Mangpha Dr. Khen Za Sian

Mangpha Dr. Khen Za Sian

Namin kazak ciil bel 2000 kum pek hi. Na laibu bawl “Zomi leh Biakna” tungtawn a na min hong za hi’ng. Tua khit teh ZoNet hun hong tung in Ken Yar Sa min tawh lai hong gelh thei zel cia mateh.

2005 kum Tedim a kibawl Zomi Festival Of Praise (ZoFOP) fund zong in kavakna uh pan kimu kha hang e mateh. Ih kimuh cilna hipah. “ZOMUS fund ing tul sum hong pia tong ei” ci’n tul 3 nong pia ve leh

Tua zawh bel ih kithuahna tam e mateh. Atom in:

• 2006 kum ZRA phualpi khat ahi Mt. Sinai ah khawmpi ih kahkhawm ve leh
• Nang bel na min “Ko Lianpu” naci se ve leh.
• Khawmpi man ni ZRA nungakte tawh lamkhawm in nuam nasa ngel ve leh
• 2007 kum lutol buailai in zong ih ki tul mawh peuhmah ve leh
• 2008 kum referendum vai zong buaipih hang e
• 2009 kum John William Yettaw’ hang in ASSK Insein gilbem ah thu akisit laitak ih va paizel ve leh. Ni khat na camera tawipa akiman mawk a na zinbuk ah na giakngam nawn kei a azan azan in U Zam Mung te’ inn ah kong kha ve leh
• 2010 kum zong kinak thuah mahmah hang e. Na labu bawl vai nong nak kuppih mahmah ve leh
• 2011 kum kei hong kimat pan 2015 kum hong kikhah dong tamveipi nong pha ve leh. Nong pai sial in Zo Aw nong puak den a ka noptuam pih mahmah ve leh. Lungdam zong gina in hong ko zo keng e. Kisuang ing.
• 2017 kum hilo ahia leh Yangon ah Zomi Nam Ni ih bawl khop ?
• 2018 kum zi kaneih ding teh kei azinei ding pa sang nang na lawpzaw ve leh
• 2020 kum kitelma in Tonzang a ka innpi vuah zin hong tung in hong giak ngiat nahih man in ka lungdam mahmah hi
• 2021 kum kawlgam buai khit deuh March kha in Yangon ah zato lum in kong pai teh na innkuan un ka zato lupna ah nong veh ve leh

Bang nadeihna hiam?

2021 kum April kha kipat lam hingel in teh khual nazin ding teh Yangon a ka inn vuah nong pai phapha a natvehna tul 50 tak nong pia phapha mawk ve leh

Tua nong pai ni in “Kimu nawn kei kha leng Thu hong ngetsak in” nacih mawk pen bang nadeihna hiam? Tonzang na tuntoh teh kazi kata nek leh dawn tampi letsong na napuaksak lailai pen kei lungdam mahmah hiveng.

Kimuh Tawpna

Tukha 13 ni (Saturday) nong tun kazak phet in Bob Tuangpi leh U Kam Lam Khup te tawh kong delhpah ve vua leh Nang bel na minam party ZCD mah na lung himawh tantan ve leh. Ken bel: UDP party hong thokik khangel in cin a innteksa naih teh tuah na thuklut mahmah inla CEC dong ah nalut le cin ko “Ka meltheih uh om hi” hong cidep ding hi ung.

Party liante ah a inntek ih om khinkhian ding thupi hi kongci ve leh. Tua ni a ih nuihkhop ziahziah laitak ih kimuh tawpna ding saleng sawtpi tulai mah ding hiveng maw

Kum 90 nungta ning naci hilo maw ki awi si cia. Ken lungdam zong hong ko nailo hi lawmlawm zen hiveng. Nong it nong khualnate phawkphawk ning e maw. Lungnuam tak in napai ta in. Kimuh Kik mateng Mangpha. Nong-it mahmah, Mung Laan Thang (Yangon)

Mangpha maw Dr. Khen

Yangon om lai ka kithuahpih mahmah khat leh lai lam nasep khop pih leh gam leh minam avei a it khat ahi Dr. Khen Za Sian (Dr. Khen) in hong nusia cih za vat ka hih manin lamdang sa in nakpi takin dah mahmah ing. A innkuanpih te tawh kibangin dah mahmah ing.

Dr. Khen pen minam it mahmah khat leh Lai lam tawh i minam hong tawi sang khat hi aa, paammaih sa mahmah ing. Yangon om lai ka kithuah khawm thei zel aa, ka MOMNO nasepna zong hong panpih den khat ahi hi. Lai lam ukna kibang ka hih manun News zong ka ngelh khawm zel uh aa, Laibu zong ka bawl khawm ngei uh hi. 2005 (?) kiim US hong pai lai in zong ka kithuah khawm kha uh aa, Sia GK Nang tawh ka inn ah hong hawh in thu leh la tampi tak ka kikum khawm ngei uh in, “Zoheisa Unit” vai zan 2 sung ka kikum thei uh hi.

More: Zomi Nam Ni ~ Rev. Dr. Khen Za Sian

Upmawh lopi in Dr. Khen in hong nutsiatna hangin lamdang sa in dah mahmah ing. I minam aading makai khat asum zong i hih manin dah mahmah hang. Topan aomlai a innkuanpih te hong hehnem ciat ta hen. Adahpih, Thomas On Sian Mung (Thomas Mung Guite) Washington D.C March 17, 2022