Dahna Pulakna: Mangpha Nu Niang Ngaih Vung (Vungno, Tulsa)

Zomi Innkuan USA
Executive Committee

Dahna Pulakna : Mangpha Nu Niang Ngaih Vung
Oklahoma Gamkee, Tulsa khuapi, Jenks veng a teng Pa Ramthanga Ralte’ zi; Nu Niang Ngaih Vung (Vungno) in damlohna hang tawh Feb. 15, 2015 ni in, a leitung nuntakna hong nusiavat hi. Nu Vungno pen a damloh zawh sawt nailo a, cidam kimlai apukvat hi in, lam-et hetlopi mahin khangmoilai pipi ahong nusia ahi hi. Nu Vungno hong nusiat manin adah akap a om, a pasal Pa Ramthanga leh a meeltheih tanaute, khuapih tuipihte, pawlpi mipihte leh a khua leh a tui kipawlna Zomi Innkuan Oklahoma tawh a kibangin Zomi Innkuan USA Executive Committee pawlzong ka dah mahmah uhhi.

Nu Vungno pen khua leh tui sung ah a kizen mahmah, minam puansilh niktente abawlsiam, numei naupang in a it numei kician khat ahi hi. India gam Lamka khuapi panin US gam ah hong peemta in Zomi-te tawh khua khat tui khatmah in Tulsa khuapi ah ateng ahi hi. A pasal Pa Ramthanga tawh a kitenzawh sawt nailo bekthamlo, akitenkhit uh ciangin nau hong pai hi napi, zandiak mahin khasiat huai takin akisia hisawnsawn hi. Hici bang tuahsiatnate hangin akua mahpeuh kikhasia a, kidipkua mahmah hi.

Nu Vungno pen Tulsa khuapi a om, ZIOK kipawlna Makai khatin in apangngei, Sia Paul Zam Khan Thang Tombing’ nau hi a, ZIUSA PAC sung a Makai khat ahi, Maryland a om Pa Suan Mang’ zi tawh a ki-unau uh ahi hi. Nu Vungno in ahong nusiat laitak in kum (42) cingpan hi.

Nu Vungno tawh hun nunung pen Feb. 19, 2015 (Thursday) ni in Tulsa khuapi a om Harvard Fitzgerald Funeral Home ah Myanmar Christian Church pawlpi innteekna tawh kibawl ding a hanmual ah kikha ding hi. Zomi Innkuan USA in dahna lahna in Paakkual tawh kikha ding hi.

Nu Vungno hong nusiatna hangin adah akap, lungleng khuangai a om laizom u leh nau, nu leh pa, lawm leh gual khempeuh anungta Pasian in hong hehnem henla, a damlai teng cidam takin nisim mabante ah thupha leh thathak tawh a kalsuankik zo dingin hong siamhen ci-in thu ka ngen uhhi.

Dahna tawh;

Executive Committee
Zomi Innkuan USA, Inc.

Tulsa, OK
February 18, 2015