ZAM Thupuak :: 01 Dec 19 (UN pan thu zaksakna)

HEALTH UNIT (IAD) LEH LIVELIHOODS COUNTER KIKHAK TA

UNHCR zum sunga om cidamna lam (Health Unit) leh nuntak khuasakna tawh kisai panpihna (Livelihoods) counter te December 01, 2019 ni pan kipan in UNHCR lam pan thu zasakna a om kik hun dong kikhak phot ding hi.

A hangin UNHCR te in hih nam nih adingin fund sum nei nawn hetlo ahih man ahi hi. Damlohna tawh kisai lai kung laidal khat peuhpeuh ahi zongin damloh vai ahi zongin zum ah hong theisak nuam te in Phone : 03 2118 4879 ahih kei leh Email : [email protected] tawh kizom thei ding hi. Livelihoods lam tawh kisai in vai te pen Phone : 012 2132 520, 03 2118 4915 ahih kei leh Email : [email protected] tawh kizom thei ding hi.

Hih damloh vai leh Livelihoods vai te ah sumtang tawh bangmah kihuh zo nawnlo ding cih na hi a, ahi zongin a thu a la lam ah ahih leh amau tawh kizopna bei pah ding cih na hi tuanloin hong van sak theih ciangciang hong van sak veve ding uh hi. Ahi zongin a bei sa hun bangin counter kihongin tua mun ah va pai theih cih te om nawnlo phot ding cih na ahi hi.

UNHCR PAN THUZAKSAK NA

27 November, 2019 ni te ah UN zum pan in card thak (New Registrations) kipia hi cih thuging hangin mi tampi buai khengkhang in tampi takin zong kidelh ngei ngai pah hi. Hih bang vai teng a om ciangin UNHCR/CLU Department leh RSD Department ulian te kiho a, amau zong a thu siangtak in hong gen pah hi. Kipawlna tuamtuam in hih thu tawh kisai in UNHCR te hong zaksak dan in kigen pah a, ahi zongin a pua lam tuamtuam thuging te hangin 28 November 2019 ni ciangin mi tampi tak mah UNHCR zumpi mai ah kigual uh hi.

UN zum te in mipi control zo nawnlo ahih manin a tawpna ah Palik te sam in mipi te a ciah kik sak uh hi. UNHCR pan in UN thuthak khatpeuh a omciang in a geinai uh aa om khatpeuh genmawk lo in, Tangpi/ Mipi theihding in Community kipawl nate ah thusia/thupha te ongzasak masa uhhi. Tua ahih manin mipi te in zong Community te pan in thu kician tak in (Gentehna : THUPUAK, ZAM Facebook Page, Khuamakai te tawh kizopna group, Pawlpi Siate tawh kizopna group) cih te ah hong kizasak lo khat pen a thupi tak in I san loh ding zong khat vei I kizasak phapha hi.

Tuhun pen online kilim zat mahmah hun hi a, khat veivei ciangin mi khat in a om muan pan a ngaihsut tawmtawm thu khat hong at pen mipi in hih News hong luan na source te en nawnlo in ki um kha thei den hi. Tua in kitelkhialhna, gim zawkna, suplawh zawkna zong tampi piang sak thei ahih manin Community leh UN te lam pan thu kician hong suak sak ding ngak kawmin thu I khentel siam ding zong I kiphawksak hi.

UNHCR/CLU PAN COMMUNITY TE TUNG ZAKSAKNA

Appointment neilo peuh mah in UNHCR zum ah nong pai loh nangding uh ong thei sak ung. Hih a nuai a website pan in appointment pen December 02, 2019 pan in kila thei ta ding a, tua pan-in appointment na lak khitciang-un hong paipan un. https://www.refugee-malaysia.org/contact/ Hih mun ah appointment kila thei a, amau a appointment hong piak na tawh kizui in zum ah hong sam kik ding uh hi.

2019 ZSM LAIBU KINGAH TA HI

Malaysia zomi Genvai Kipawlna (ZSM) 2020 ading ki lut thei ta a, ZSM laibu te zong kila thei ta hi. ZSM lut man mi khat ciang kum khat ai RM 20 hi a, hih na lutna hang tawh ahamsa a dong tuak I mipihte a panpih, a dah akap hun ah a khitui anulsak na hi gige hi. Hih ZSM ah member na lutna in nang a ding a pia na hikei a, panpihna akisamte apanpihna hizaw hi. A kisam khat I panpih na in Pasian deihna zong ahi hi. 2019 sungin zong tu ciangciang Zomi pih te luang (25) bang lei ah I tuh theihna in nang leh kei I pankhopna ahih bang mahin mailam ah zong mapang khawm lai dingin zong kong zawn phapha uhhi.

ZSM PAN THUZAKSAKNA

2020 kum sung ZSM ah palai sem ding volunteer kideih hi. Khasum ki pia zolo ding ahih manin veina tawh a kipia khia nuam te hong kimuak hi. Mimal in veina tawh kum khat sungin ZSM vai te ah a hunhun in kipia khia nuam ing a ci te in December 07, 2019 a nunung pen nong theihsak nading uh zong I kitheisak hi. ZSM ah kum khat sung volunteer asem nuamte in Hih anuai a sia te tung ah min sazian kipia thei ding hi.

