Vondeih Kep Ding – 94 (Dimno’ Pa)

Dear Tawngno,
Dam in laidalno khat tawh hong hopih kik ing. Kong gen ngeisa mah bangin a kampau leh agamtat uh a kituaklo mi, zong ni cileng mi khempeuh phial suakta lo kha ding hi. Ih muan mahmah i huasa pa ahi zong, i pawlpi kem siapa ahi zongin, na pa mahmah kahi zongin suakta lo kha ding hi’ng. Tua ahih manin tuadan in apau leh agamtat a kituaklo mi na muh ciangin heh ngaihsut sese lo-in, telsiam sawm zaw ing. Nang zong kipelh tuan dingin hong umlo hi’ng. Hehna ding khatpeuh na tuah ciangin zong lungduai ding na kisin ing. Na pa zong ka lungduai zawhloh manin ka sepkhialh, ka gelkhialh thu tampi om khin hi.

Sun khat, naupang no khat in anu’n zingsang in bazaar pan aleisak Apple pom (2) a khut langkhat tuak ah anek dingin hong tawi hi. A nu in zong aduh lua hilo na pi-in a tano lungsim sannuam kawm in a tano kiangah, “ Bawi, kei zong khat hong pia ve,” ci-in hong ngen hi. Tua leh a tano in zong a veilam a atawi Apple pen kam khat hong pet hi. Tua khit ciangin a taklam a atawi pen zong hong pet leuleu hi.

A nu zong aden in anuih mai seisai hina pi-in, a tano gamtat te hong muh ciangin hong nuihmai zo nawnlo-in, amai hong san teitai pah hi. Ciamnuih dan pianin a nget hina pi-in a tano gamtat zia pen ciamnuih in hong sang zolo hi. Thuhilh dingin a tano lam hong pai laitak, atano in anu kiangah, “Heu…nu! Hih pen nang ading. Hih pen hih sang khum zaw,” ci-in alim zaw, a khum zaw pen a nu adingin hong pia hi.

Tawngno aw, a nu in alapphei man hileh atano in bet ahih kei leh daan khat teitei thuakkha ngel dingin um ing. Bangzah in i thei zaw zong, bangzah in i upa zaw zongin, bangzah in pil zaw, khua muzaw i kisa zongin midang khat peuh tungah thukhenna piak pahpah ding hoih khin lo hi. Ei ngaihsut dan bek tawh na mankhin gailo-in amau hong genna te zong ngak hileng thuman pen hong om khiathei pan hi.

U zaw na hih manin na nau sangin khua na muh zawk lam hong thei ing. Mi omdan, mi hekdan leh mi nuntak khuasak zia na theih zawk lam zong hong thei ing. Ahi zongin dik nasak het loh na nau gamtatna te na muh ciangin tawng pahpah, hap pahpah lo-in ama hong gen thute tawmvei sung ngaihsak phot in. Tua hileh na lungsim sunga na upmawh dan leh ama ngimna taktak hong kibang lo kha ding hi.

Hong it,
Na Pa

Columbus, OH
February 15, 2017