Aki tupna, Zomite nopsak na ding; a tawpna ah, amau’ zunghkawh, cilphihna ~ Pau Za Mung

Aki tupna, Zomite nopsak na ding; a tawpna ah, amau’ zunghkawh, cilphihna ~ Pau Za Mung

Thu kong honna: Hih, PALAU PROJECT vai tawh kisai, kum 30- val bang ahih zawhciang nangawn in, lungkim lohna, Zomite lakah, meii bangin zaamin kaailai ahih manin, hih thu a hibangin ki tel nailo ahih lamtak kithei hi. Tua ahih manin, hihbangaa hamhtanghpi aa ahong atkik ka hi hi.

Thu patna: 1988- kum ma sangsiah, Kawlgam panin, Kumpi nasep vai tawh(on deputation), Pilna sinhna (State Scholar), Tembaw-ta(Sea-man), Conference, Seminar cihbang simloh, gamdangah work permit tawh nasep pai, cih aki za ngeikei hi. Ahi zongin, gamsung buai ciangin Galkap in gam ukna 19-09-1988 ahong lak phetin, cikmahaa aki nei ngeilo, gamdang tawh ki zopna hong hongpah hi. Tua tawh ki zomin, Naingngaanzee Party, Business Company cihte zong, aki phuanphah phanghphangh hi.

PALAU PROJECT. Thukhatna

1988- September kha sung nikhat, ka nuphalpa, Maj.Khup Cin Pau khuasung a vavaak leh, a lawmlui, Officer (Rtd:) te tawh hong ki muh bekthamloh, amau Company in, PALAU PROJECT aa dingin, aki samh Labour Supply na ding, Kusale(Agency) ngah a hihna; amau tua nasep ki panzo ahihna; amah zong tua ah aki helna ding zawn ahihna; a name card nangawnuh zong a pialai hi.

PALAU PROJECT in, Muslim ki pawlna khatin tua PALAU (Island) ah amau biakna tawh ki sai inn lianpipi(complex building) tampitak lam dingaa, budget, US$ billion by billion in zeek ding ahi hi. Tua aa aki sam ding nasem (Labour) teng khempeuh a sikh (supply)na ding, Kusale ngah ahi hi.

NB:- PALAU cih kammal in, Malaysia kam hi’n, tuikulh(Island) aki cihna ahi hi. Tua aki gen PALAU in, Indochina tuipi sung, Brunei gam kiim khawngkhat in kigen hi.

Uploh theihloh

Hih thu, ka nuphalpa in hong kuppih hi. A zingciangin ka nihun, Zangkung Pansodan, Post and Telecom zumpi gei, 36th: Street ah ka va pai uhleh, tua aa innpi dawlnih a buppi in zumin a zanguh ana hi hi. Signboard golpipi, a mailam leh a panglam mun nihah na ki suangin, MAHA BADOLA LABOUR SUPPLY AGENCENY PTE. LTD. kici hi. Engineer, Technician leh Administrator aa ki pan, Staff 70/80- ding bang a gamtaang zuahzuah uh hi.

Tutpha, sabuai, bizu, desktop computer, type writer aa kipan, zum van zong ki cing zihziah hi. Sabuai simah Telephone aki kawihtek lai hi. A kawwm dimin, tua Project ii Programme teng ahi, Drawing, leh Schedule teng kimtakin aki suanh baanah, BQ aa ki pan, aki sam document leh stationery teng zong, maan bizu sungah dimtakin ki kawih phitphet in, Airconditioned tawh (well furnished) takin ana ki bawl hi. Hihbang ki patna ding bekbekin zong US$ a million bang beizo dingin ka um hi.

Banghangaa hong ngai, ahi taam!

Maj. KCP pen a lawmte in a pawlbawl nopna ahang ka upmawhna uh ah, hih Agent na sepna in Labour supply ahihna tawh ki zui in, a genhaklo Zomite mah deihdeuh uh a hihman aa amah ngenhpi( hopeful resources) dingaa a pawlbawl nuam hi dingin ka umuh hi. Tua ahih manin ko zong, hih thu tawh kisai in Zomite bekmah la ding, a zenzenin Zomite hih theihloh leh ahih zawhlohnate, nidangaa komau mahmah mizat ngeite bekmah la dingin ka ki ho uh hi.