• Sia Gin khan En – 017 3342 760
• Sia Kap Za Khup – 016 383 8014
• Sia Joseph Tuang puu – 016 254 4093

ZOMI CUP OM DING

Kumsim I neih ngei mah bangin Zomi Nam Ni muakna in I neih ZOMI CUP zong nasia tak mah in kibawl ding hi. Zomi Cup 2020 lutma pen team khat ciangin RM 1000 ta hi ding a, Deposit RM400 mah hi ding hi. Champion a ngah te RM2500 + Cup + Medal, First Runner Up a ngah te RM1500 + Medal le Second Runner Up a ngah te RM1000 + Medal hi ding hi. Kimawl ding ni pen January 24-28, 2020 (Sen kumthak sung) kikal sung hi ding hi. Kimawl ding hun leh amun te a hun zui in hong kizasak toto lai ding hi.

Hih Zomi Cup ah Khua Kipawlna min bek tawh ki lut thei ding a, pawlpi leh min dang tuamtuam tawh kilut thei lo ding hi.

PILVANG TAK IN OM SAWM NI

Tuhun laitakin kimat kihen hong tam mahmah a, Malaysia kumpite in a gamsungah phalnalo tawh om mi tampi tak siangsak nuam ahih manin kimat kihenna hong tam to semsem ding hi ci gen khia khin uh hi. Mun tampi ah Oparasi lut kawikawi ahih manin I omna ciat ah kidawm tak, pilvang tak in om ding hanciam ni. A thukin lua mah mah ahih kei leh vakvak kei zaw ni.

A diakdiak in Immigration te leh CID te uniform silh loin vakvak uh a, tua tungtawn in pawl khat in sum zon na in hong nei beh lai uh a, hong pang kawikawi in tampi pi tawh hong kitan sak uh hi. I vak suk vaktoh na ah kiim leh pam zong hoih takin I et theih ding hong thupi mah mah hi. I omna veng kim veng pam ah zong gam tat zia om zia te hoih tak kidawm ciat ni. Mite mitdong ding leh midangte a nawngkaisak lo dingin kidawm ciat ni. Kimat kihen bek hiloin migilo zong tam ahih manin I kim I pam om zia hoihtak tel pha in gamta ciat ni.

Na sepna ah thunei te in sitna khat hong neih leh kei pen UNHCR ah gambel in hong san ding ngak in a om hi ing/UNHCR card tawi gambelmi ka hihi. Ka nuntak nading hih teng ah part time tawh na a sem pak hi ing ci-in I gen theih ding thupi ding hi. Malaysia om Zomipih a kuamaciat I omna gam huihnun zia tawh kizui in kidawm ciatni cih hong zasak phapha ung. A zenzen in kimat kihenna khat natuak leh ZAM zum ah hong zasak pah in. Nang ading in a ready sa in om den uh hi.

LUCKY DRAW A NGAH TE IN HONG LA UN

Khuado pawi fund zon na I bawl ahi Lucky draw pan mee a ngah khia no. te anuai a bang hi. Hih a ngahte in na mee laidal uh tawh ZAM zum ah aman langin nong lak na ding uh hong zasak ung.

• 1. 0313 – Iphone 6S Plus 2.1658 – Computer
• 3. 1304 – Guitar 4. 0321 – Air Sopha Chair
• 5. 1595 – Rice Cooker 6. 0561 – MP 3 Player
• 7. 1547 – Electric Kettle 8. 1565 – Hair Dayer
• 9. 1061 – OTG Pendrive 10.0410 -Power Bank

EBC-KL BIAK INN THAK

December 01, 2019 ni pan kipan in EBC-KL te kikhopna a nuai a mun ah kisuan hi.

• A-1706 PSN-MPAJ- Level 17
• Jalan Pandan Utama-Ampang, Pandan Indah 55100 Selangor.
• Kikhop hun : Sunday nisim 2:00PM
• Grab : Pandan Kapital Manera -A
• Contact : 011 2135 9265 (Church Pastor)

KAPTEEL SUM KIKHAK THEI

• December 01, 2019 ni a kipan in Zomi Sum Khakna -KL (Pakhup) kiang pan in Kapteel ah sum kikhak thei ta hi.
• Sum thoh na ding : Eagle Star (Lian Pau)
• Malaysia Zomi Sum Khakna – KL : 011 3343 3031

ZAM MASUAN TE TOPA OM PIH NA

Hih Sanggam nu Lalam pen (Phaitu) Khuami hi a, Malay -sia ah a sanggam laizom sanggampa in hong nusia khin hi. A innkuan ah amah bek a om lai ahi hi. Tua kawmkal ah 2017 kum in Motor cycle in nataihsak aa, a tuahsiatna hangin a khe liam in kawi gawp aa, zato ah kibawl zolo, na lah sem zolo in a tuacipi in kum 2 val bang na om hi. Khuapih tuipihte le lawm le gualte in zong a et theih zah in en uh hi. Ahi zongin a ma kibawl nading pen Salayang Zatopi ah RM80,000 bang bei ding ahih manin kua man huh zolo in ki om hi.

