US kumpi in abeisa in akhakcip gam 11 panin Refugee te lutkhuan piakikding
Abeisa in US gamsung ah lutding in akiphallo gam 11 te panin Refugee te lutkhuan ki piakik tading hi ci’n United States in Monday ni in genkhia cih AFP pan kiza hi. US gamsung ah Donald Trump in President hongsep ciangin alauhuai “high-risk countries” gam in akiciamteh, adiakdiak in Muslim te tamphadiakna gampawlkhat panin Refugee te US gamsungah alutloh nadingin thu kibawl, ki khamcip hi.
Tuabang in aki khakcip gam 11 te panin Refugee te US gamsung ah lutkhuan kipiakik tading ci a, ahi zongin abeisa hunte sangin limtak in kisitcian zawding “tougher scrutiny” cihi.
Tua gam 11 tepen Official in aki pulak khiatloh hangin Muslim te tamphadiakna gam 10 leh North Korea gam, agamgawm in gam 11 hiding kici hi.
Tua gam 11 te panin US gamsung ah luttheih nadingin ngetna Application akibawl ciangin thu limtak in kisitding, tougher “risk-based” assessment kibawl masading a, tuakhit ciangin deih abatleh kisangpanding cihi.
Homeland Security Secretary Kirstjen Nielsen inzong hihvai tawh kisai in “United States gamsung ah kua honglut ahiam cih kiciantak in ihtheihding pen athupi penpen ahihi” ci’n genkhia hi.
Hihbangin Security limtak in aki khauhsakna hangin Refugee sungah miginalo kihello dinga, tuabek thamlo ihgam “Homeland” pen ih hukna, ihdalna zong hipah hi ci’n genbeh hi.
Hih Refugee Policy vaitawh kisai in abeisa October khasung in Trump Administration in thukhun apuahphat hi a, gam 11 panin Refugee te alutding aki khakcip ahihi.
Tua gam 11 tepen banggam tenghiam cih Official in aki genkhiatloh hangin Refugee Groups te’n Egypt, Iran, Iraq, Libya, Mali, North Korea, Somalia, South Sudan, Sudan, Syria, Yemen hiding hi ci’n pulakkhia uhhi.
Hihvai tawh kisai in Senior Administration Official khatinzong Journalists te tungah agenna ah hihbangin Security Assessment aki khauhsakna pen tua gam 11 te panin Muslim tebek ngimna tawh Policy aki khauhsak cihbang hilo hi. Hih US gamsung luttheih nading Admission vai ah biaknavai “Religion” tawh bangmah kisaina omlo hi ci’n genkhia hi.
Donald Trump ngiatin abeisa kumkhat hunlai President hongsepzawh akipan Immigrants leh Refugees vai te ah khauhtak in alencip ahihi.
Abeisa in President asem ahi Barack Obama in 2017 Fiscal Year sungin Refugee Admission pen akigawm in mi 110,000 lakdingin geelna anei ahihi.
Ahi zongin Donald Trump in President hongseptoh ciangin tua Refugee Admission pen mi 53,000 ah khiamsuk in, tuabek thamlo 2018 Fiscal Year sungah Refugee mi atampen 45,000 bek lakdingin khiambehsuk leuleu hi.
Tuabang in akhiapgawp bekthamlo, US gamsung ah Refugee limlim ni 120 sung luttheiloding cih khakcipna neisawnsawn ahih manin, US gamsungah Refugee atungpen kiamcihtak in akiamgawp ahihi.
Refugee tawh US gamsung alutte bekthamlo, “Green Card Lottery” ahih keileh “Diversity Visa Lottery” tawh US gamsung alutte zong khakcipding President Donald Trump in thusunna nungkal sungin neita hi.
More: USA paitheih nading DV Lottery ngahcih kikhemna
“Green Card Lottery” tawh Middel Eastern leh African Countries panin US gamsung alut pawlkhatte’n US gamsungah buaina piangsakthei zelzel uh ahih manin, President Donald Trump in “Green Card Lottery” zong akhakcipsawm, aphiatsawmta ahihi. Sawltak #zomidaily
Comment piaknop aomleh...