US kumpi in “travel warning system” puahphatna nei

US kumpi in “travel warning system” puahphatna nei

US kumpi in American gammi te adingin khualzinhuai leh alauhuai gamte theihsakna “travel warning system” pen zanni in puahphatna pulakkhia uhhi. Tuabang in puahphatna aneihna ah Level One, Level Two, Level Three, Level Four cihbangin nam 4 in khenna nei uh a, tuasung ah gamtuamtuam alauhuai leh amuanhuaizia khencianna nei uhhi.

Level one pen khualzin nadingin alauhuailo, amuanhuai gamte cihna hi a, tualak ah Australia, Singapore, Brunei, Sweden, Switzerland cihte kihel hi.

Level Four ahihleh khualzin nadingin alauhuai penpen gamte hi a, tua gamte ah American gammi te kuamah khualzin huailo hi “Do not travel” ci’n pulak uhhi. Tua te lakah galgam phadiak “War Zone” tepen Afghanistan, Central African Republic, Iran, Iraq, Libya, Mali, Somalia, South Sudan, Syria, Yemen cihte ahihi. Hih gam tepen kuamah zinding ki awi hetlo hi.

North Korea gamzong Level Four sungah kihel a, tua gamsung ah azinsawm teitei Amercian Traveller tepen amau ii Passport zat huailo hi ci’n US Law in khamcip cihi.

US gamtawh aki pawlkhawm ahi Britain, France, Germany gamte zong tunai ciangin lungmuanna omnawnlo, bitna omnawnlo ahih manin, Level Two in ki ciamteh tamawk hi. Cuba gam ahihleh Level Three in ki ciamteh hi.

Hihbang in puahphatna aneih uhpen US kumpi in amau American gammi te koigam zinhuai, koigam te lauhuai cih ki phawksakna leh aki doptheihding in puahphatna anei uh ahihi.

U.S. Department of State Travel Advisory Levels as of 1/10/18

Puahphatna gamtuamtuam list avekin na etnopleh hih link panin avek in ki entheiding hi. >>> Travel Advisory Level

Hihbangin US kumpi in khualzinding lauhuai ci’n apulak gampawlkhat te’n ahihleh lungkimlo in, Complain bawlthei uhhi. Hihbangin US kumpi in Travel Warnings abawl manin, tua gamte ah khualzinmi tawmtuam in, agam ii Tourism Industry pen sukha mahmah cihi.

Malaysia gampen Muslim gamkhat himahleh lauhuailo, patauh huailo ci’n Level One ah kikoih bilbel hi. Sawltak #zomidaily