Columbia gam a gamnuaimi te’n kilemna napkip ta uh

Columbia gam a gamnuaimi te’n kilemna napkip ta uh

Sept. 24, 2016: Colombia gam-a Marxist (left) gamnuaimi FARC in Columbia kumpi tawh kum 50 val a kikaptuahna uh-ah mi 250,000 val in sihna a tuak khit nungin Kilemna ding Thukimna “Peace Deal” kici neihna ding namkip taktak ta uh hi. Hih bangin kilemna bawlna ding namkipna (ratify) pen FARC rebel pawl ten Columbia kumpi tawh kituak takin mee (voted unanimously) a khiat theihna hangun hong piang thei hi. Kilemna taktak ding a pian’ theihna dingin kum li sung Columbia kumpi leh Revolutionary Armed Forces of Colombia (FARC) in Havana khuapi ah nung kha-in kilemna suai a kaih manun hong piang thei hi.

FARC in hih kilemna suai namkipna hunah, “Gualzawhna khempeuh lak panin kilemna pen etlawm pen hi,” ci-in FARC rebel makaipipa Rodrigo Londono (nom de guerre Timochenko a kici zaw) zan in Yari phaizang-a FARC Guerrillas’ Congress kici khawmpi ah FARC galkap honpi mai-ah gen hi. Columbia mi ten a aw uh a kizak theihna dingin leh a ngetna uh a ngahna dingun cik mahin thau a tawi nawn lohna ding uh leh ei zong thau i tawi nawn lohna ding nakpi takin kilunggulh hi ci-in gen beh a, FARC galkap ten a thugen a thukimpihna uh lahna dingin ding ngeingai uh a, awng ziahziah in, a khut uh na beng ziahziah uh hi.

Kilemna ding FARC leh kumpi in a neih hangun FARC in thukimna bangin taangpi taangta nuntakna kilaihna ding (social change) political party ahihna uh tawh kituak in kalh veve lai ding uh a, 2026 dong Congress a tutna kituh loin 10 ngah ding uh a, amau thubul let Marxist ngaihsutna (taangpi taangta kikimna) mah lencip den ding uh hi. Congress tuak khat ah FARC ten official takin party thak May 2017 ma-in kiphuankhia ding hi ci-in FARC commander Ivan Marquez hih pawi ah pulak hi. FARC units panin palai (delegates) Yari phaizang-a khawmpi ah kihel uh hi. “Columbia gam mite, leitung bup leh Comlumbia kumpi zak dingin hih pawi ah FARC makai ten kilemna taktak “final accord” FARC’ Congress ah thukimna kinei ta hi cih kitangko hi ci-in Marquez in pulak hi.

Hih kilemna taktak “peace accord” pen Pizing (Monday) ciangin President Juan Manuel Santos leh FARC makaipipa Timochenko in suai kaihna nei ding uh a, Oct. 2 ciangin Colombia gam mipi ten tam zaw deihna tawh thukhenna (plebiscite) nei ding uh hi. Ngaihsutna kilakna (polls) te ah kilemna pen mipi a tam zaw in deih uh hi kici hi. University Del Rosario-a sem Arlene Tickner in Colombia mipi ten kilemna taktak ding deih takpi uh hiam cih dotna lianpi om lai a, kilemna bel piang zo ding hi.

Ahih hangin kilemna ding a dal/nang pawl om veve a, president lui nih in zong nang uh hi ci-in gen hi. Taangpi taangta vai, sum leh paii vai leh gamvai lamsangah kilaihna nakpi takin piang ding ahih manin a kulmut/khanglui ngeina deih pawl (conservative sectors) ten amau ngaihsutna leh neihsate kembit nuam uh ahih manin hih kilemna a pian’ taktak ding lau lai uh hi ci-in gen beh hi.

FARC ten a beisa hunin a mi pimangte hangun mawh maisakna ngen uh hi. FARC ten thuneihnate a bulpi in lencip lo ding/a hiangte tunga thuneihna kipia ding (decentralize) cih ki-ukna leh liangko kikim-a ki-ukna a deihna thu uh zong pulak uh hi. *(India gam-a Nagate’ NSCN pen rebels upa pen hi a, FARC pen a upa pen nihna hi kha ding hi). Source – Agencies / Thang Khan Lian