Thawn Kham’ thusim ~ Pu Thangboi

Thawn Kham’ thusim ~ Pu Thangboi

Zola tawh Zomi laphuak, lasiam minthang tam mahmah napi tuni ciangciang Thawn Kham zah a lawhcing om nailo hi. Ama’ pahtawina ngahzah angah om nailo ding a, a laphuah lasiamna tawh amah zah a inn alam ngeu zo om nailo hi. Thusim om hi.

Thupatna

Thawn Kham kacih ziauziau hang in kei sang in bel uzaw pek hi. Ahi zong mi minthang khat peuh pen amin thanna min tawh aki lo ziauziau ngeina ahi hi. Tua ahih man a athulu ah U Thawn Kham acilo kahi hi.

Amah Katheihna

Tonzang pan khangkhia khawm ban ah ka uuk uh kibang ahih man in ka kigual loh uh hang ka kithuah kha mahmah uh hi. 1991 leh 1992 kum laite in music uuk tuak mahmah ka hih man un Tonzang, Khalkha, Falam, Kawlpi dong ah guitar tum khawng in ka kithuah ngei uh hi. Tua lai khawng in bel sum tawh hong kicial hi peuhmah lo a, aki uilut pian hizaw hi.

Pheituam te’n ding nangawn kinei lo ahih man in mi’ a khawng akikawm himai hi. Mi laklak ah “Ka pheituam hong piakik ta in” ong kicih hun khawng zong om hi. Amah bel tua lai pek in lasak tawh thuah thei ahih man in milak ah thawl mahmah hi. Tua kawmkal ah amah a u Sia Tua Mung’ makaihna tawh Zangkong paisuk hi.

Kimuhkikna

1996 kum Zangkong ka tunsuk ciang in amah May Studio ah, sound engineer hiphial ta in um ing, na inntek mahmah ta hi. Ama’ vang tawh kasuah kakhan studio ka muh ciilna hipah hi. Iron Cross te’n a live show khui masa penpen pen uh May Studio ah khum uh ahih man in tua thu khawng hong gen ciang in zaknop kasa mahmah hi.

Chit San Maung in a guitar khau te paii ziauziau ahih man in amau hoihtak zial in singkuang sung ah hoihtak akoihna thu khawng uh zong hong gen hi. Htoo Ein Thin bel Tonzang a omlai pek a thupi asak khit hi a May Studio ah asep teh athupitna thei tektek dan hi. Tuni dong mah Htoo Ein Thin azahtakna gen nuam den hi.

Album Khumna

1998 kum pawl hi’n um ing. U Heavy Thang tawh lakhui khat khum uh hi. Kei tua laitak Shwe Gone Daing a U Heavy Thang’ kiang ka zual mahmah hi. Tua laitak Zangkong eimi sung ah electric guitar anei U Heavy Thang te khawng bek mah om hi. Va hawh leng a guitar hong tumsak in hong ngai mahmah ahih man in ka zual mahmah hi. U Thawn Kham’ la atumte zong hong ngaisak zel hi. Ken bel tu a zah a akideih ding sa khollo kahih man in ka hah kuppih kei hi.

1999 kum India ah LST sang kah in kapai ciang in U Thawn Kham’ khui Itna Ngaihna album pen hong minthang peuhmah hi. 2000 kum Zangkong kaciah laitak Full Gospel biakinn ah ka kikhop leh pawlkhat in tua Itna Ngaihna sung a lead guitar tum Heavy Thang pen kei hongsa uh a hong nohset ngeingai uh hi. Ka lungsim sung ah “Hih zah a kideih ding kasak tak in kei zong dawng 1 dawng 2 hong tum ning ci leng U Heavy Thang in hong tumsak ngel mah ding hiven maw” kaci sim khinkhian a ka enng sim peuhmah hi.

Thusim

Ih gennop bulpi ahi “Thawn Kham’ Thusim” pen hih Itna Ngaihna album sung ah na om khinkhian hi. Adawng 5 na pen ahi; “Tang Bang Na Dam In”, cih la pen hi. Hih la pen atung a ih gen U Thawn Kham Zangkong apaisuk madeuh a aphuah hihtuak hi. Ka kithuah lai un akingaihpih nu in zong Hay Mar Newin i la minthang khat ahi, “Maung” cih la pen sa thei gige hi. Nitak khat Mahwahtah (Township Law and Order Restoration Council) zum ah Captain Mya Maung (L) in ko music tum pawl hong sam in hong zaisak hi.

Tua nitak U Thawn Khamte lawmta (alawmnu tawh) in zong la asa ding a akilem khin dikdek pen U Thawn Kham in sa zolo lua ding kisa in kap piippiap mawk hi. Lawmte ka dotsim khiankhian leh “Alawmnu tawh kikhen uh” ong ci uh hi. Ka nung zakzak teh hih la “Tang Bang Na Dam In” cih pen tua nitak a alungtang kitam kham in akap piippiap khit ciang a aphuah hih tuak hi. Tua la i asakkik (Chorus) ah:

“Tang bang dam napai in aw ngaih. Sian in lum bang hong sung henla, khan kumsawt gua bang na hing khawm un. Tu leh ta va bang hong pil hen….” ci’n thupha paih mawk hi.

Alawmnu’ tung ah khasia mahmah mai kha ding himah tase leh thupha paih veve hi. Tua athupha paih hang a amah zong thupha angah ahi hi. Thupha avawh te’n thupha angah ahi hi. Alawmnu zong adau pai mahmah lel a, atate zong pil takpi hi. Khat bang ih ngaklah mahmah ahi Sia Do Khup’ Zolywood sung ah kihel hi.

More: Thawn Kham & Zomi Daily tutkhop, holimna

Thukhupna

Khang thak te’n etteh tak kasa hi. Athupha ngahna ahang tampi bel om khathei sam in cin ai zong hih la pen thupha mei akuangsak pen hi peelmawh ding in ka um hi. Bang zah ta in ih heh a ih khasia phial zong in thupha mah ki paih tanghtangh leng hoih zaw tham ahihna hong lak hi.

Topa Zeisu’ hong thu vaikhakte tawh zong kituak mahmah hi. Thangpaih man khawng a ki zahko niilneel se sang in thupha mah kipaih lel leng hun saupi ah hong hoihzaw pek ding hi. Genkhialh a om leh ngai dam, Note’ Itna Sung Ah (Mung Laan Thang) Tawmvei USA