A taangko zong hinai beeklo

Tuabang thu ahong om ciangin, a taangko zong hinai beeklo, meltheih ka ki tuahpih masak peuhpeuhte uh ka genpah uh hi. Tua nangawn zong, ko zum pai, inn ka tunma un, innah ahong na khiang, pawlkhat bang ana omzo liang hi. Ninih nithum sungin, Zangkung khuasungaa Zomi aki ci tampitak mahin, innah ahong dawppah nainai uh hi. Asun azaan cilo, zingsang ka thawh ma bangun, inn kong ah nana ngak lianguh hi.

A thu limpha takin kan

Aki pat cill limlim in, tua Coy. in zong, Instruction, Information leh Direction kimtakin ahong piapah hi. Tuate sungah a tomin, candidate ii a taangthu, tom kimh cing(particulars) teng ahi, amin, apa min, IC no., date of birth, address, ama ki vakhna(trade)eg. Driver, Mason, Carpenter, Smith, Electrician, Mechanics, Civil or Building Engineer( certificate, diploma, degree), mailing address cihbang ahi aa, tuate fill upna ding form zong, tampitak mah ahong pia hi.

Tuateng baanah, nasepna ding mun tun dong, Coy te in sikh dingaa omna zong pia ding, an ahih leh amau leh amau in huan ding, cih ciang dong ahi hi. Khasum pen amau trade leh qualification tawh ki zui in ki pia ding zong aki hellai hi. Benefit( medical, leave) te zong, work site panin ki vai hawmsak lai ding ahi hi.

Tuabaanah, Pwe-khah (Agency Fee) bel, K 100,000) ahih hi. A siauhhlua (application) aki teel(approved) zawh ciangin, K 30,000/- aki sam vai tuamtuam teng aki manzawh, a pai taktak ding ciangin, a omlai K 70,000 ki pia pan ding cih thu ahi hi.

NB: Tua ma in, sum pia nuam bang hi lehang, ahong ki sang dingbang, ahi deksuai kei hi. Ahi zongin, eimi pawlkhat khatte bang uutlua mahmah uh ahih manun, sum piakkholh ding bang ahong kunhkunh uh hi. Ahi zongin ko ka sang kei uh hi.

Tua hun laitak, Zomite nuntaak zia

Zogam bek hikei ei, Kawlgam buppi in, Naingngaanzee in hawih hetlo, nuntaakna a haksat mahmah hun laitak ahi hi. Mikhempeuh phialin, hauh ding nopsak ding cih ngaihsut in nei palpallo, bang kici leh ki puuksi lo ding, cih bekbek tawh aki khuasak laitak ahi hi.

LUNG DAMNA THU

Hih thu komau kiang panaa aki pan ahih hangin, ko ka taangko ka peuhmah kei hangun, amau khat leh khat deihsakna tawh na ki zasak, na ki samuh ahih manin, hih thu ahong pianzawh khakhat zong cing nailo dingin, Zogam mun atuam khua atuam panin ahong tungsuk phenghphangh uh hi. Banghang hiam cih leh, hihbang thu in LUNG DAMNA thu ahi hi. Tuabang thu in, mi khempeuhin thumaan thutak tawh nuntakna ding thu ahi hi. Tua ahih manin, sakhi in, luitui luang siallsiall a zuat bangin, aki ci mahbangin, Zomi te in hihbang nuntakna ding lunggulhin a zuanuh ahi hi.

A thuvaanpi (Board of Management)

Hih BoM te tawh ahun ahunin ka ki muhuh ciangin, cik ciangin sazaan sum ki piathei ding ahihna ka dot uh ciangin, ka ngaklai phot dinguh, a thu kiciat ciangin sazaan hong la pan dinguh ahihna; aki piaktheih ding ciangin hong zasak dinguh ahihna tawh hong dawngkik uh hi. Tua ahih manin, sum peuhmah candidate te tung panin pya khat mahmah zong aki la naikei hi.

Form fill-up

Form fill up in zumah ka puak ciangbek kaanuh, bangmah ka cihthei tuankei uh hi. Tuabang ciangin ahong ki hawmthawhuh hong ki pan hi. Ko hong kaantanhaa zumaa ana dawp pawlkhat bang om hihtuak uh hi. Tuabangaa ana gamtate in bel, summah ana phuum hamtangh hidingin ka um hi. Banghang hiam cihleh, tua Palau Project hangin, Zomi sungah, sum ana suplawh kiukiu zong om ahihna hong ki gen ahih man ahi hi.

Hong daau pianpian

Tuabangaa zumaa ka pai uh, nidangaa BoM te akim aa ana om uh bang nawnlo in, hong kiam cialcialin, kha nih zawh ciangin, khat leh nih cihciang bang bek ana om hi. Kha thum bang ding ciangin, BoM te ki muzo nawnlo bek thamloh, a zum vanteng khawng na khiam cialcialin, a tawpna ah, a Sign Board nangawnuh nana lakhia ta uh hi.

