Tuhun Khangthak Hun ah Makaihzia ~ Hau Za Cin

Tuhun Khangthak Hun ah Makaihzia

Tu khangthak hun (1980 zawha piangte) ah makai gina i cih ciangin na makaih mite na lawpsak theih ding a kisam bek hilo in na makaih, zeek, uksiam zong a kul diak hi kici hi. Banghang hiam cih leh tu khangthak hun ah piang mite pen khang masate tawh kibang nawnlo in suakta zaw, manlang zaw, thu theizaw, nuntak nuamzaw ah khangkhia uh ahih man hi.

Tuhun khangnote pen a hoih lama na khat peuh i lah theih kei leh hong uap nuam khollo uh hi, kici hi. Amau lawpna ding lam zong tawsawn siam kul hi. Vai khat peuhpeuh neih ciangin i vai bang hi a, i ngimna bang hi a, i tup bang hi a, i tun sawm dan leh i sep dan ding bang hi hiam cih i telsak, i muhsak siam kisam hi ci uh hi. Gen ziau tawh kingahlo a, amau mit tawh a muhtheih ding vua lahsiam kisam hi. Tha a pia thei, a lawpsak thei, a lunglut lam uh a lunglutpih leh a hihnopte uh a hihpih theite in makaizo diak hi. Tua ahih manin tuhun ciangin makai dingin mite kisin tangtang kul nawnlo hi, ci uh hi. Banghang hiam cih leh amau leh amau tua bang gamtatna a neisa ahih nak uh leh mite in a nungzui lel hi. Tua bang ziauziau ahih manin zong tuhun makaihna leh kalsuanzia pen dau, kiplo, kingakna ciantak neilo in puatham thei diak hi.

Tua banga makai khata hong kineih leh (tuhun ciang makai pen a kitel, a kiseh sangin mite in amau hoihsak khat a zuih ziau uh om theizawta kici) bangteng na kisin kul hiam cih limtak ngaihsun in. Khangnote in a zuihnop makaite pen amau tawh a kibanga ngaihsutna nei, khantohna kibang, deihna leh lunggulh kibangte hidiak hi. Tua ahih manin makai khat in hong kineih leh na makaihte kiangah hih a nuaiate hih hamtang in:

1. Kihopih den in: Tuhun khangthakte in thupisim ding ut ciat uh hi. Kuamah mite nungzui banga om ding utlo in mite sanga tualniamzaw a koih ding utlo uh hi. Tua ahih manin a ngaihsutna uh theihna dingin kihopih den, kikuppih den hoih hi kici hi. Nang hih ciang na tunna pen banghiam cih a theih uh kisam hi. Nang nuntakna hong theih kei uh leh hong pakta thei lo ding uh hi. Nang hanciamna hong tel le uh hong pakta in hong etteh in hong zahtak pan ding uh a, hong nungthuap hamtang ding uh hi.

2. Kikholhpih in: Anne khawm tuidawn khawm cih bang hiden tuanlo in a kisap hun un phawk leh theihpih na hi cih langsak den in. A dah uh ciang phawk in a nuam uh ciang nuampih in. A hanciamna vuah tawsawn leh theihpih a kul a om leh nangzong theihsawm inla, hong kuppih noplohte uh lah dong teitei tuan kei in.

3. Muanngam in om in: Mihing khat in midang khat a muan mahmah ding a baih vetlo hi. Ahi zongin hong muang vanglakte in hong muang takpi ding uh hi. Muan in hong kineih leh nang zong muan bangin om in. Thudik inla, thuman in. Na thu khel nemnum kenla, na cihsa khat sutkik zelzul kei in. Haksatna a om ding leh kigingkhol dingin hilh masa inla, haksatna omlo ding ahih leh zong a lungnopna ding un theihsak khol in. Mihing cih theihloh vai haksa a om leh zong a tel ding un hilhcian kik in.

Tuhun khangthakte pen a lungkim kei le uh kisuangtak hetlo a genkhia ngamte hita uh hi. Khangluite bangin imcip, selcip, mite theihloh a thuaksim cih bang hilo hi. A kam uh tawh gen ngam lel uh, a maitang vuah lak khia ngam lel uh hi. Mite zahpih ding leh mite zumpih ding cih khawng khuallo ngam lelta uh hi. Mite theih dingin zong pulak ngam uh ahih manin thusia kiza baih diak hi. Tua ahih manin minsiat hong khuksak uh leh zong a minsia diak tawh kibang a, hong pahtawi uh leh zong hong pahtawizo diak tawh kibang hi.

Tuhun khangthakte in pahtak ding ut mahmah uh ahih manin a sep hoih khat peuh uh, a sep phat khat peuh uh hoih mahmah hi cihsak hamtang ding ut uh hi. Khanglui lai banga kiniamkhiat taka paktat zong kul a sak sese loh uh tawh kibang nawnlo hi. Phat zo, pakta zo in hile hang lah thanuam semsem uh a, na lianpi sem thei kik bilbel uh hi. Phat kei kha in pakta kei kha leng lah bawngnuak kaih bangin baihlo leuleu zel hi. Bangbang hita leh makai khat in a makaihza a nuai a hong khangtote a piaksuk theih pen a lungdam huai leh a lawp huai mihing nuntakna hi.

Tua banga makai a kipiaksawn uh ciangin a sem thak dingte pen a siam nailo a kisin tawm hi nuam hamtang hi kici hi (green horn, a kidawng). Banghang hiam cih leh tua a sepna mun ah siam ahih manin makai dinmun ah kikoihto leh makaih thei ding cih upna tawh kilamsang, tutna kipia hizaw hi. A siam nailo a kisintawm ding khat dinmun thak ah hong om ciangin mite mainawtpih maw, ahih kei leh nungkinpih maw khatzaw sangsang hi hamtang hi. A siam leh mainawt, a siam kei leh kiamsuk; a ngeina a bat leh a lamdanglo.

Tua ahih manin makai khat cih pen a baih vetlo, lamlai a ding – mite kawk ding leh mite phat ding kikal ah a ding uh ahi hi. Makaihzia kisin in siam pah ding ahih kei leh makaihzia a siamlohna kidawk in mite gen semsem a thuak ding ahi hi.

Tua bang kawmkal ah mipi in zong mawhpuak lianpi a nei hi. Makaite a makaihsiamna ding leh mipi lunggulhna lam a totpih theih nadingin a kisap uh leh a lunggulhte uh makaite tungah a pulak mengmeng ding uh ahi hi. Makaite in mipi sungah puahnop, laihnop, kheknop a neih leh zong a hih theih nadingin a telsiam uh a kisam ahi hi. Pahtawi huaite pahtawi dan ding, thuhilh huaite thuhilhzia ding, pattah kulte pattah zia ding cih bangin makaite sepnopte a theihpih mahmah uh kisam hi. ‘Balpi a liat leh a neu ding a leitang tungah zong kinga’ cih bangin a kisam banga telsiampih, theihsiampih zong a kul ahi hi.