om uh hi. Hih thute thupi hi thupi lo hi cih a gen nuam ka hi kei a, mite lungsim omzia a gen nuam ka hi zaw hi.

Amau a hehsak pen eite hi hanga, a heh dingin bawl i hih manin amau ei hong thuk kik uh ahi hi ci-in ka ngaihsun hi.

A taktak ciangin tua bangin mipi a kikaikhawmsak pen ei hi zaw hanga, en a mau hehsak sinsosak phot i hih manin amau ei hong thuk kik hi bek uh a, ei a pan masa i hi zaw hi. Ahi zongin tuin eima pat masak ahihna thu kitam gen nawn lo a, ei le ei i kigup nadingin amau hong thukkikna thute ultungsakin kitam gen zaw ta hi. Hih thu pen eimi sung sangin kawlpau le kawllai tawh a kisuaksak tapidaw thusuahnate ah kitam muh zaw lai hi.

More: Pasian thugen siam minthang mi 7 te KBC te’n Blacklist ah koih

Siapa a gensia nuam le a langpan nuam ci-in hong ngaihsun kei unla sanggam kawlte i muhdah man le langpan nop manin ei le ei a hoih a dik bangin i kimuh luat khak loh ding deihsakna tawh hih lai a gelh ka hi zaw hi. Tua bang ka cih ciangin kawlte khiangah ko a khial hi ung va ci ni a ci ka hi kei hi. Ka biak Pasain le nangma biak Pasian a kibang hi a, ka biak Pasian pen midangte Pasian a hoih lohna ka gen zawh manin Ama hoihna a kidawk zo pan hi lo a, pasian dangte ka niam koih manin ka Pasian a kilamsang zo pan hi lo hi.

A kilawm lo gelh khialh a om khak leh laigelh a siam lo hi ci-in ngaihdam bawm ah na khiatsak un ci-in kong thum nuam hi. Lungdam, Job Cinpi