Mission semte´ theihding kilawm thute ~ Kap Za Khai

Mission semte´ theihding kilawm thute ~ Kap Za Khai (Photoh)

Kawlgam sungpan ahi zongin, Gamdang pan ahi zongin missionary khahkhia in mission sem ihih leh i theih ding thu pawlkhat gen nuam ing

1. Khristian khat zong a om nailo mun ah mission sem ahihna phawksak in missionary ading thungetsak den ding kisam hi.

2. Kum tuazah bei ta, sum tua zah kizang ta in kha mangthang kingah nailo cih ding hilo hi. Lungdamna thugen pen missionary septheih ahih hangin kha mangthang mat aihleh Pasian sep hizaw hi. Kha mangthang khat ii manphatna leh mission gualzawhna pen kum leh sumlepaai tawh teh theih hilo hi.

3. Pawlpi sungah camp leh crusade bawl a mi piangthak kingah banga Mission field ah kingah dinga lamen ngei kei in. Mission field ah thu-um lo mi khat nangawn tawh Pasian thu limtak kigen theih zah dinga hunpha ngah ding haksa hi. Nang zong na pawlpi na sihpih ngam bangin amau zong a biakna a sihpih ngam uh ahihna phawk in na missionary uh thapia tawntung in.

4. Pawlpi sungah pen sep ding khempeuh leh bei ding khempeuh pen Pawlpi´ budget tawh kizang hi a, Pastorte´ khasum peuhmah kisu kha lo hi. Ahi zongin Mission field ah ahihleh nat vehna, nopna ah kihelna, lengla dona, TA/DA cihte a kipan missionaryte´ beina bekbek ahih manin Pawlpi in missionary ii khasum banah nopna leh dahna leh vai tuamtuam a zek ding budget atuam geelsak hamtang leh hoih hi.

5. Khasim kha sum piak bek pen pia thei kisa lua ken la, na missionaryte´ report te zong limtak ngaihsut sak ding kisam hi. Mission field ah Thawhkik, Lungdam Bawl leh Kumthak cihte a bawl theih ding leh abei zah ding hong nget loh hangin Pawlpi in theisim in sik hamtang in. Na Missionary in hong ngetnget ding aana ahih man a hong ngen lo hi. Pawlpi in missionary´ sepnate hih theihzah panpihna pen masep mazang mahmah hi.

6. Na Missionaryte leh Pawlpi mite kimusak, kiho sak in. Pawlpi leh mission field kizom den ahihna kilangsak in. Missionaryte nasep pen pawlpi´ mimal nasep ahihna phawksak den in. Pawlpi in mission kin mahmah hi cih kiphawksak in no le no kilumsak den in.

7. Khasum bek nene in nasem lo ci-a na Missionary na hawmthawh ding leh nang mahmah ama munah ki-ap dingin kuankhia pah in. Aihkeh na missionary Pawlpi ah sam in la na tha ngah lohna thu/ na lamet danzia hoihtak pulak inla kuppih in. Ama tungpan thuhoih thusia tampi na zak ciangin limtak khinkhai in semkhawm un.

8. Gamdang pan Kawlgam sungah missionary a khak na hihleh na missionary pen amah bek tangtat sak kenla, a gei nai-a Pawlpi aihkeh Association tawh semkhawm dingin geel ding hoih hi. Mission field sungah upna tawh kisai buaina leh vuakna piangthei ahih manin tangzai tak-a hong dinpih ding kipawlna kisam hi. Sumtha bek tawh mun khempeuh ah kisem theilo a, mihing tha zong kisam kanlai hi.

9. Kha mangthang khat ngah pen leitung le vangtung a na khempeuh sangin manphazaw ahih manin mission sep pen lungduai citak takin sem in. Kum 5-10 project danin sem kei in. Khantawn mission sepzia tawh sep pen muibun hi. Mission sep pen ngasa siah bang hi loin lokhawh bangin sep dingin LaiSiangtho in hong hilh ahihna phawk in.

10. Pawlpi mimal kim ciatin mission ading tavuan kinei ciat ahihna phawk ni. Topa Jesuh ii hong sawlpina pen sep ningniang ding hi loin limtak thupisak in sep sinsen ding ahi hi. Mission field tawh kisai vai khempeuh van siset ding, geel siset ding leh missionary vak siset ding pen pawlpi vaipuak lianpen hisak in. Missionary khasum piak bek tawh mission na sem kisa mahmah cih pen Pawlpi cidam lo cihna hi a, mission zong lawhcing ngeilo ding hi. Nasep veve leh a bucing in sem lecin lawhcinna in amanlang in hong zui pelmawh ding ahi hi. Kap Za Khai