Upna leh Kei Updan Kikeelki
Tuhun mihingte i nuntakna in khantohna hunsungah i lut mahbangin, siattheihna leh dahhuaina lianpi tetawh kimawl a, nuntakhun zong ahihi. Tuma kumzalom hun lai pan kipan in, mihingte in leitungah apiang, leitungah a om nate tungah ukzawhna, letcipzawhna, thuneih zawh nading hanciam in, tu in ahih leh khatungbek hinawnlo in, leitung dangte tung nangawn ukzawhnang kihanciam ta hi. Mihing te in nakhempeuh te tung ah ukzawhna aana neihzawh nang hanciam in i omlai takin, mihing le mihing ukzawh nading lampi kimangngilhta hi. Hih thu hangin, nidang hunlai sangin tuhung ciangin, mikithahna, kido na, kibawlsiatna te hong tam zaw in, mite in, kei utbang, kei deihbang, kei upbang ci in, amau te uutna, upna, theihna bek uh bia uh ahih manin, leitungin siatna lamah hong manawh semsem zawlai hi. Kei uutbang, kei upbang, kei sanbang, kei deihbang ci in, kei cih (subjectivism) bulphuh in, Pasian nangawn kei updan, keisan dan, kei zuinopdan, kei teldan, kei thangah dan cihbangin Pasian deihna sangin, “kei” cih kibulphuh, kimasak zaw ta ahih manin, tua bang upkhialhna, ngaihsut khialhna in leitungah, innkuansung kizopna, u le nau kizopna, beh le phung kizopna, khua khat le khat, gamkhat le gamkhat kizopna te susia in, kitotna, kiselna, kilangneihna piangsak hi.
Hih thuhangin, tua bang mite in, amau utdan, amau sandan, amau updan, amau thangah dan, amau lawpdan a, alawppih theilo mite pen, gal in sa in man in, simmawh in, that in, bawlsia uhhi (religious extremists te). Tuhun ah mihing te in alau penpen leh, akihtak penpen te in kua te ahihiam ihcih ciangin, Pasian thu umlo te ahi hetkei hi. Amau uutdan bek a a um te, amau sandan bek thupi asa te, amau deihdan le amau lungkim dan bek tawh Pasian a um te ahihi. Leitung ah pilna nam tampi oma, tua pilna namkhempeuh te in mihing te khantohna ding vive ahanciam ahihi. Ahi zongin, mihing khantohna man taktak in, mihingte ngaihsutna leh sepkhiatna tungah kinga lo in, nakhempeuh apiangsak pa ahi, pilna kipatna Pasian deihna banga nuntakna bekin khantohna man leh khantohna picing hongpia ahihi. Hih thu hangin, mihingte pilna, deihna leh utzia, upzia, sanzia te in Pasian deihna, Pasian utzia leh Pasian sannop upna le pilna nasepna te ahih kei leh, tua pilna tua upna in leitungah sihna leh siatna piangsak tawntung hi.
2010 kum in ah Tedim ah kumpi ulian khat in hici in genhi: Khamtunggam asusia pen Pasian nasem akici te vive hizaw hi, ci hi. Tua hongcih laitak in sanhak leh ngaihsut hak kasa hi. Tua mipa in, Kawlpi kuam, Tamu, Tedim Falam le Hakha cih te ah na ka sepzawh kumsawmnihval ta hi. Pasian nasem hi ing aci te zah in khamtungah mikhemngam kamu kei hi, cingam hi. Amah pen thukan te leh, gamsung gampua thusit thuzonna zumah nasem khat ahihi. Ama thugen man hi/manlo hi cihpen tuhun ah eite mit tektawh en in, i khinkhai ding thupi mahmah ta hi. Pasian pen eite bawltawm milim ahi kei hi. Eideih bang hongbawlsak ding, eideihbang hongvai hawmsak ding, eideihbang asemding in Pasian a nungta ahi masa kei hi. Ei mihing te in Pasian bawlsa ihihi. Tua ahih manin, mihing te in, Pasian deihna banga nungta ding, Pasian deihna banga nasemding, Pasian deihna bangin vaihawma i leitung nuntakna ah Topa hoihna leh Topa hongit nate anuntakpih ding ihi zaw hi. Tua hina pi in, tu hunciangin, mitampi te in, Pasian ka um hi, kasanghi icih hangin, kei sandan, kei updan, kei thangah dan, keilawpdan, kei lungkimdan cihtawh kinungta ahihmanin, Pasian deihna sangin, mihing tedeihna-Keideihna (subjectivism) kithupisakzaw ahihmanin, Pasian ka umhi aci innkuan sungkhat nangawn, eisan dan, ei updan leh eilawp dan hongki lawppih lohciangin, kitotna, kisel na leh nupakal kikhenna nangawn i piangsak zen hi.
Keisan dan, kei updan cih bek thumei let in kinei in, Pasian nasem akici mitampi te in, lungsim siangtho mitampi takte lungsim sungah guza khah ahih manin Khamtungah Jesu ka up ahi aci minih kilemthei lo in, Jesu honpa le 
gumpa in kasanghi aci nupa nih in lupna nei khawm theilo in, annkuangkhat uumkhawm theilo hi. Tua thuhangmah in, u le nau sungthu ki keelkisak in, beh le phungsung kikaai awk a, khuasung gamsung kikhenkhapna pianghi. Sehsuah manman apia mite, sumtampipi apia mite thuphangahminam, thupha innkuan, thupha ngah mimal ci in, Laidal golpipi pia in kipah tawi a, ahi zongin, amau sumngahna thu ippih in, thusim in kikoihsak hi. Hih thute in, Khamtung ahoihsak ding thute ahihlohna thu eite in mit in mu in, nisim in ihsin thute vive ahihi. Tua hangin, atunga i gen, kumpi ulian pa thugenna khialding in kalamen ngamkei hi. Tuhun khangthak Jesu honpa le gumpa a asangmi te in updan, sandan ki enkik in, honghon Topa deihbang, utbangin i upzawhnang hangciam in, updan siamciatni ci in, tha i kipia hi.
Rev Fr Damian Dal (Nimdildial)
Leuven, Belgium
Comment piaknop aomleh...