Vondeih Kep Ding – 40 (Pau Khan Kap)

Vondeih Kep Ding – 40 (Pau Khan Kap)

Kong it Tawngno, Magazines khawng ah nasim khin ahi phial zong Alexander The Great i a sih ding ciangin a galkapmangte tung agen, a khansung in a sin, leitung ah a nusiat nop, a lunggulh thu (3) te hong gen nuam ing.

Tangthutheite-in amit color pen vei le tak kibang loin khat pen blue color hi-in, alang khat pen brown color ci citciat uh hi. A khanlai in Egypt, Persia leh India akipan continent (3) bang la dek phial in, (2007731) square miles bang lazo cih uh hi.

Tua bangin gam tampi hong zawh khit ciangin agam Greek ah hong ciah-a, lampi panin hong dam lo hi. A siahuan te-in ahih theihzah in a bawl uh hangin noptuam tuan loin hong suktek tek hi. Dam kik zo nawnlo ding cih amah le amah hong kitheih ciangin a galkapmangte agei ah kaikhawm in,‘ kei pen adam kik zo ding hilo hing, sawtnawn loin leitung panin a paikhia ding hita ing. Ka lunggulh mahmah thu(3) om in, tua teng ka sih zawh ciangin pello-in nong hih sak na ding un kamciam hong ngen hi ing.’ ci-in khitui luangkawm kawm in hong gen hi. A galkapmangte in zong ‘pello in ka hong hihsak mah ding uh hi’ ci-in kamciam hong pia hi.

‘Ka lunggulh a khatna in-: ka luanghawm pen keimah hong bawl ka siahuan te bek pua sak un la, midang kuamah hong pua sak kei un.’’

‘‘A nihna ah-: Han manawh in ka luanghawm na paipihna uh lampi dung ah ka khansung in ka khol sum, ngun le kham, suang mangpha te hong phah sak un,’’ la,

“ A thumna leh a tawpna pen ah ka khankuang vei le tak ah avang khat tuak pawl in ka khutte nih a pualam ah hong koih sak un,” ci-in hong vaikha hi.

A tuamdang deuh kumpi pa lunggulhna te hangin akiim aom galkapmangte’n lamdang sa-in linglawng gai uh hi. Ahi zongin kua mata-in dongkik ngam loin aom khipkhep laitak un Alexander in a it phatdiak a galkapmangte khat in hong naihphei in kumpi pa khut hong napsak khit ciangin,“ Ka topa aw, na lunggulh bangin ka sem ding uh hi. Ahi zongin hih alamdang na lunggulh thute nong hehpih zawh ding leh kote na lunggulhna ahang hong thei sak in?”ci-in hong dong hi.

Deihtak ahu hong la in hih ci bangin hong gen hi.

A khatna ka lunggulh thu ahi ka luanghawm pen ka siahuante bek ka kipuaksak na ahang pen:- siahuante bangzah in asiam zongin mihingte sihna ding panin a hutkhiat zawh lohna thu mite’ theisak nuam ing. Tua hi leh ka gam mite-in a tawntung in ki cidam paisuak lo ding ahih na thu hong phawk thak ding uh hi.

A nihna ahih, ka luanghawm a kipaipihna lampi dung ah sum, ngun le kham leh suang manpha te ka phahsakna ahang pen:- kei in hih leitung buppi zo phial in, genzawh loh in sum, ngun le kham, suang manpha ka neih hangin ka sih ciangin tuate khutmee cia zong keng theilo hi ing. Tua ahih manin ka gammite-in hauhna bekbek adelh delh lohna ding uh theisak nuam ing.

A thumna ahih, ka khutte nih khankuang pualam ah ka koih nopna ahang in:- leitung ah kong pai lai-in ka khut sung ah bangmah keng lo-in kong pai-a, tuin zong khutguak bek mah tawh leitung panin apai khia ding ka hihna thu ka mite thei sak nuam ing,” ci hi.

“Ka luanghawm leisung ah hong phum un. Kei nong phawkna dingun bang mahmah bawl kei unla, ka khutte nih khankuang pua ah koih khia un. Tua bang hi leh mite in, ‘ leitung buppi azo mipa in a sih ciangin a khut ah bangmah keng lo-in leitung ka nutsiat lam hong thei ding uh hi’,” cih thu agen khit ciangin a mitsi in a hu tawpna sangin it mahmah leitung hong nusia ta hi.’’ ci-in tangthu in ciamteh hi. Hih bang mite’ thu kasim khak ciang thangah lua mahmah ing.

Hih zahta in leitung azo galdo hat in, pil in siam in a minthang Alexander The Great i pianna pa leh a pantah a siate’ tangthu te hong kansak thei le cin utnaa ing e, Tawng!

Papa
Columbus, OH
August 1, 2016