Ka muhpak US Gamthu pawlkhat – 43
Zopau In Pausak Zo Tek Ni
Kumpi nasem in ka om lai in ka lawm Kawlte tawh ahi zongin, ka tung ua ko sang a hamzaw ulian pawl khatte tawh ahi zongin, mailam tate pilna zon ding vaii mah zong ka kikum thei zel uhhi. Akua mah peuh in US pen ki-lianet tek veve tham a, US ah laisim ding a sangkah ding vaii khawng ka kikup uh ciangin, Kawl ulian pawlkhat in kei bang ngaihsutna hong pia tangtang thei zel uh hi.
Na tate uh tan 10 on khit bekteh gamdang paisak pan un, tua hi kei in aneu lai in High School a kipan na puak uh leh khangno lailua ahih manin ih ngeina leh ih paute na leng mangngilh ding uh a, a sangkahna gam leh leite zia leh tong in ukzo mang pah ding hi. Ei Kawldan ei Zodan khawng hong theihpih nawn lo ding a hong awlmawh sak nawn hetlo ding hi.. hong ci tangtang uhhi.
Tua hi a, a gol khit ciang a high School a tungte cih genloh mailam ah a neulim a tungte a suahlim a tungte Zomi tampi tak hong omta ding hi. Tua hun ciangin ih tate in nang leh kei in ih pau theihloh ih zat siamloh Mangpau Manglai deih zah a, hong pau theih hong gelh theih pen ahi ding mah ahihi. Kisak theihpih luat ding hi lo zaw a, aneu akipan a gol dong Zopau na theihsak a, Zopau na siamsak zawh leh tua pen ei adingin kisaktheihpih huai mahmah hi zaw ta ding hi.
Tua hi a, akuamah peuh in ih tu ih tate Zopau Zoham tawh ih pausak kei leh minam tawm Zomite ih cimang baih lua deuh ding hi. Ih innsung ih bangkua leh eimite lakah Zopau mah zang zaw tangtang tek ni.
(azom omlai hi…)
Agelh: Awn Za Pau
Comment piaknop aomleh...