Innkuan sung sumzeek dan

Innkuan sung sumzeek dan ~ Deih Tung

2010 January kha pan in ansai khat ah nasep ka lut a tu in ansai ah na ka sep zawh pen kum 3 val pha khin hi. Ansai tawh ki sai nasep dan a siam pen ka hih loh hang in kei a khop ciang thei ka kisa ta hi.Ansai ah hong pai khempeuh pen ka ki hopih theih kimloh hang in a mau duhdan, a maudeih dan ka thei siam hi. Pawl khat te bang pen a deih uh a gen ma un a gen ding uh ka thei khol liang hi.

Ansai ah anne tuidawn a hong pai khem peuh pen sum hau tawh, sum nei pha lo tawh mitam pi nuntak dan muh na tam pi ka nei ngei khin hi. Pawl khat te pen sum hau mah mah uh in menu en ziau uh a, lim ding in a up mawh peuh peuh uh vaikhak ziauziau uh hi. Pawl khat te leuleu ciang in Promotion bang om hiam? Hih in bangzah man hiam? cih en masa tangtang uh a, a sum neih uh tawh ki tuak in an ne uh hi.

Ka Boss pa un hong gen na ah hih ansai ah hong pai khem peuh in a tawm pen RM50 ta peuh mah hong pua tek uh a, tua sum a puak uh pen a zat loh uh a pha mawh ding in a hoih thei thei in ho pih siam un ci in thu hong hilh gun hi. A cih mah bang in ansai ah hong pai khem peuh pen a tawm pen mimal khat ciang Rm 50 ta bang neham tang, dawn ham tang pian mawk uh hi. Pawl khat te pen Zu leh Beer dawn uh a, sunkhat, nitak khat thu in sum tam pi pi zangh uh hi.

Nikhat thu a a zat vek pi uh pen ei nasem te khasum zahsang in tam zangh zaw thei uh hi. Khat veivei ciang in lamdang bang ka sa a, mihauh na te ka tel zo kei hi. Sum pen tui bang in azangh zo tam pi tak a om lam pen ka mit mah mah tawh mu ka hih man in lamdang ka sapha deuh hi. A diak diak in gamkhangto khin sa gamte ah pen nasep tawh buai tek uh a hih man in inn ah anhuan man lo uh a,ansai ah anne ziauziau zaw uh hi.

Nikhat kasai uh ah innkuan khat anne in hong pai uhhi. Innkuan khat ka cih ciang in nupa khat in a taneu lai uh kum 5 khawng ding khat tawh hong pai uh a, mi thum hong pha uh hi. Tua innkuan te a ding in Menu ka pia a, aduh duh uh en en uh a vai khak uh hi. A innkuan un an leh tui a vai khak khit uh ciang nuam tak in an hong ne ding in hong ki pan uh hi.

A tapa kum 5 a pha pan ding nau pang no khat in a nu mehsuah a, a nu in apasal meh suah hi. Papi pa inzong mehlak pan in naupang te nektheih ding ta ta tengkhia in a tapa mehsuah hi. Tua papi pa in an kam khat a nek khit ciang in a zi leh a tapa in an ne pan uh hi. Ka sai vuah anne tam pi tak ka mu ngei khin a, a lamdang lua in ka ngaih sun kha kei hi. An nek hong man khit uh ciang in a pa un a zi kiang ah sum sian ta ni ci a, a zi in a tapa kiang ah sumsian ta ni ci a,a tapa in kei kiang ah sum sian nuamta ung hong cihteh a annek man uh sum beizah sazian ka lak hi.

A tapa in en a, tua khit teh a nu lak a, a nu in a et khit teh a pasal lak a, a pasal in a et khit teh a sum bawm pan in a sum hong la khia a, sumsian na laibu sung ah koih in a zi pia hi. A zi in a tapa pia a, a tapa in kei kiang ah tua sumsian na laibu pen kei hong pia hi. Tua dan in Pa kiang pan in a zi kiang ah, a zi kiang pan a tapa khut dong ah hong ki khak deudeu khit uh ciang in sum hong sian pan uh hi.

