Vondeih Kep Ding – 136 (Dimno’ Pa)

Vondeih Kep Ding – 136 (Dimno’ Pa)

Dear Tawngno, Tawngno aw, dam in laikhak khat hong at kik ing.

Innlak vak in mi inn khat peuh ah hawh leng a smartphone bekbek tawh buai-in, va neh phei leng Facebook leh Viber tawh a na buai keei na hi mawk hi. Social network site lak ah 2018 kum monthly active user a tam penpen Facebook hi-in, active users 2.2 billion phata zel hi. Azom ah Youtube – 1.5 billion, Messenger – 1.3 billion, Instagram – 800 million, Twitter – 330 million leh Viber – 260 million cih bangin zui pan uh hi. Hihte hangin noptuamna tampi tak i ngah hangin tampi mah hong susia sa ing.

A taktak in hong gen mai leng zankim zankhang pi-in Facebook pan, ahih kei leh Viber panin nong hopih pen lungdam lua khol lo hi ing. Nong hopih a lungdam lo hi lo-in, ihmut hun ah, lupna tungpan in na phone na toktok pen diksa lo hi ing. Ihmut hun ding kipelh sak bek hi lo-in, i mit mahmah adingin zong kidop huai sa ing.

Kong ciah ciangin phone tampi charge theihna khat hong pua ning in, nitak lup ciangin lupna khan sungah phone charge lo-in, innliim ah koih in charge ding hi hang. No unau bek in lupna khan sungah charge thei lo bek hi lo-in, na nu tawh ko zong lupna khan ah charge lo-in, no tawh a kibangin innliim ah charge ding hi ung.

Phone ah zing thawh ding hun setup nawn lo-in, alarm ding a tuam in vaihawm ding hi hang. Phone bawlte-in battery charge dan ding, camera zat dan ding hong hilhcianna pi-uh in, i nisim nuntak na ah bang ci zat ding cih hong gen lo hi. Tua manin en, i zatdan ding i geel kei leh hih nate hangin i lalthong ding lung patua ing.

Rev. Job Thawngno in, “Mi in kiphakna, kikawmna a manlang nadingin motorcycle bawl a, Zomite in sih lawh hi hang! Indiate in bukkhuhza dingin zatui bawl a, Zomite in lalthong lawh hi hang,” ci-in US hong zinlai a sermon khat ah gen ngei hi.

Tua bangmah in mi-in communication a nopzawkna dingin hong bawl van leh na te hangin ei innkuan in lalthongna in i neih khak ding lau pha mahmah ing. Tua aih manin hih kong gen thu zui leng ut ing!

Mi lawhcingte in kikhel ding pen haksa sa lo-a, kikhel ding haksa a sa mite a lawhcing ding uh haksa pah hi.

Hong it,
Na Pa

Columbus, Oh
February 13, 2018