USA, California sung Vote piakna geikhat ah thau kikap, mi 1 si, 2 liam

USA, California sung Vote piakna geikhat ah thau kikap, mi 1 si, 2 liam

USA, Southern California sung aom Azusa khuasung Vote piaknading in akibawl Polling Station gei ah Tuesday ni in thau kikapna piangin mi khat si a, adang mi 2 peuhmah liamding cih Reuters pan kizasawn hi. Hih thau kikapna apiankhit phetin kumpi thuneite’n Polling Station geiteng leh agei aom tawlngakna Park cihte akipan akizom in aom sanginn huangte avek in khakcippah uh cihi.

Hih buaina apianna munpen Los Angeles panin tai 25 val agamlakna munkhat hi a, hih thau kikapna pen Election Day ahih keileh Polling Station tawh kizopna, kisaikhakna ommaw omlo cihpen ki gencianthei nailo hi ci’n Los Angeles County Sheriff’s Department pan Spokesman khatin genkhia hi.

Hih buaina apianpen Tuesday ni 2pm hunpawl hi a, American gammi te in akumpi President dingun Democrat Hillary Clinton leh Republican Donald Trump khatzawkzawk ateelding ni uh hisese ahih manin, bang kizopna omhiam cih ki lunghimawh mahmah hi.

Los Angeles County Registrar and Recorder’s office panin Twitter tungtawn in Vote piading te tungah zaksakna neikhia uh a, hihsung aom Polling Station nihte leh, Memorial Park, Dalton Elementary School cih munte ah kidopding zaksakna nei uhhi.

Tuagei naimah aom Slauson Middle School leh Mountain View Elementary School tezong thunei te’n khakcip uh a, siansuah uh cih kiza hi.

Azusa Police Chief Steve Hunt ii genna ah thautawh kap athuak mi 3 te pen khuasung mite hi uh a, numei 2 leh pasal 1 cihi. Tua 3 lakah khatpen sipah hi.

Los Angeles Times te genkhiatna ah tua asipen pasal hi a, kum 70 gualpawl hiding ci’n genkhia hi. ZD Sawltak #zomidaily