Kithuza lua liang leuleu ~ Hau Za Cin

Kithuza lua liang leuleu ~ Hau Za Cin

Kizop Siam Ni cih tawh ka gelh hinapi, a thulu kong khek kik hi. Kizopna cih pen kithuzakna cih tawh zong kibang napi a kibatlohna honkhat om hi. Tua lam sau gen sawm kei ni. Ka gennop zawk in, tu hun ciang khutme tawh mek ziau a kizopna van tampi hong piangta hi. Phones, computer, internet, TV, radio… cih bangin. Hihte i zatsiam kei leh kithuzakna bek suak in kizopna, kilawmtatna tampi kitatsak leuleu hi. Computer Games tamzat luatna in innkuan sungah nu leh pa leh tate kikal kizopna kitatsak hi.

Tuhun ciang thuzakna ding, thu lakna ding, kizopna dingin information highway akiciang internet pen a kitam zat penpen ahi hi. Highway hi takpi a, lamziikpi ahih bangin kithuzakna zong a dim, a let in hong luang ziahziah hi. A vekpi in theihsawm, sim sawm hile hang ki ihmu manlo, ankuang kium khawm manlo, innkuan nangawn kiho manlo, thunget lasak kikholh na ngawn a om manlo zah dongin i hun beisak dikdek hi.

Tua ahih manin hih information highway, thuzakna lamzikpi pen bangci tot ding, bangci zatsiam ding cih pen a kisam mahmah thu hong suak kasa hi. Theihloh, zatloh lah, tu hun ciang, gual kibanlo ding, zanglua liang leuleu lenglah gual kidelhphalo tektek ding! Tua manin i nuntakpih ding lamzikpi hi thei a, i minam bup, innkuanbup in mite i delhphakloh lawhna zong hi thei hi.

iPhone hong om diakdiak ciang bang… nuamlua. Nungak tangval, lawmngaih neite adingin bang ‘wow, wow..’ cih ding himai hi. Free SMS, internet, facebook, youtube, twitter, etc… tamlua. Kizopna nuamlua hi. Mel kimuh seloh hang lungsim kizopna a kipsak dingin hih iPhone in lia leh taang kikal ah nasep a hoih mahmah ki itna khaute khih kip semsem thei hi.

Ahi zongin iPhone pen ‘zongsang’ or addict baih mahmah hi, kici hi. Zongsang phot leh adang ngaihsun man nawnlo, vai dang peuhmah phawk nawnlo in a tua bek mah luvaihpih thei hi kici hi. Tua in tuhun ciang khangnote hun tampi laksak a, laisimna ding, kikholhna ding, biakpiakna hun ding, nasepna hun dingte lakmangsak hi. Anne taleh ngaihsun, laisim taleh ngaihsun, nasem taleh ngaihsun den thei hi. A kileekkim nuntakna, balance life style pen kipenglip sak ahih manin a kileekkimlo nuntakna ah lutsak hi. Tua pen a khantawn a gimpih ding zongsatna hoihlo ahi hi.

Christian nuntakna tawh tawm genkhawm leng (Christian ihih manin). Pasian leh mihing kizopna a kip mahmah leh tuapa, tuanu pen Pasian it hi, Pasian zahtak hi, a nuntakna in Pasian lim leh mel pua hi, a gamtat in Pasian minthangsak hi, a luhek gamtat in mite ettehpha suak hi, kici hi. Pasian leh midangte tawh a kizop siamte pen Christian nuntakna ah a lawhcing nuntakna, a hampha nuntakna ahi hi. Pasian leh mite tawh i kizopna pen iPhones leh internet, computer games khawng tawh i khek dingin pammaih lua hi.

Nuntakna a hingsak, a nosuak sitset sak kizopna leitung nopsakna, pumpi nopsakna, lungsim nopsakna bek tawh khek dingin pammaihlua hi. Khek ngam huailo lua hi. Christian innkuan tampi leitung nopsakna bek a pia internet, computer games cihte tawh a buai om hi. Nupa nangawn tuate limzat luat manin kihopih manlo uh hi; a zi in facebook en, a pasal in internet en, a tate in computer games kimawl. Mihing leh mihing i kizopnate tua vanzatte in hong suankhia ta hi. Dah huai hi.

