Vondeih Kep Ding – 127 (Dimno’ Pa)

Vondeih Kep Ding – 127 (Dimno’ Pa)

Tawngno,
“A kikhel mi tampite a tamzaw a kikhelna hang pen thu 2 hang hi, ci uh a, khatna ah lessons tampi sin kha in, tua tawh kikhel a, nihna ah amau nungtakna ah a tuahkhak thu haksa leh naa a sak mahmah thu tampite hangin kikhel uh, ci hi. A dikgaihloh ding hangin a hih na ciang khat om in um ing!

Nidang bangin gen ding thupi lua om lian lo ahih manin tangthu tomno khat hong gelh ing.

Khatvei Kumpi pa a gamsungteng ah hong vak kawikawi leh mun khat lui nawl khat ah Phungzi ngakawi siah khat hong nawk kha a, Kumpi pa muh lam a theih ciangin Phungzi pa zong a ngakawi siah khawl in, a khi hong khin samsam hi.

Tua bang teng tawh Kumpi pa a kumpi huangsung hong tun kik ciangin a nasemte kiang ah hua tak a, Phungzi ngasa siah pa letsong hon khat pia dingin hong sawl hi. Nasemte zong letsongteng pua in hua Phungzi pa omna ah hong pai leh Phungzi pa ngakawi siah hong tuak leuleu ahih manin letsongte pia lo-in hong ciah kik a, Kumpi pa kiang ah a muhthu teng hong gen leh, Kumpi pa in, “ Ke’n zong Phungzi pa ngakawi siah mu ing.

Ahi zongin ka muh lam hong theih ciangin tua a ngakawi ciang khia in, a khi la-in khin hi. Hih letsong ka piak nopna a hangin tua bangin kei hong muh ciang lau kawm leh maizum theihna lungsim nei a, tua bangin maizum theihna, kisuang theihna lungsim puak a neih pen thupi sa ka hih manin hih letsongte hong pia sak hi ing.

Pai kik un la, va pia kik un,” ci-in sawl hi, ci hi.

Tangthu gelhpa in a nuai ah suapi gelh suk lai in tuate hong gelh kik nawn dah ning.

Bangzah in a sia in gamta in, bangzah in guta deuleu in om in, bangzah in thangtat in om mah taleng zahtak huaite zahtak bawl thei in, maizum theihna leh kisuang theihna lungsim i neih lai siah mihingte pen kipuahpha thei lai-in, kibawlpha thei lai hi hang.

Ahi zongin kisuang theihna lungsim, maizum theihna lungsim i neih nawn kei leh bel kipuah theihna ding lampi, i bawlphat theihna ding lampi pen a om nawn lo hitamai hi.

Kong gelh beh kikkik ciang hi bialbual leh kilawm in, hih tangthu tom sim kik in limtak na lungngai kik le cin kei kong genna sangin tangthu gelh pa deihna taktak telzaw dingin hong lam-en ing.

Hong it,
Na Pa
August 15, 2017