Keizong tua sumsian na laibu pen Cashier ah pai pih in sum ka vasian a, sum cian lai teng pen tua innkuan te ka pia kik hi. Ke’n pen ka ngaih sut na ah a pa un a sum hong pia a hih man in cih na tawh a pa kiang ah sum a cian lai teng ka va pia hi. A hi zong in a pa in ka tapa pia in ci a, a tapa kum 5 apha pan pen ka pia hi.

Tua sumsian na laibu sung a sum cianlai pen a tapa in a khut sung ah la a, tua sum teng a nu pia hi. A nu in tua sum teng sang in a pasal pia hi. Ka muh phet in lamdang ka sa a, hih innkuan pen a koi cidan hiam? Hai vai tak tak uh ei ci in ka mawh sak hi. A hi zong ka ngaih sutkik kikteh a paizia uh pen thu maan ka sa hi.

Ka cih nop na ah Innsung pa te in zi leh ta te kisap na ah vai hawm pih ding a, zi leh ta te in zong a nop na, a hamphat na, ngah na khat peuh peuh a neih te uh pen a pa khutsung tungsak ding uh hi. Nu leh pa te in ih ta te pattah dan ih siam kul hi. Ihta te sum zat dan, ut ut a mawk zat sak ding hi lo a, pa te in zong kei sum ngah sa hi ci a, mawk zat ziau ziau ding hi tuan lo hi.

Ta te leh zi te in zong sum ngah na khat peuh peuh ih neih ciang ih pa te khutsung ah ap tangtang ding a hihi. Ngei na ding in zangpah ni ka ci nuam kei a, a hoih ih muh te a hoih lam in zui siam leng ih khanggui ah nuntak nuamleh thumaan thutak tawh ih nungta suak thei ding a, ih innkuansung hong ci dam ding hi.

Innkuan pawl khat te ah innsung pa pen in sum zong a, a zangh pen zong a mah hi thei hi. Sum a ngah zah a innkuan te in theih pih lo uh a, a sum zat na zong theih pihlo uh hi. A zi leh ta te theihloh kal in Zu leh Beer a tuam tuam ah sum zangh a zi leh a tate in thei kha lo uh hi. Nupi pawl khat te ciang in innsung sum zat na pen a ma thu bekbek in zangh a, a lawmpa theih loh kal in ut teng ki lei hi. Ta te leu leu ciang in nu leh pate sum teng a ut ut in zangh a, nu leh pa te in sum a piak zawh loh ciang guktaak hongki pan uh hi.

Bangbang a hi zong in sumzon na ah a haksat dan leh sum koi ci zat ding cih pen innkuang sung ah a neu pen pan a lian pen dong ah theih tel a, sum zat dan ki theih sak ding thu pi kasa hi. Van khat ih deih tak ciang in sum tawhki lei a, sum ih ngah theih na ding in koi ci dan in sum ki zong hiam? Koi ci leng sum ki ngah a, ih deih te ki lei thei hiam cih pen ih ta te tel sak ding thu pi hi. Tua lo in sum zon dan lehsum zat dan thei keimawk le uh pen a mai lam ding uh dah huai lua kha ding hi.

Ta te in sum a zon theihtak uh ciang in zong a ngah zah zah uh pen Pa te tung ah a ap ding uh thu pi hi. Pa te tung ah sum a ngah zah ap masa ding a, a ki sap zah Pa te tung pan in nget kik ding hi zaw hi.Innkuan sung khat ah sum lut khem peuh pen innkuansung lutang pi kiang tung masa ding a, tua khit teh ki zeek kik pan ding hi. Hih thu paizia in maan ka sak leh zat ding in hoih ka sak innkuan sung sum zeekdan a hihi. Deih Tung