Nupa zingsang niangtui dawn ding nangawn SMS kikhak ta uh hi. A tate a phot ding ciang SMS khak a, a kam uh tawh kiho manlo uh hi. Lungkham huai hi. Numeino te nangawn in facebook zongsangta uh hi. Ankuang nangawn ah electronic vante tawilo in omtheilo ta uh hi. Ankuang thunget sung nangawn a vante uh a khut ah tawi in thunget khit leh ann kamkhat a baak ma in zong tua van en kik man tazen uh hi. Zongsangluata, suailuata, addict cihna hi.

Inn 88 khawng a pha pan Murlen khua nangawn ah tua vante buaipih lua ta uh hizen hi. “Ann na neta uh hiam?” cih leltak khawng zingsang ann nekma in khuasung a lawmte inn 10 val bang khak man uh hi. Mite annek leh nekloh amau tawh kisai lua hetlo ding hi.

A sum bei teng ngaihsun leng a muhkik ding omlo lai hi. Nikhat in Rs. 500 bang top-up thei uh hilai hi. Tua pen Voksa 5 Kg man ahi hi. Anntang 25 Kg man ahi hi. Tuazah sum thalawh kikna dingin ni 5 peuhmah nasem in akuan kik phot kul ding hi. Uanglua, vallua, zatsiamlo, ahih hang zongsangta; aiti tih ing izia…he he…? Ngaihsut sak leng zangkhial hi cih kitel hi.

Tua ahih manin, khangnote kiangah hih vante a zatsiam ding uh ahilh dingin nang leh kei kisam hi. Hih a nuaia bangin kong gualsuk hi:

1. Nu leh pa bek hilo, siate, makaite, upate, etc. a ngaihsun kha mite khempeuh pankhop kul hi.

2. Vanthak, iPhone, iPad, X-Box, etc a thak hong suak masasa lei pahpah, tate leisak pahpah loh ding thupi kha ding hi. Leisak leh zong a zatkhop ding uh leisak a, a kimawl hun uh ciang kikholhna in a zat ding uh hoih hi.

3. Mi khat in khat nei cih bang ahih leh lawm khawllo in tua van bek tawh ‘amah bek’ buaicip ding hi.

4. Khatveivei tua vante khakcip, zatloh ni neih ding hoih hi. Laibu sim hun leh vanzat kihello a kikholhkhop hun neihding hoih hi.

5. Vante zat ding ciangin kikhumcip cih bang hihloh ding hi. Room sungah kikhumcip, amah bek in amah bek lupna lamah kimawl, internet tawh kiho cih bang hoihlo hi. Mi khempeuh muh theihna lengla khaan, sitting room or common room ah koih ding hoih hi.

6. Kimawl hun sung, email et hun, facebook zat hun, games kimawl hun, TV et hun cihte a hun ciangtan ding hoih hi. A hun bawlte in zong a zuih ding kisam hi!

7. Zatloh phamawhte ah zat teitei ding kisinsak ding ahi hi.

8. Zi neisa na hih leh nungak melhoih nasakte tawh facebook ah ‘lawm’ (friend) dingin kizom kei in, kiho kha kei in ci uh ei… he he he…. ciamnuih cihtak!

9. Makai khat na hih leh mikim zuih theih ding khat a kilawm, a kituak ngaihsut tawntung in. Tua in na makaihna mun – pawlpi, khuasung, innsung, kipawlna khat peuh ah tua vanzat (electronics assets) te a kiningcingin zatdan hong theisak dinga, na makaihte khantohna nang ngaihsutsiamna ah kinga ding hi.

10. Zahtak siam in. Tua vante na zat ciang mi tawh kizopna piangsak ahih manin na kizoppihte na zahtak mah bangin na vante zong zahtak siam in. Pheng zat kei in. Mite na kizoppih ciang zong maitang kiho bangin zahtakna pia kawmin kizoppih in (mantain respect, healthy connectivity).

Kithuza ding, ahi zongin kithuza lua liang lo ding. Kizom ding, ahih hang kizom lua liang lo ding. Van tawh kizopna sang mihing leh mihing kizopna mah cidam pen, hoih pen, manpha pen hi; leitung nuam tak, lungkim takin i nuntaknop leh. Hau Za Cin