Zolai simbu tawh kisai ~ Ngin Khan Khual

Zolai simbu tawh kisai ~ Ngin Khan Khual

18-2-2010 ni-in Tedim Township Education Officer (TEO) dingin nasep ka kipan a, a sawt loin Tedim khua sung pawlpi tuamtuam pan Pasian nasemte le NGO makaite samin Zolai laisimbu bawl nading Revolving Fund neihhuai cih thu ka kuppih leh “Zolai pen sin ding thupi hi” cih sim loh ngaihsutpihna hong nei lo uh hi.

Tua ciangin thu tampi kan man nawn loin ka tapa Thang Tawi Kim Khai (Zo-lun Computer) tawh kopin Tedim, Tonzang, Cikha sung tan 4 leh anuaisiah sangnaupang phazah zui-in Tanlang Zolai simbu 3500, Tan khat bu 3500, Tan 2 bu 3500, a sumin K.2,285,000 man abat in 2010 sangkhak sungin ka bawl bibu hi. Tedim, Tonzang le Cikha uk Zogam sang teng ah sin dingin ka hanciam hi.

Ko pata in K.2,285,000 man Zolai simbu abatin ka bawl uh H Gin En Cin,DD in hong theih ciangin “Kei theih teng athei ding na hi ve vua” ci-in hong lunghihmawhpih ahih manin huhna hong zonpih leh Ciimnuai Boarder neipa Sia Kung Za Mung te innkuan in K.250,000/- hong pia ahih manin Tan 2 Zolai Simbu 850 amawkna’n kihawmkhia zo pah hi. Laibu la napi a sin lo sang tampi mah om hi. 2010-2011 laisin kum lap dinga Tonzang ka puak toh teng bang a ipip nangawn kiphel vet lo, ci hi.

2010 kum pawlin U Chit Htwe, (IS,Hakha) in Cikha sangpi va sit a, siaten Zolai ahilhna a Diary te uh sungah a muh teh “Hih bang hiam” ci-in dong hi. Siaten “Zolai hi” acih uh ciangin zadah mahmah hi. Sang sitin a zinna peuhah tua mah etcik pah ahih manin Tonzang le Cikha ten Zolai sin ding patau phadiak uh hi.

Tedim Sangpi-ah Sayama Niang Ngaih Lun in deihsakna tawh Zopau in a hilhcian leh Chief Minister tung kitunpah a, tungsiah pan thum vei tak thu sit hi. A thum veina U Kyi Toe in 16-7-2011 ni-in sit a, ko gawpgawp hi.

15-9-2-11 ni-in Dr Ba Maung in Hakha ah TEO te kikhopna ah tua thu mah pulak lai hi. “Kawlpau, Kawllai i theih loh manin Zomi te’n tan 10 ong zo lo hi hang” ci hi. I theih loh taktak pen Kawllai hi loin Manglai hi zaw hi. 2011 kum tan 10 laivuanna ah Tedim pan 201 in zo a, 114 in manglai mat 40 bek ngah uh hi. Kawllai bel kizo mahmah lel hi.

Sittwe University le Kyaukphyu Education College ah zong Rakhine pau zang uh hi. Kawlte a kah lo hi lo hi. Mon, Shan, Karen cihten a lai uh suakta takin sin veve uh hi.

2010-11 Tedim ah tan 10 laivuanna en a hong pai, BEMS Aibur Siapi Kachin Siapa tawh laivai ka kikup uh leh Kachin zanggamah minam tuamtuam om ahih manin sangkhak sungin Kachin lai kasin uh a, mualtung gamah tuni dong ka hilh uh, hong ci hi. Sangah tan 2 ciang Zolai sin theih nading phalna om gige hi. UNICEF in zong “I suahpihpau pen thupi hi, laihilh nadingin hoih hi” ci hi.

Cope Topa hong bawlsak Zolai leh Zolai simbu i zun tohtoh pen theih nopin tul mawh a, tua adem zo Zolai simbu dang om nai lo hi. Tanlang pan tan 2 ciang sin peuh le’ng kicing hi. Zolai seminar bawlin Zolai simbu adangdang i bawl hangin sum bei cih bek kilawhtak ding hi. Tan 3 Tan 4 le atungsiah i zontawm theih nadingin laibu tuamtuam le Sunday School in hong dawntuah ahih man phadawm lai hi.

Cope topa hong bawlsak Zolai pen Christian Literature hi loin Zomi National Literature ahi hi. Zomi National Leterature a suah nadingin minam le pawlpi kideidanna omlo in Sangsia hangsanten tatsak loin tuni dong a hilh teitei manin Zolai hong kuang lai a, mitsiang nai lo hi. Sumlepai tawh huh ding zong a ci hi keng, thu le la tawh panpihna, phulpihna om lo ahih manin tu’n kiam hiaihiai hi.

Cope topa hong bawlsak le hong patsak a khutma ahi Zolai simbu kibawl kei leh “om lo” ci-in kisin lo, bawl taleng lah kisin tuan lo hi.

Ahang pen:
1. Zomite’n Zolai pen i minam identity hi, ci thei lo. A ci thei ding dinmun nei kim khat in sukpoi sawm.
2. (Amyo, Barta, Tatana) acih pen e’n vei lo, avei sunsun te’n zong zaipi mulo, tawmcik sungbek huam.
3. Sangah time table sungah kihel nawn kei lel ci, awlmawh nawn lo.
4. Zolai hilh teitei sangsiate pahtawina om ngei lo, hong kithupisim lo.
5. Mikangte’ lai hi, ei lai hi kei aci ci zong om lai
6. Tapidawte’ lai hi, ko’ Pawlpi lai hi, aci ci zong om.
7. Zawnglua a, Zolai simbu lei zo lo.
8. Zolai hilhna huhau tawh dongtuak le’ng hong huh ding om lo.
9. Kawl Siapi tunna ah Zolai sin kimlai kikhawl.
10. TBC Zolai Simbu, KVBA Zolai Simbu, tan 5 Zolai Simbu, tan 6 Zolai Simbu cih bangin huhna sum ngah zui-in lai Simbu kipawl.
11. Theologian kimkhatten lai nasepna tawh minam hong khen.
12. Kumpite phal loh pau lapin Zolai pen dangka zonna’n kinei,

Zogam hong tung kumpi nasem kawlte pawlkhat pen punishment om kiukiu hi. Tua bang tata in Zomite hong simmawhin Zopau le Zolai neumuh zawzek uh hi. Amau i Zolai abei zongin phamawh salo ding uh hi. Kawl siapi tunna peuhah Zolai sin kimlai kikhawl tanghial hi. Kawlgam ahih ciangin Kawlpau le Kawllai asiam mahmah Zomi, Leitung ahih ciangin Mangpau le Manglai asiam mahmah Zomi kisam hi hang.

Tunai ciangin tan 4 nuaisiah gelhsa bu (textbook) kumpi in a free-in hong pia ahih manin mailamah Zolai Simbu zuak zong hong kikham lo ding kici thei lo hi. Tuhun ciangin Pawlpi zui-in aituam Zolai simbu peuh kibawl in amau pawlsung bek ah sin cih khawng om ta hi. Biakna le pawlpi zui-in i paipai leh Zolai thei kitawm semsem ding hi.

Hih vai tawh kisai gen nop tampi om hi, ahi zongin a tawpna ah mittaw sialkhau let nong ci ta uh zongun ken’ bel Cope topa mah a cici lai hi’ng ei.

Ngin Khan Khual