Hih tungtaangin kuamahmah tung panin sazaan sum aki la kei aa, tupna a hong batloh ciang bek hi’n, sum leh paai a suplawh kuamah a omkei hi.

PALAU PROJECT – Thu nihna

A tungaa bang thu aki tuakciangin, eimi taampi tak in Zangkung ah, Nga-taw-khaak aki ci bangin, cihna ding theilo in a om uh hi. Pawlkhatkhat te in a ciah pah vinghveng uh hi. A dangte leuleu ciahpahlo in, bangci lamdang tawh pai thei ding cih ngaihsunin a omna uh ah, ka nuphalpa tawh hinawnlo in, kei kiangah ahong kumh leuleu uh hi.

Daw Aye Aye Myint. LL B (High Court Advocate)

Nidang pekaa aki meltheihpih ngeisa, Passport/Visa Agent, Daw Aye Aye Myint (Muslim) kiangah PALAU PROJECT vai ka va kup leh, amah zong tuabang thu zamah ahihna; ahi zongin kanhsan laitak ahihna; ama theihloh peuhmah in bangmah ka hih nailoh na dinguh; ngaattak in hong vaikhak hi.

Ki lawwplua liang

Tua thu eimite kiangah ka gen leh, hong lawwplua liang leuleu uhaa, tutunghaa ngaw-ngaw aki pelhkhak ding patau lua uh ahih manin, sazaan a nget zahzah piak ding nangawnin hong uuklua mahmah uh hi.

Kuamah tungah sazaan pialo ding

Lawmte vai, Agent nu tungah ka va kup leh, amah ahi aa, akua akua ahi zongin, thu kician hi, ahong cihloh peuhmahin sazaan piak ding, deihsakna lianpi tawh, ngaattakin ahong khaam hi. Lawmte kiangah tuabangin ka genkik ciangin, meima tumh a naiphual a tumhsaann laitak mahmah bangin, thuakzolo ahih manun, tua ka gen thute bang, hong umzolo, ka deihsaklohna bang danin ana ngaihsun zong pawlkhat a om veve hi.

Tuabang teng tawh kha khat taangbang aki ngakzawh hangin bangmah ahong ki lam dangkei hi. Tuabang kawwmkal ah, lawmte’n Agent dangkhat mah hong thei leuleu uh hi. Daw Aye Aye Myint belin, amah tawh ka hih kei phialuh hangin, ama theihlo, ama thukimloh in sum khawng ka piak masaklohna dinguh mah hong vaikhak tanghtangh hi.

PALAU PROJECT Thu thumna

Lawmte hong theih Agent in, 38th: St. ah, amasa belaa bangzah ahih kei hi. Innkhaan neukhat sungah, aki sam Drawing leh Document tuamtuamte mah tawh kimtakin a om ahi hi. A makai pa min pen Khin Zaw hi’n, aman bel, a masa aate banglo in sazaan piakkholh loh in a sanglo ding ahi hi. Kei zong, kei guak pailo in, a uuklai pawlkhatte paipih in, ke’n, amau maimahmah ah ka theihnopteng uh ka dong pah hi.

Sazaan piak dingin, ke’n vai kician salo ka hih manin, lawmte ka awi kei hi. Ahi zongin, lawmte om theilo, sazaan pia mah leuh a lunguh kimpah ding ahihna; a tuakkhilhuh leh kei hong ngawhlo dinguh ahihna uh tawh mi 10- mikhat ciangin sazaan K 30,000 a pia uh hi. Ka piakuh ciangin zong ke’n tua sum tawilo in, ke’n a innpaamah ngakin, amau leh amau ka piasak lai hi.

Ka cihbang keek mah hong hi

Tua Khin Zaw in zingah thaai ah, ciamtoto in a tawpna ah amah zong hong mangg hi. Aki kankan ciangin, Mandalay ah om cih aki theih ciaangin, pawlkhatte in, tuaciang dong bang va delhto lai uh hihtuak hi. Ahi zongin ki lamdanna a om tuan kei aa, bangmahlo ahi zel hi.

Thukhuphna

Hih, PALAU PROJECT, a taangtun zawhkei hangin, Zomite bek hikei ei, Kawl gam bup in Work Permit tawh gamdangah na aki sep theihna ding aki patna, a leiikha ahi hi. Tua bang ahihna, a nungciangin mi pawlkhatte in tetti panna bangin a nei uh hi. Pu Pau Za Mung