Tulai thuthang Idol vai kuppihna ~ LT Tuang

Tulai thuthang Idol vai kuppihna ~ LT Tuang

Idol vai pen a min tawh kisai lunglutlo, Ahih hang, biakna sia kuate in ZOMUS makai ZIUSA makaite cih bangbang ci, kuate in Laisiangtho ii cih bangbang ci cih lunglutzaw ing.

1. Amasa in Dr. Do Suan Mung cih mah bang aa lasak kidemna kilapsangnate deihlohna le nialna hilo hi cih gen nuam ing.

2. Amin a kammal zat hiloin hih kammal khat tungtawn aa i ngaihsutna i lungsim puakte pen avom le akang bangin koi dan hiam cih hong kilangkhia sak ka sa hi.

3. Pawlkhatte in Idol dawi aa ci aa na deihkei vua leh music zongh dawi aa hi biakinn ah zangh nawnkei un peuh mawk cih uhhi.

A taktak ah tua bang a gente in Laisiangtho sim ngei hetlo, sia kiciante ii Laisiangtho hilhnate zongh limtak ngai ngei hetlo hi kha ding hi. Music kipatna vantung pan hi.

4. Pawlkhat leuleu in idol cihciang lasiam kidemna ci in ko na ngaihsun lel ung, Pasian in i lungsim hi hong et cise hi.

Na khat peuhpeuh i theihma aa i khialh bel phadawm aa theipipi in i khialh suaksuak, i zat teitei leh bel Pasian in i lungsim hong theipen mah hi.

5. Idol khiatna milim a cihna bek hilo ci aa khiatna a dang khatin a ngaihsun a om mah bangin lasak kidemna ah idol kammal tektek zat kullo, kammal dang zongh zat theihluat ci aa a ngaihsun zongh kiom hi. Kawlten Dwih-hah a cih uh ka nih a phasak thei kammalte bel ahih theih laisiah pelh ding mah hoihzaw veve sa ing.

6. Milim bia cih ciang a milim ngiat mah om pah aa tua mai ah kunna bek milim bia cihna na hi hetlo hi. လက္တစ္လံုးျခား tawh မသိမသာ aa Satan vanzat/kammal/psycho te hong lutlutta hong kiguangguangta ahi mai tam? Deihkaih kiphelhna tawh i lungsim sungah mun hong lala khin ahihloh nading vakhu bangin pilvang huai kasa hi.

7. Khat le khat kilapsangna kipahtawina kithapiakna hi in thupi mahmah hi. Idol minlo buang tawh kilamsang zolo kipahtawi theilo i hi tam?

8. Kei mimal aa dingin biakna sia lah hilo, idol makai lah hilo, a dem dingte lah hilo kahih manin asia aa apha zong lunghimawh huailo hi.

Ahi zong, upmawh hetloh Pasian nasem dan a kici tampite in makaite mai, mipi mai enin atamzaw ii deih, kipawlna a sem zo a thahatte ii cih mah va cihpih va thukimpih uh danin mu ing.

Laisiangtho tawh thu hilh ding siate in makaite muanna le makaite tawh kisiat ding utlohna peuh tawh kam hong pau aa Laisiangtho hong siksan nawnloh khak ding uh a pawlpi mite leh a za kha a sim kha mimalkim aa dingin khasiat huai ka sa hi.

Idol vai a gen ka hikei aa idol vai hangin a kilangkhia i concept/lungsim puakziate le i thu ngaihsutziate ka muh dan ka genna bek hi.

Min bel Laisiangtho sungah thupit ngaihsut in khiatna neitak aa min tampite na kiphuak hi.
Zomite zongh min i kiphuahteh deihna nei khiatna hoih takin a kiphuak min ngaih a kipia tangtang ngeina neite ihihi.

A sem a bawl makaite ii cih bangbang cih sukziauh theih ding a kisam pen mipite hi aa, tua makaite a khialhna a kawk ding, lammaan ah a puak ding, Laisiangtho tawh thu a hilh ding pen Pasian nasemte hi. Kilehbulhkei ni.

Mihai khat, bangmahlo khat ii thugen tawh buai a ci zongh om aa a gen dingin a kilawm Pasian nasemte in hong hahgen tuankholloh uhciang, suangtumte hong kiko, ganhing la hong pau ta zongh ahihna mel.

Bonus:
Idol kammal zanglo aa, ZIOK in Zomi Lasiam Kidemna hong cih vua leh pawlkhat in Lasiam Kidemna maw Lasak Siam Kidemna ci toto lai mawkin Zomi tampite pen naupang a pau thei tung thudot a hat mahmah laitak dinmun ah a om pan i hilai mawk tam ci phial ing. Ldam cip, LT Tuang