Facebook zangzangte adingin a theihhuai thu pawlkhat

Facebook zangzangte adingin a theihhuai thu pawlkhat

1. News a kipost ciangin a thu kep nuam tentan na hih kei buang leh a source a kipiak khit nak leh a post ten a ut bangin at lo cihna hi pah a, a link ngenngen se kei in. Ngaihsutna nei lo mi buangin zuau suaksak ngam lo ding hi. Zumkong mangkong ah kiat theihna hi cih a post ten thei uh hi. (A thei lo ten bel suaksak ngam kha ding a, source tuangsak loin a suaksaksak ngam zong kitam veve lai hi). Mi’ thu gelh khat pen na share ding leh a gelhte min tuangsak mangngilh kei in. Gimpi leh khuaksa liangin a gelh uh cih mangngilh kha kei in.

2. Leitung pen gol lua ahih manin hun ciamtehna (standard time) kibang lo a, news suaksak ten a omna mun panun a hun leh a ni tawh kituak in post/gelh uh hi cih thei in la, va selsel se kei in. Tawta na hihna a tangkoko na hih khak ding kidawm zaw in.

3. Mi khat peuhin ama ai tuamin a neih Wall, Blog leh Page khawng ah thu a suaksak pen nang thuneihna om kieuhkeuh lo hi. Nang at dingin kilawm kei peuh va cihsak kha kei in. Mun dang/group dangah a share sawn leh zong amau ngaihsutna a hawm khia hi bek ahih manin kammal kilawm lopi in comment va piapia se kei in. Na tawtana leh mi tawh kibang na hih lohna a pulaklak na hihna leh mi khatin a ngaihsutna suakta takin pulak/gen khiattheihna (freedom of expression) thatsak sawm hi teh cih kidawm in.

4. Group ah na hawh ciangin group min, group sunga thu kisuakte lim takin a deihna, ngimna, phal leh phal lohte adng dngte en masa in. Na ut bang peuh thu suaksak ken. News group ahih leh thuhoih, Pasian thu, gamvai cihte thuhoihte kimuak a, ciamnuih thu leh milim na post nop leh a gennop nei leh a ngaihsuthuai thu post sawm in. Kiselna ding leh kitotna ding thu post kidawm mahmah in.

5. News admin lente, news puakte, blog, Page sunga thu suaksakte pen sum ngah leh a meet bawl hilo hi. FB pen February 4, 2004 in Mark Zuckerberg leh Harvard College sangnaupang a lawmte leh a roommates Eduardo Saverin, Andrew McCollum, Dustin Moskovitz leh Chris Hughes in a phuankhiat hi a, amau bek meet uh a, FB, blog leh Page cih khawng panin kuamah kihau lo a, kisumzaw hi. Blog leh Page khawngah gam vai, minam vai, Pasian thu, thuhoih cihte a postte pen a nuntakna uh-ah a thangahna, a vei thute uh leh hoih dingin a lamette uh atte hi uh a, hun manpha leh sum tampi sum liangin tuate gelh uh ahih manin nang ngaihsutna tawh a kituak kei zongin kamsia in va comment se kei in. Kuamah blog, Page zanga min deihna zong om lo a, pahtawina ngah ngah om nai lo hi. Minam vai, Pasian thu, thuman tangko nuam leh thuman lo a pholak nuam hi zaw uh hi cih tel zaw in.

6. Gam makai leh pawlpi siate pen hunbit nasem uh ahih manin FB sung khawngah thu hong puakpuak man lo uh hi. Minam sung khantohna ding, biakna lam khantohna ding, kipuahphatna ding, kisittel phatna ding, thuman leh thuman lo pholak khia ngamte huih thau ci-in ot khum pah kha mawk kei in. Amau zong a hoih ding deih-a a hun manpha uh tampi beisak lianga a ngaihsutna uh hong sungkhia hi zaw uh hi. Amau hun leh sum beite uh nang piaksak hilo ahih manin hoih nasak teng la in la, hoih lo nasak teng nusiatsan lel in. Thuman lo khat a kipholak ciangin tangtel sihtan a bang leh a sung tawh kituak lo mi kitam lai mahmah hi. Sapul khat na inn sungah om in, na paih khiat kei leh na inn sung teng a sawt loin hong uih ding hi cih mangngilh ken la thuman lo gen ngamte pakta zaw in.

7. Mi pawl khat leuleu zuau thu, minam vai leh pawlpi thu tawh kisai suaksak nuam tam mahmah ahih manin kidawn in. Tuate ah comment va piapia se kei in. Na ngaihsutna tawh a kituak kei luat leh thuman gen khum ding kihta ken. Tua bangte pen Hitler in, “Zuau thu gen mun leng a tawpna ah thuman kisa hi,” cih ngaihsutna neite na hi thei hi. Kidawm in. Minam min, pawlpi min cihte pen a hin’pih ngam sangin a sihpih ngam kitam zaw lai ahih manin kampau kidawm in.

8. Ciamnuih, Tukpeng/bawlung group khawng peuhah thu hoih ahi zongin gamvai, Pasian thu, minam vai, pawlpi vai tawh kisai thu peuh va post se ken. Kuamah in hong simsak mel lo ding a, lamdang hong sa zaw ding uh hi. Thu na post peuhpeuh kiselna ding leh kitotna ding a piangsak thei thute post ding kidawm in.

9. Mi’ lai-at khat pen laimal a khialhna ding na leitang zon’sak den kei in. Amau zong khial nuam lo hi. Lai na at ngei loh manin lai a ki-at ciangin khialhna om kha thei hi cih a thei nai lo na hi bek hi. Gul’ tuk lohin gulgu thei lo hi. Lai na at ciangin khialhna om mun mahmah hi cih na phawk pan ding hi.

Hunsak phot ni ei, sau gawp ei. Khialhna omte kimaisak ni. Thang Khan Lian