ZAM zum pan in gammi te sungah thu um mi pawl khat ki hopih kawikawi a, a nunung lam ciangin Madam-Eliza te panpihna tawh kibawl thei ta a, tun ahih leh a khe pong man bang in hongtang kik thei ta hi. Tu-in Zato pan zong hong tuak khia ta in, a khe hoih takin kizang a, na a sep zawh dong Batu Arang a om ACTS te cina kepna ah tawm vei sung kikem lai ding hi. A sawt loin a ngeina dan mah in hong damsiangin hoih takin nasem a, amah leh amah a kivak kik zawh nading thungetna ah phawk lai ni.

WELCOME TO ZAM

Kawlgam, Vaigam, tuipigal leh gam tuamtuam pan Mala -ysia ah hong zin Zomi makai te’n Zomi zumpi ahi Zomi Association of Malaysia(ZAM) ah nong hawh/phak hamtang in thapiakna leh idea tuamtuam piakna nong neih na dingun kong zawn phapha uhhi.

TUKAL SUNG ZATO LAM BUAIPIH TE

• 1. Gin Suan Mung (Pangmual) ACTS leh IPR ah kibuai pih
• 2. Lucy Ta Niang (Phaitu) PPUM leh Butu Arang ah kibuaipih
• 3. Man Kawi Nem (Suangzang) HKL ah kibuaipih
• 4. Hau Sian Mung (Tahan) ACTS ah kibuaipih

ZATO LAM TAWH KISAI

Zato lam tawh kisai-in vai khat peuh na neih leh ZAM zum ah hong ko in. Contact :Sia Mungpi 018 3122 957

TUKAL SUNG THONG LAM BUAIPIH TENG

1. Lal Khan Khup (Ngalbual) 19 November 2019 ni-in Kota Damansara pan kiman in Shah Alam lockup ah kibuai pih laitak.

2. Zam Ngaih Sang (Ngalbual) 19 November 2019 ni-in Kota Damansara pan kiman in Shah Alam lockup ah kibuai pih laitak.

3. Khup Suan Piang (Suangsang) 19 November 2019 ni-in Kota Damansara pan kiman in Shah Alam lockup ah kibuai pih laitak.

4. Dal Khan Sing (Ngalbual) 19 November 2019 ni-in Kota Damansara pan kiman in Shah Alam lockup ah kibuai pih laitak.

5. Thang Lem Muan (Ngalbual) 19 November 2019 ni-in Kota Damansara pan kiman in Shah Alam lockup ah kibuai pih laitak.

6. Za Lian Sing 19 November 2019 ni-in Kota Damansara pan kiman in Shah Alam lockup ah kibuai pih laitak.

7. Thang Lian Sum (Tuicinlui) Bangsar anasepna ah Oparasi tawh kiman in Jalan Duta Immigration zum ah kikan sak

8. Lian Khan Thang (Suanghoih) Bangsar anasepna ah Oparasi tawh kiman in Jalan Duta Immigration zum ah kikan sak

9. Cin Khaw Thawn (Tuicinlui) Bangsar anasepna ah Oparasi tawh kiman in Jalan Duta Immigration zum ah kikan sak. UN laidal tawi ahih hang UN ah ki report sak.

10. Mung Kim Khai (Tungzang) Sri Kuching ah kiman in Palik te kiang pan kila khia kik thei.

KIMAT KIHEN NA TUAK LEH

Zomite sungah kimat kihen natuak zenzen leh hih phone no. te ah na hopih pah in. Nang adingin atawn tungin kigingsain om den uh hi.

• Sia Tuang Pu : 016 254 4093
• Sia Zo Mung : 017 663 6087
• Sia Maa Mang : 018 231 1365
• ZAM Hotline : 016 293 9027

ZOMI TE ADING NASEP

Malaysia gam sung om Zomite nasepneilo in nasem nuam mahmah napi nasep zon nang a lemlote in ZAM zum ah hong dawp un. Zomite ading man ngenloin na sep kizon sak den hi. Contact – Sia Mamang – 018 231 1365

LUNGDAM KOHNA

• 1. ZCC Pawlpi RM100
• 2. Do Pau RM50
• 3. Kam Thawn Thang (Haupi) RM50
• 4. Pa Khup (Zomi Sumkhakna) RM50

Panpihna hongpia khempeuh tungah genzawhloh lungdamna lianpi ZAM pan kong tangko uhhi. Hi bangin I pan khopnate hang in tuni dong a kalsuan zo I hihi. Topa’n Zomite adingin mapang zo semsem dingin thupha hong pia tahen. ZAM ZUM pen nisim 9:00AM-6:00PM sung kihong den hi.