Vondeih Kep Ding – 21
Tawng,
Khua hun damdam in hong kihei hei-in tuin phalbi bei-in khuakhal hun hongtung hita ei! Napa ka omna ah zong December kha bang liang nawn lo-in khua hong lum tektek zaw deuh hi. Tu nung kha bang peuhmah khuadam lua kisa in guh kitam bang aom liang hi. Inn ah ka om lai-in khuadam in kisi zo liang kei vak kacih hiven tu’n bel khuadam sa-in a kisi zo ding ahih lam tel pan ing.
2014 Census tawh kisai in tunung in i khua ah ZCD makaite leh adangdang pawl khat te hong pai-in thugen na hong neih cih na za ing. Ei khua bek hilo-in khua kiim khua paam a om eimi te zong i khua ah thungai dignin kaikawm cih kazak ciangin na pa kaom na panin ka lungkim mahmah in tha ngah huai sa mahmah ing. Hih ci bangin makai hoih i neih manin angtang in ‘Zomi’ a Pasian in hong pian sak ka kipak hi.
Ahi zongin i theih sa mah bangin ‘Zomi’ akici nuam leh i minam min dingin ‘Zomi’ kici lo-in ‘Chin’ kici zaw le’ng mailam hun ah hamphat na ahi zongin khantohna tampi tak ngah zaw ding hi hang ci-in ‘Zomi’ cih ding sangin ‘Chin’ kicih ding adeih zaw pawl khat om hi.
‘Chin’ a deih te zong na pa’n ka mawh sak kei-a, amau muhna bangin ‘Zomi leh Zogam’ khantoh na dingin mai hong nawt ding uh deihsak ing. Na pa’n bel ka omom na-ah ‘Zomi’ cih ding mah kadeih hi. Lengtong Pauno la mah bangin, ‘Zomi in piang in, Zomi mah in a si ding’ hi ing.
Facebook sung hita leh groups mail tuamtuam panin ka Zomi deih pih kalawm pawlkhat te laigelh kamuh ciangin a lungsim puak uh lamdang ka sa hi. ‘Zomi’ a kici nuamlo te hepkhiat sawm in, ‘Chin’ deih teng pen Zomi min pua group hita leh ki pawlna limlim ah hong kihel nawn kei un cih khawng in kampau mawkmawk uh hi. Tua bek hilo-in hai bawl in, ko bawl na kammal gengen lai uhhi: leitung level, international level ah Doctorate degree ngah te deihna, makaihna zui lo-in, kawlgam ah Bachelor Degree mawkmawk sin in kipil sak mahmah lai, amau thu lo thu salo! A bang thei peuhpeuh dia! Mitkeuh nai lo, khangto nailo, khua phawk nailo hi’ng teh!
Thau ( Pistol ) khat hong kipia in, “ Chin deih te kaplum zaw ding maw, Zomi deihte kaplum zaw ding?” ci-in khat teitei kaplum ding hong kici leh, ‘Zomi’ deihna pi-in ‘Chin’ deihte a ko bawlbawl te ka kaplum lian ding hi.
paukhankap
“ Ah-lah…liang aw ei, Kapa zong, tawm beek na lungsim khiam lai lo ding maw!” hong cikha ding hi teh! Hih tawh kisai ah samzang cia na ngawn khiap sawm keng! Khiam zolo ding hi’ng! Na pa in tua bang dan-a mi koko te ka muhdah lam nong theihsa uhi.
Na pa zong gimkhin zota ing ei, tawlnga kik phot ning. Mai ah kongkupnop tampi om lai!
Napa
March 1, 2014
Columbus, USA
Comment piaknop aomleh...