Tulaitak US gamsung tungsa te USCIS pan Interview sapkikvai

Tulaitak US gamsung tungsa te USCIS pan Interview sapkikvai

Tulaitak US gamsungah Refugee tawh atungsa pawlkhat USCIS panin Interview samkik uh ahih manin ki lunghimawh mahmahtek hi. USCIS akici “United States Citizenship and Immigration Services” te’n mi pawlkhatte ii atangthu “Case” leh amin apuam, nulepa, suahni “Biographic Information” tetawh kisai in muanmawhna leh lunghimawhna nei uh ahih manin, kancianna “Investigation” abawl uh ahihi.

Tuabang in USCIS panin Interview bawlkikding Appointment akipiasa pawlkhatte, alaisung ah Voluntary kicilel hi, pailohtheih hilel hi, pailoh hangin phamawhlo hi aci pawlkhat om uhhi. Voluntary laimal khatguak hileh phamawhlo khamahding hi.

Ahi zongin anungah “but” cih laimal in zuipheipah a, hih Interview napailoh zenzen hangin USCIS panin asepding khatpeuh semveveding cimawk hi. Tua in tulaitak na “Immigration Status” pen hongsukhading cih ahihi. Alaigual akimin hihbangin kigelh hi.

“Please note that the interview is voluntary, but any failure to appear for the requested interview will not prevent USCIS from taking appropriate steps that may have an impact on your current immigration status.”

Acihnopna pen USCIS Interview napai a, napaikei phialzongin sepding akisam khatpeuh aomleh semveveding uh cih ahihi. Tua ahih manin, pailohziau tawh na Immigration vaipen siangziauding cih hituanlo hi. Napai lohziau manin thu hongki bawlnawnloding, hongki maisakding cih hituanlo hi. Hihbang in USCIS panin sap athuakte vai nawngkai khatpeuh, muanmawh khatpeuh aomman hihtuak a, pailohziau sangin paizaw in hoihtak athu akician in gencian theileh ahoihzawtam???

Ahi zongin hihvai pen mikhat ii mailam nuntakna aki lumlet sakthei vaithupi mahmahkhat himawk ahih manin, sap athuakte amau mimal ii khentatna thupipen dinghi. Hongki dot a, ihtheihcian keilehzong atheibangdan in upmawh genziauziau khaklohding thupi mahmah khading hi. Ihtheihcian keilehzong atheician zawding te, gambeel ahuhna kipawlna zumte, hihvai hong huhtheiding Lawyer cihte tungah ihdot, ihkanding thupi mahmah khading hi.

Hihvai tawh kisai in Phunza FB panin asuahsak uh, Zolai tawh kong letkhia uhhi. Sawltak #zomidaily

Ka nasepna ah US Citizenship angah khinsakhat ICE (U.S. Immigration and Customs Enforcement) te’n Interview dingin samkik uhhi. Banghangin Interview kisamkik hiam cihleh US gamsungah amahtawh amin leh Case akibang midang nihlethum tungkhin ahih manin, akisamkik cihi. Tuapa pen May kha sungin Interview phiding in Appointment akipia ahihi.

US gamsung ah lampi tuamtuamtawh kitungtek hi. Pawlkhatpen Visa tuamtuam tawh Legal takin lut uha, ahi zongin omsuaksuak in, anunung ah “illegal” tawh nasemin omsuak uhhi. Tuabangin illegal in nasemin aom pawlkhatte pen thukibawl in, agam ah akipuakkik khinzong pawlkhat om cihi. Tuaban ah nasep apia Boss (Employer) tezong liautuak uh cihi.

US gamsung ah Refugee tawh alutte sungpanin gamtat ginalo “Criminal Record” aneite hehpihna omlo in hong paikhiatna agam uhah puakkikding in aki vaihawm laitak ahihi. Criminal Record nei cihtepen zukhamsa in mawtawhawl, Beer leh zu dawnkawmsa in mawtawhawl cihvaitawh nihvei thumbei akimansa te, Drug namkhatpeuh zuak leh zang, damiah taih, mivan guksak, vaituamtuam tawh kimat thuakzelzel cihte ahihi.

2017 November leh December khasungin Washington DC aom Myanmar Embassy ahzong apuakkiksawm minsazian pawlkhat kipiakhin cihi.

Tulaitakzong Myanmar gammi tampi aomna ahi Texas State sung aom Fort Worth leh Dallas khuakiim khuapaam aomte USCIS (United States Citizenship and Immigration Services) panin Interview bawlkikding aki zasak tampi omkhin kici hi. Tua Interview dingtepen laitawh akikhak zong oma, phone tawh Message akinusia zong omhi.

US gampi in agamsung ah Immigration Status pen hoihtak a encian kiknuam hidingtawh kibang hi. Tuadan in asapkhitsa te sungah Green Card angahsa tepen bangci bangin Green Card kipia, Citizenship angahsa tepen bangci bangin Citizen ngahthei cih etcianna aneitawh kibang hi.

Hihdanin USCIS Interview sapkik athuaktepen anuai ate hiphadiak hi:

• Malaysia leh India ah Refugee angahna aminpen US Citizen angahding ciangin alaihkik te
• UN asiauh laitak in anu apa sikhin acihsa himahleh US atun ciangin anu apa sapding avaihawm kikte
• Malaysia UNHCR panin ama mintaktak ahilo midangmin tawh UN lutin, Fraud Case akitheihma in US gamsung atungte
• Min, nulepa min, suahni akipan UN tangthu “Case” cihte dongin akibang te, US Immigration panin akibang sitset amuhkhiat te
• UN alut laitak in nupa cikhin himahleh US atunkhit ciangin unau, sanggam hi ung ci’n alaihkik te
• UN alut laitak in zinei, pasalnei ci himahleh kumtampi khitciangin azi apasal sapna abawl tuanlo te
• US atunkhitzawh sawtpi hikhin in Citizen siauthei himahleh thudonlo in, Citizen asiaulo te

More: US kumpi te’n Myanmar gammi 30 kiim puakkiksawm

Hidan in USCIS panin Interview hongsap uhleh Appointment hongpiakni in pelhlo in napaiding hoihzaw hi. Tuabang in napai ciangin nasepna ID, Residence Proof leh ID Card adangdang naneih puapah in. Tuabang in UN nalutlai in na Case nagensa tepen ahithei zahzah hoihtak naki ginkik kulding hi.