Vondeih Kep Ding – 60 (Pau Khan Kap)

Dear Tawng,
Nong theihsa mah bangin na pa in laibu ka leizel hangin kasim gaih tawm mahmah hi. A sim sangin a lei bang uk zaw leng kilawm kisa liang ing. Tuin bel kei leh kei kithei in hoih ding lamen in ka lei khempeuh hoih kasa a, hoih kasa kei zongin sim siat dingin hanciam ta ing. Zantak ka lup ding ciangin ka lukhun aom laibu khat manin kasim leh tangthu tomhoih mahmah khat simkha in nang zong hong theisak nuam ka hih manin khuavak zong ngak nawn zolo in nang kong khak ding lai ah hong gelh ing.

Tuma kum za tampi lai, ganging te apau theih lai-in, ci. Simbu kiang ah Zusa khat thudong dingin hong pai-in,

“Sia aw, hih phalbi khuadam ciangin hong khia zel ahi, ahoih mahmah snowflake( vukmal) te khat ciang bangzah in gik mah ahia?” ci-in hong dong hi.

“Aw…tua snowflake te maw!”

“Koilak ah tua te’n gihna cih nei kei. Nothing more than nothing,”ci-in hong gen hi.

Sawtpi khit ciangin Zusa zong atuahkhak thu kik gen dingin hong pai hi.

‘Khatvei singhiang tung khat ah tawlnga in ka om hithiat laitak vuk hong kia in, ka tuanna singhiang tungah hong kia te sim ka kipan hi. Khat, nih, thum in ka sim toh ngekngek pen,‘teng sawmthum leh teng sagih leh tul sawmli leh tul khat leh zakua leh sawmnga leh nih (3,741,952) dong bangmah ci nai lo hi ing. Ahi zongin tua khit ah khat hong kiatsuk lian,‘teng sawmthum leh teng sagih leh tul sawmli leh tul khat leh zakua leh sawmnga leh thum (3,741,953) na lian ah giap sa-in ka singhiang hong kitan in kaampha hi kei leng, a si lian ding hi ing.’

“Humph…Tua maw, gikna nei lo na cih,” ci-in Zusa in lungkim meel lo sa-in hong taisan kik hi.

Simbu zong hong lungngai deda in,

“Khat veivei ciangin ka nasep te neu in ki lamdangna piang sak zo ken teh, cih ngaihsun zel ing. Ahi zongin tua neucik, tawmcik te zong neu ngaihsut ding hi nawn kei.Hih snowflake te mah bangin tuateng hong kigawm leh na lianpi apiangsak zo ding, hong hitah a,” hong ci hi.

Tawngno, hih tangthu tom liklek na pi-in i nisim nuntakna ah ngaihsut ding tampi hong pia sa ing. Ka zingthawh alarm bang hong ging kikta liang in hih zah hong gelh hi ning.

Papa

Columbus, OH
September 20, 2016

Facebook ah Dimno’ Pa Page non na Like sak ve vua!
https://www.facebook.com/dimnopaa/