IS te’n British te vanleng kapsak

IS te’n British te vanleng kapsak

Sept. 24, 2016: British RAF vanleng hawl Air Commodore Martin Sampson in zan halin Syria leh Iraq ah ISte bomb khiat in ka va len ‘ lai-in IS ten lei lam panin nasia takin hong kap uh ahih manin IS ten vanleng kap khiat theihna ding galvan hoih neih lai mahmah uh ahih manin kidop huai hi ci-in pulak hi. Air Cmdre Sampson in hih bangin a thugen ma-in British Defence Secretary Michael Fallon in US makaih leh a pawl ten Iraq ah ISte hatna leh ukna Mosul khuapi panin ISte kha tam lo sungin kihawl khia khin ding hi ci-in kamciamna na bawl lanlan khin zo hi.

RAF ten Britishte vanleng kum nih sung galdo dingin a kilen’sak loh khit nung un zan hal in Cyprus gam-a Britishte vanleng phual Akrotiri ah Air Cmdre Sampson in ISte gam neu khat sung bekah a om ciangun gamtat ding haksa sa uh a, i vanlengte hong kap khiatsak sawm uh hi.

Hih bang hun ah UK leh a kipawlpih ten lei panin huih lak kapna thau tawh kapna kituak mun mahmah a, a beisa kum nih in zong GR4 leh Typhoon fighter vanleng in hih bang kituak mun mahmah napi a kap kik theihna ding galvan hoih nono leh galte omna lianlian kap khak theihna ding kinei a, kibit den hi ci hi (tua bang ahih leh bang hanga kaplum bei ziau lo ai tam thei lo hi’ng).

Hih banga kapnaa a kituah ciangin missiles, shoulder-launched missiles leh anti-aircraft artillery kicite nak zat mahmah uh ahih manin pilvang takin len ding kisam hi ci-in gen hi. IS ten vanleng kap khiat theihna ding anti-aircraft artillery leh surface to air missiles kicite hoih neih mahmah uh ahih manin a thahatna uh kitel hi. Ahih hangin tuate hong kap khak lohna dingun geelna leh bit theihna ding kinei hi ci-in gen beh hi.

Michael Fallon in Mosul a sawt loin kikap pah ding a, kha tam lo sungin kila zo ding hi ci hi (A man takin ci leng kum nih sung a hanciam hangun tu dong kila zo nai lo ahi hi). Kum 25 sungin RAF vanleng hawlte gal lauhuaina pen a do kik ding suak uh hi. US leh a pawl gam 64te’ (Coalition) defence minister teng kha kik ciangin ISte gamdang galkap 8,000te (British mi 400 kihel hi) do ding zia gen khawmna nei dingin kamkupna nei ding uh hi.

Iraq panin ISte hong tung ding kha tam lo, ahih kei leh tu kum sung, ahih kei leh mai kum sungin kizo ding hi ci-in lam-etna lianpi ka nei hi ci-in a hun ding a gen laih toto in Air Cmdr Sampson in gen phuauphuau hi. (Su cimit dimdem mengmeng leh uh a dah kitam het lo mah ding hi ven maw???) The Daily Mail/ Thang Khan Lian