Ei ading thupi ei, ei tawh kisai kei ~ Job Cinpi

Ei ading thupi ei, ei tawh kisai kei ~ Job Cinpi

Khat veivei ciangin thupi lo, cihtaak lo i cih thu pawlkhatte a sawtna ah thulianpi hong suak thei hi. HIh thu tawh kisai-in gentehna tangthu khat kong gen nuam hi.

Khat vei lai-in khuatano khatah ta a nei lo nupa khat na om uh hi. Tua nupate in bawngpi khat le vok khat khawi uh hi. Tua nupate pen khat le khat ki-it mahmah uh a, ta a neih loh uh hangin amau nupa ki-itna kiamsak loin khat le khat kitelsiam mahmah uh hi. Tua nupate kikaal ah lungkham luatna cih bang om khol lo hi. Tua nupate lungkhamna a lian pen in a inn sungah zusa tam lua mahmah ahih manin khat veivei tua zusate hangin zan ihmu thei lo uh hi. tua pen amau nupa ading buaina lianpi khat hong suak hi.

Ni khat, tua nupate thu hong kikum uh hi. A inn sunga om zusa khempeuh bangci cih uh leh bei thei ding cih thu kikum uh hi. Zusa tang a siah uh hangin khat le nih bek man zo uh ahih manin bangmah kithei tuam lo hi. Tua manin a pasal in a zi kiangah, zing ciang khuapi sungah zusaza lei dingin na pai ning ci-in gen hi. A nupa un kithukim ahih manin zingsang khuavak ciangin khuapi sungah zusaza lei dingin a pasal inn pan hong pai khia hi.

A vengte khat in papipa kiangah a koi ah pai ding ci-in gal dot ahih manin khuampi sungah zusaza lei ding ci-in otsan-in dawng kik hi. Tua thu bawng le vok in hong za uh hi. Bawng in a gei a buk sunga om vok kiangah, vok aw, na za hiam, i pu in zusaza lei ding ci mawk ven, ei hong thah nading peuh hi ding hiam, tua thu ka ngeih sut khak ciang ka lung nuam het kei, nang bangci na muh a leh, ci-in vok kiangah bawng in dong hi.

Vokpi in, zusaza a ci ve leh, tua lawmlawm thei lo maw, zusaza le ei bang kisai, i pu in ei hong it manin nisimin an hong piapia hi lo maw, bang hangin ei hong mawk thah laizang ding, tua bang ciangciang ngaihsun thei nai lo maw, lawmlawm, zusate pen bangmah kimanna nei lo uh ahih manin i pu in an pia ngei lo hi, tua banah i pute nawngkaisak lai uh ahih manin i pu in zusate a that nuam hi zaw hi, ci-in bawngpi dotna dawng kik hi. Vokpi dawnna bawngpi in a zak ciangin a lungnuam thei pah hi. Ei tawh kisai kei mawk mah ei, ei ading lauhuai kei, ci-in kilungnuamsak hi.

Inntekpa khuapi sung pan zusaza tawh inn ah hong ciah kik ta hi. Inn a tun tak ciangin zusa a thah theih nadingin zusate nek theih ding an pawlkhat le zusaza pawlkht hong hel hi. Nitak ciangin tua zusaza tawh a kihel ante a inn sung zusa om theihna munte ah hong koih kawikawi hi.

Ihmu uh a zingsang khuavak ciangin a inn sungah zusa hon khat a sisa bekbekin na om uh hi. Nupate in tua zusate amuh ciangin inn sungah zusa om nawn lo ding hi, beita ding ci-in lungdam mahmah uh hi. Tua thu bawng le vok in a zak uh ciangin a lung uh nuam thei zaw semsem lai hi.

Zingsang khuavak ciangin a ngeina bangin a pasal lokuan khia pah a, a zi in inn nasep khempeuh sem dingin inn ah om hi. A zi in a inn sung khempeuh puahsing pah hi. A omna uh khuata ahih banah thumuhna, thuzakna, thutheihna tam nai lo ahih manin a zi in zusate nek dinga a bawl ante khempeuh a inn nung lamah an-neng pai bangin pai ziau hi.

Annengte a paih khit ciangin a inn sungah nasep ding in pai kik hi. A annengte paihte a ne dingin ak hon khat hong pai hi. Tua akte lakah amau ak khat na kihel kha se citciat hi. A sawt loin tua ak a si dingin hong kithawi pah hi.

Tua ak a om dan man nawn lo cih nupinu in a muh ciangin a dam lo mawkmawk sa ahih manin nitak meh dingin go pah a, a lim mahmah dingin bawlpah tingteng hi. A pasal a lokuanna pan a ciah ciangin nekhawm ding cih ngaihsun hi. Aksa a min ciangin a zingan mehpih dingin a sa tawm khat le a tui tawm khat leep-in ne hi.

Zusaza pen a gu na khauh lua mahmah ahih manin a swt loin nupinu hong si mawk hi. Nupinu a sih ciangin a pasal in nasa mahmah ahih manin, a mah tawh a dah a kap khawm mipite khempeuh a bawngpi le a vokpi tawh lengla do pah hi. Job Cinpi (Zomi Laisiam Nuamte)