Tedimgam LenNupa ciang, Falamgam pan lampi kito ~ Dr. Dongno

NA THEI UH HIA LEH? Tedimgam LenNupa ciang, Falamgam pan lampi kito ~ Dr. Dongno

Nov.8, 2019, Kyi-mone tadensa sung ah, “Falam Subdivision, Kyi Let Lan Phwenh-phyo-ye Uzi – in Munluah pan LenNupa (Buannel) lam tai 3 sung pi 18 azai to ding aa, tua pan LenNupa ciang (taampi-tupi sung) khe tawh pai nading, concrete kellei sik tuizawn taangban kithuah tai khat sung kibawl nading budget MMK 263 million ki pia zo hi “ ci-in kisuak sak hi.

Hih tawh kisai nakpitakin ngaihsut kul ding hi. LENNUPA (Falam-te’n Buannel acih) pen TEDIM GAM SUNG ahi hi.

a. 1867 kumin Pu Thuam Thawngin Tlaisun Ukpi Pu Conbik kiang pan aleisa gam sung aa kihel, Ailam mual dawn aa om LenNupa ahi hi.

b. Mangkangte hun sung, 1930 kumin Khamtung gam khempeuh a-uk Mangpi pa Lt. Col. L E Burne-in Pu Thawng Khua Lian Kapteel hausa za apiakna ah a uk nading gam sung ah LenNupa omna Ailam Mual kihel ahihna laite zong hoihtak kikemcing lai hi. Mangkang kumpi-in gamgi abawl ciangin, mual dangg, lui dangg cih bangin bawl lo-in akikhin thei lo, atheihnop dingin, “Tua mual ciang, tua lui ciang” cihbang bekin siangtakin bawl uh hi. Ailam Mual acih ciangin, amual bup hipah hi, Innbuk Mual acih ciangin, amual bup hi pah hi.

c. Japan gal hun lai-in LenNupa, Tedim gam, Kapteel uk sung ah om ahihna Menzi, Pu Thawng Cin Thang genna, leh Pu Tual Khua Mang baan ah Sitni Pu Lian Za Kam-in teci pang khin uh hi. Mipil, ulian tampi-te ciaptehna zong om lai hi.

d. Mangkang hun lai pek aa kipan tuni ciang dong leitang ciaptehna, Tedim Land Records, Mi-taing Sazian zum aa kizang gamlim sung ah LenNupa Tedim gam sung ah om ahihna siangtakin kilak hi. LenNupa khenkhat bek hi lo, a buppi baan ah akiim apaam singpi pona tupi zaipi tawh avekpi-in Tedim gam sung ah om hi. (Gamlim en in)

Tu hun pen democracy hun hi aa, nidang, galkap kumpi dictatorship hun bangin, atunglam pan ut bangin thu pia ziau-in ki-uk hun hi nawn lo hi. Anuai lam, auh-chi pan pyi thu luduh-te tawh consultation neih ding, amau thukimna ngah lo-in bangmah ki sem lo ding cih, democracy pai daan ahi hi.

Tua ahih ciangin, anuai aa thute,

1. A mun, amual, ukna taavuan anei Tedim gam, Htwe Oke, AD pa ki thei sak lo hi. Tedim Forest Department, Land Records, Lam Construction Department- kuamah kithei sak lo hi.

2. A mun amual anei, LenNupa(Buannel) leh akiim aa om, Tuitawh, HiangAwn, Kapteel, Lunmual, Suangzang, Heilei, Suangphei, Sialtui khua mite tawh kikupna consultation kibawl lo, kithei sak lo hi.

3. LenNupa leh akiim aa om singpona tupi sung pen azang nuam peuhin asiauh theih, azat theih mun, mii-hlot, mii lat, mii yaing kici mun awng, taanggam hi LO hi.

4. LenNupa kiim aa om khua mite-in tangtawng pek pan kipan tuni dong in a ngeina uh, yu-ya, athupi ngaihsut mahmah uh a sialte uh leh, bawng leh sakolte agamtatna, kumsimin a gamgiahna uh, anuntakpih uh ganhingte “sa ciat”, grazing, pasture ahi hi. Kuamahin siau thei LO, zang thei LO hi.

5. LenNupa sung ah concrete khelampi tuizawn taangban tawh tai khat kibawl ding hi leh LenNupa hoihna, apianpih tabawa, nature, singkung, lopa, suangtum tampi susia ding aa, ganhingte gamtatna zong nakpi-in nawngkai sak ding hi. Ama pianpih, tabawa, nature, tampi kisia ding hi.

6. Tua bangin concrete lampi kibawl leh, mailam ah gamdang huhna, National Park maw? Community Forest maw? bang maw? te-in ong saang nawn lo ding uh hi. (Mt. Victoria bangin)

7. Mailam ah LenNupa(Buannel) pan Innbuk mual ciang tupi beelin, hih amanpha, leitung mun dang aa om lo hih species, sial, khawi nading geelna lianpi zong ki nei khin hi.

Atung aa thute siksanin, Falam gam Kyi Let Lan Phwenh-phy yee uzi zum in LenNupa omna Tedim gam sung peuhmah lam to lo, LenNupa kiim singkung tupi sung ah concrete lam abawl loh nadingin, tavuan nei Chin State Kumpi-in akhaam, akhawl sak, aphiat kik sak nadingin gen ding Zomi min pua kipawlnate, akiim aa khua mite leh Zogam it ing aci pepeuh ’ mawhpuak, taavuan ahi hi.

Zogam makai uliante — ZCD, GZA, TA Ygn., ZYA Phualpi Kalemyo, Tedim CSO leh Tedim Elders Committee, ZYA, gamdang pan ZIUSA leh Biakna kipawlna tuamtuamte’ leh akiim aa om khua hausa-te awging ong kingai hi.

Mi dangte neihsa amaan lopi-in deihgawhin sut ding i hi kei hi. Tangtawng aa kipan i pu-i pate kiang pan gamh i luah suksuk, tu-in i gam tua cia leh mun hoih ong kithei sak lo, ong kikuppih lo-in adeih bangun bawl ding kipan ta uh hi.

Tu-in Zomi, Zogam ka it a cite leh Zomi min pua Kipawlnate ong kiza sak hi. Zogam it takpi maw, kampi? kisittelna ahi hi.

July 7, 2018 ni-in Falam Workshop ah hih thu akikup cilna uh hangin ki linglawngin thu i kiza sak aa, GZA leh Tedim CSO-te’n kyi ngya chiat ong thoh uh hi. Yangon Kapteel Kipawlna-in lungkim lohna Pyi-ne ah lai khia uh hi. Bang mah kizasak kik lo aa hibang ong hih teitei uh lamdang kisa mahmah hi.

GZA, CSO leh YKK in na masuan uh ong suulzuih kik un ci-in mipi ong thuum hi. Akisam bangin Zomi itte hangsantakin na ngaihsutna uh, ong taangko ciat un. . . Dr. Dongno (Posted : November 29, 2019)