Malaysia, Kepong ah kum 4 bek aphapan atunu 59 vei adawtgawppa sihdaan kipiading

Malaysia, Kepong ah kum 4 bek aphapan atunu 59 vei adawtgawppa sihdaan kipiading

Malaysia, Kepong vengsung ah atunu temteh tawh 59 vei adawtgawppa tuni Monday ni in Magistrate’s Court ah thusitna kinei cih NTS pan kiza hi. Tuabangin kum 4 bekbek aphapan atunu (Niece) adawtgawppa pen amin Goh Jie Kiat kici a, kum 22 aphakhin khat ahihi.

Dawtlup athuak atunu ii aminpen Serena Yip Pei Yee kici hi. Malaysia, Taman Kepong, Jalan Kuang Gunung aom innsungah abeisa June 18 nitaklam 7pm leh 8pm kikal in atunu adawtgawp ahihi.

Tuabangin atunu adawtgawpna hangin midawtpa pen “Section 302 of the Penal Code” thukhunzui in sihdan piakloh phamawh “Mandatory death sentence” kici hi. Ahi zongin September 03 ni ciangin thusitna khatvei kineikik dinga, tuaciangin thukhentatna kinei tading hi.

Hih thuthang akizakcil in temtawh 30 valveibang ki dawtliamgawp kici hi. Ahi zongin Forensic te’n Postmortem abawlna panin amuhkhiatna ah akidawtna pen temta hilozaw in, temteh tawh akidawt ci uhhi. Temteh tawh akigawm in 59 veitak kidawt a, tualakah alungtang leh atuapte 3 vei kidawtkha ahih manin, naupangno in thuakzolo in asihi ci’n Kuala Lumpur police chief Datuk Seri Mazlan Lazim in genkhia hi. Sawltak #zomidaily

Video: A jobless man appeared in court on Monday as he was charged with murdering his four-year-old niece at a house in Taman Kepong, Kuala Lumpur on June 18.

June 19: Malaysia, Kepong ah numeino kum 4 aphapankhat 30 veival kidawtgawp in si

Malaysia, Kepong vengsung ah pasal khatin numeino kum 4 bekbek aphapankhat temtawh 30 veibang dawtgawp ahih manin si cih NST pan kiza hi. Tua adawtgawppa zong midang hilo in, numeino ii Uncle khat kici sawnsawn hi.

Zanni Monday nitaklam 8:30pm hunpawl in Taman Kepong aom numeino te ii a innsung ah thupiang ahihi.

Numeino adawtlumpa pen kum 22 aphakhin khat hi a, tuabangin atunu adawtgawp laitak in guihtheih zatui Drug namkhat akhamgawp laitak kici hi.

Athupiang akigenna ah tua numeino kum 4 aphapan pen ama Uncle tawh akikem in, innsung ah aki mawlmawl uh cihi. Tuahun laitak in numeino ii anu leh kumkhat aphakhin asanggamkhat tepen alup laitak ahihi.

Midang kuamah omlo in, amau 2 bek aomlaitak in Uncle acihpa in atunu pen temtawh 30 veibang dawtgawp in tuaciangin nusia kici hi.

Numeino ii api pen Hari Raya hunsung ahih manin ameltheih alawmte kiangah ahawh hi a, aciah ciangin numeino aki dawtliamgawpsa in innsung ah amahguak aom mukha hi.

Numeino pen sitawh kituam zihziah in, khua phawknawnlo in aom amuh ciangin api zong patau in awnggawp a, huhna ngenpah saisai hi.

Tuahun laitak in temtawh adawtgawppa pen innsung ah omlai in, naupang adangkhat kumkhat aphakhin khattawh kimawlmawllai uhhi ci’n Sentul police chief Assistant Commissioner R. Munusamy in genkhia hi.

Tuaciangin numeino pen api leh anu in amanlangin Desa Park City aom Hospital khatah amanlangin taipihpah vingveng a, ahi zongin tualai ah asawtlo in tua naupangno pen sipah hi.

Hospital panin Doctors te’n avel ciangin tua naupangno pen apumpi tungah 30 veibang temtawh aki dawtliamgawp amuhkhak uhciangin amanlang in Police te zasakpah uhhi.

Tua temtawh adawtgawppa pen meltheih, Uncle khat ci a, ahi zongin amau tawh aomkhawm hilo in, tuani in amau innzang ah ahawhpak ahihi.

More: US Florida ah thautawi pasal khatin Police Officer khat kapliam, naupang 4 zong Hostage in mancip

Tua naupangno ii aluanghawm pen Kuala Lumpur Hospital (HKL) ah kipuaksawn a, aluanghawm Postmortem bawlding kici hi. Police te’n hihvai tawh kisai in hoihtak akansan laitak uh cih kiza hi.

Zandiak mahmah inzong Malaysia, Pahang State sungah nupi khatin amasungpan apiangtektek kum 2 bekbek aphapan atapa pen agawlgui attatsak in si cimawk hi. Sawltak #zomidaily