Vok Ngoi ~ Hau Za Cin

A min bek pan zong Khuado nai hileh kilawm hi.
Nikhat, nidang bang hetlo in ka upmawhlohpi in zingsang thobaih in ka hawh ka pai ngeilohna mun khat ka pai hi. Ka kuan lamin tonpih ka neih hangin ka ciahlam ciang kei bek ka hih manin ka lung hong leeng teituai hi. Lasiam, thusiam te in lunglen lungzuan a gen uh ciang khualam, innlam, lawm leh gual, it leh ngaih tawh kithuah hunte phawk uh a, hun nuam, gualnop nite phawk uh hi. Vasa ham ging khat hiam, lui tui luang ging sengseng khat hiam, lasa siam khat la awi daldal hiam phawk uh hi. Kei zong gamdang ka pai masak Taipei khuapi vanlengtual ka tuk deda ciang bel ka huansak, ka kongtual uh ka phawk teta hi.

Tua banga ka lungsim, upate kammal kawm leng a vakkawikawi ni khat, lamet hetloh, upmawh batloh, ahi thei dinga zong ka tuat khak ngeiloh, ka lungsim ah zong hong lut ngei beeklo khat ka tuak hi. ‘Nunglam sabah’ cih bangin – tua nitak lamin Vok Ngoi ka ne kha phophot hi (a zingsang lam lah ka ngaihsut ngeiloh)! Tua ni in ka khua, ka inn, ka khanna inntual, ka nu ka pa lamsa inntual ah naupang banga ka kimawl lai ka phawk velval hi.

Vok Ngoi nek ciang Khuado, Christmas, Kumthak, Sialsawm, Mopawi cihte kiphawk a, tua hunte ah tua mehlim kine diak hi. Ahi zongin tua nikhat, ka theihkholhloh hun, ka upmawhloh gam, ka gilkial maw cih zong ka phawkloh laitak, annek hun hi cih zong ka lungsim ah a ngaihsutloh laitak — Vok Ngoi ka nek khak phophot ciang – – lamdang sa, lungdam, lungleng, lungzuang in corridor saupi kikhung diatduat sungah mi kileh latlatte ka etet hang ka khanna khuaa ka inntual uh ka mitkha in ka mu cian zaw hi.

Ka ne a, ka hai a, ka valh a, a limna sang a thu ka ngaihsut khak man hiam ka lungsim ah ciktui hong phul in ka khanna ka phawk semsem hi. Tua zaha khua lam, inn lam hong phawksak ann tampi ka ne kha ngei khin hi. Ahi zongin tua ni a Vok Ngoi pen tuamdiak hi. Lamdang hi. A hun lamdanga, a mun lamdang in, a kipatna zong lamdang hi.

Koikoi ah i om zong i pianna, i khanna, i sisan, i minam kikhek theilo hi cih hong phawksak a, hong phawksak ding a hunhun in nek leh dawn pan, khuahun kihei pan, lawm leh gual kikholhna pan, pawi leh gualnop hunte pan hong piang den hi, cih kilang hi. Vok Ngoi na ne a, Ak Gilzial na ne zong a hun leh mun in hong lungzuan sak hun om ding hi. Tua bang hun ciang nang zong lungzuang in na khuadakdak kha ding hi. Tua bang hun a om ciang mihing nuntakna ah hun kihei kiphulkha hi a, hun thak, ni thak sungah a kilut ahi hi. Picinna ding, khantohna ding, phawkna ding, itna ding hun ahih manin van leh lei bawlpa ompihna leh theihpih na kisam hi. Tua bang hun ciang amah bek mah in hong neem zo ding a, hong tonpihsuak ding hi.

Upmawh loh a Vok Ngoi ka nek khak vat ciang ka khanna khua leh tui, ka pa lamsa inntual zang leh ka lawm ka gual tawh ka kimawlna munte mitkha ah mu, lungsim ah phawk in hih teng kong gelh hi; gelhloh a om ding ka phal thei kei hi. Tu in zanlai khengta a, ahi zongin ihmut suak nailo hi. Lup hun hita a, tutphah tungah kitu lai hi. Tawlngak hun hi a, tawlmaw tawllo cih zong kiphawklo hi.

I ngeina ah Vok Ngoi, Aktui, Akgilpi cihte in inn bul a tan dan leh mite nuntakna ah zungthuk a khak dan hong phawksak hilo hiam, ka ci hi. Hihte in Zomi i hihna hong phawksak hilo hiam ka ci hi. Na lungzuan theih kei leh kilungzuansak tawm sawm ken, na lungzuan hun hong tung peelmawh ding hi.

Hau Za Cin
Phuitong Liim